Burma Ram Feh Dan Ding Part 11

Suu Kyi le Time Magazine

Dr.Than Bil Luai i Hnatuan Nak
 
Teddim doctor pawl khal in hna tuan tha tha an tuan ding nan an tuan dan pawl ka theih lo ruang ah ngan ding ka thei lo.Tu cu kan mah Falam Laimi lak i hna tuan tha bik pakhat Dr.Than Bil Luai i thu mal te lai in kan ngan ding.Pu Luai hi Khawrua i a suah le suah lo ka thei lo nan a pa le cu kan khua Cerhmun khaw kiang i Khawrua suak an si i,Kalay i Tivar khua ah an vai.An vaih pek hrawng ah cun Tivar cu Mizo khua vek rori a si.
 
Dr.Than Bil Luai hi Mandalay i medical college ah a kai.A tlawng kai lai ah sum le pai lam ah a ol lem lo ti ka thei.A tlawng kai lai khal ah kan thei aw man.A sung khat,a rualpi,kohhran lam in an bom tlang i,a mah khal ca a zuam in ca a thiam thei i,cu nah mi tampi i kan  si thei lo mi sibawi doctor a run si ta a si.Dr.Than Bil Luai i sin khawte fa khal hi mi thupi zet a si thei ti a lang a si.
A hmasa ah cun a cozah sibawi tuan in Tibual tla ah a um.Hitawk i a um tum ah an inn ah ka thleng dah.Hi tawk lai i si khal in silam i mipi a ngaihtuah men si lovin lo neih nak lam khal ah mipi hrang ah thanso nak tampi a tawlrel.
 
Tahan i a um hnu khal ah mi zangfah nak nei i,damlo pawl rak bom nak thawn,mipi thanso nak ding thawn tampi a tuan a si.A mai tanlak nak in a si zung building pawl khal nasa zet in inn tha tha,hmanrua tha tha a neih phah a si.Ram dang khal ah zir nak sang vek tla hawl in a feh.Pu Luai hin tu hnu khal ah kan mipi pawl i dam nak ah siseh,taksa lam i thanso nak kan ngah nak ding khal ah si seh theih tawk in suah sak ring ring hram seh tiin kan ngen a si.
 
Burma in Gorbachev a nei lo an ti.
Aung San Suu Kyi kha November 2010 in an suah hnu zarh 5 sung ah leitlun i news magazine darh kau bik Time cun cover story ah vawi 2 rori a telh.Nikum December ah cover story ah an telh leh i,Time hi kum 40 tlun ka siar zo in hivek in thla 13 sung i cover story i vawi 3 an telh hi ka thei dah lem lo.American President pawl cu an ti men ding nan.
Kan ngan zo vek in Time khal in Suu Kyi a suah pek ah ziang pi pa a ti thei a zum nawn lovi,welfare ( zirnak le harhdam nak lam )ah a tuan a tul men ding a ti.29-11-10 issue Time cun “With election done,Asian investment flowing in,the military is at it’s strongest in years”a ti.Cui tlun ah there is no sign of latter day Gorbachev in Burma a ti fawn.Ka ngan zo i,Delhi kan meeting nak pakhat ah general pawl i sin Gorbachev tla a suak men ding a si si ka ti tik ah Kawl pa Zin Ngying in kan ralbawi pawl cu eiru tlang le thil tisual tlang an si i,ziang tin an lak in Gorbachev a suak ding i ti.
Cule 10-1-11 i Time coverstory ah cun “General pawl hin Suu Kyi hi hlo ral vivo seh an ti a si ah cun an thelh ria a si “a ti.General pawl hin a sam i par par a ton mi nu te hi an ral tum bik ah an ruat tho tho a ti fawn.Cui tlun ah “Suu Kyi an suah hnu ah Suu Kyi hi leitlun i  um lo vek in an cang vai”a ti.
Kan rel zo vek in Suu Kyi hi house arrest i si an suah hnu  thla 9 sung cu ralbawi pawl in Suu Kyi cu a um  nawn lo,a cem zo,ti tlak a si nawn lo an ti nan Suu Kyi cu a cak sin sin i,August thla kum 2011 ah cun President Thein Sein rori in Suu Kyi cu be aw ding in a sawm ta hial a si.
(Suak leh ah Arab Spring le Burma politic kan ngan hlan ah India PM Man Mohan Singh i Burma tlawn le India le Burma thu si seh la..)
(Visited 41 times, 1 visits today)
%d bloggers like this: