Burma Ram Feh Dan Ding Part 01

Kei cun Burma ram ka run ti i,hi hi ralkap a cozah pawl i duh lo mi cu a si lo..Democracy duh tu pawl,a hlei ce in ramdang i um lai pawl cu ralkap pawl kan tih a tul lem lo ruang ah Burma tiin ka ti.Myanmar ti lovin. Pi Aung San Suu Kyi khal in English i a tong nak ah cun Burma ti hi a hmang.Hihi democracy kan si ngai ngai lawng a hmin thleng le thleng lo ding hi rel ding a si ding.
Cule tu fang hi NLD party MP hril thar 43 pawl i parliament an luh ding i thutiam an lak dan ding ah an buai ti kan thei cio i,an nih cun 2010 Dan pi kha an lung a kim lo tik ah thutiam lak nak ah khami dan kha kan safe guard ding tiin a um mi kha an ti thei lo. Kan respect ding ti lawng in ti an duh.Kan theih cio vek in 2010 i hrilawk nak i an rak tel lo kha khami dan kan pom lo an ti bik ruang ah a si.Khami dan pom lo ruang i Laimi hrilawk nak i rak tel duh lo pakhat cu Pu Cin Sian Thang,Zomi National Congress president kha a si.ZNC hi 1990 hrilawk nak ah seat 2 an ngah.Pu Cin Sian Thang cun 2010 dan hi tlangpar mi pawl siat nak di ng a si a ti i,an rak tel duh lo.
Nikum August thla i Pu Sui Kyi le President Thein Sein an biakawk hnu ah remawk nak a rung um vivo i,a si nan can rei pi cu ziang ruang ah Pi Suu Kyi hin 2010 dan hi vantlang theih ah a sawisel lo tiin ka rak ruat zawk rero.Cuvek a si hnu ah April ni 1 hrilawk hlan thla khat duh hrawng ah maw si Suu Kyi cun 2010 dan hi democracy ngai ngai a si lovi himi cu thleng leh ding a si a run ti i,ka lung a kim ngai ngai.
Cule hrek khat in Pi Sui Kyi hin 2011 lawng i si hmuah in ralakap a cozah hi run tuan pi a duh i,hi hi ahlan khua pi kum 15 lai i sin rak tuan pi duh sehla kan nuawm nak a rei pi ding nan an ti.Himi hi sim fiang ka duh.Suu Kyi hin rak tuan pi duh hman seh la ralkap lam in tuan pi an rak duh dah lo.Suu kyi hrang ah tuanpi ding khal a rak um dah lo.Thuthiam nak ah 2008 hi dan sete vek hman an rak tuah duh lo.Kei mai rin dan men tla cun General Then Shwe hi kum 78 lai si lovin kum 60 lai lawng si bang seh la,cui tlun ah Burma ram economic hi hi tluk in se lo seh la,tui dan sete 2008 dan hman hi tuah sak a tum lo ding i,kum 10 tlun cu uniform thawn run uk a tum lai ko ding.
1990 hrawng ah khan ka pu Dr.Za Hlei Thang khan ralkap pawl hin kum 15 kum 20 run uk an tum a ti i,kha lai ah cun ka rak zum lo nan a rung si tak tak ko.2010 hrawng ah khan a si hmang Victor Biak Lian in Suu Kyi cu a cem zo,Burma democracy a rung si ngai ngai ding cu kum 20 lai a duh ding i,cunah cun Suu Kyi cu a dam hman ah kum 80 tlun a si ding i,ziang hman a si thei nawn lo ding a ti.
Pu Victor khal in Presidnt Thei Sein hin Suu Kyi hi a run tuan pi duh ding hi a ruat ban lo.
Kan theih vek in 2003 ah Suu Kyi kha Depeyin ah thah an rak tum a si kha.Cui tlun ah Than Shwe tla cun Suu Kyi i hmin sal hman a duh dah lo ti a si.Nikum April thla tiang hrawng hman ah khan Sui Kyi hi a cang sual ah cun na pi hrem a si ding an ti lai!
Hmai lam thu ding kan thei lo nan tu ah cun Suu Kyi i hoha nak in beisei nak kan run nei deuh cu a si ta mai.
Ziang ruang ah Thein Sein hin Suu Kyi a run tuan pi duh tihi zoh tlang seh la.Burma ram economic a se tuk lawmam.1960 hrawng i developing ram pawl i economic tha bik Burma hi tu ah cun UNO member 190 lai ah ram farah bik 10 ah a tel tlat.Tui ralkap pawl hin socialist system kan hlon cun South Korea,Taiwan le Indonesia pawl tla ralkap uk si i free market system in an rung lian a si si,kan nih khal kan lian thei ding tiin an rak ruat ding.1990 hrawng tho tho ah mi ram pawl cu economic ah an tthang nan Burma cu ralkap hnuai cun a tangso dah lo ding tiin 1991 hrawng tho tho ah Ka pu Za Hlei tla ka rak sim dah.( Hihi leh hnu ah ka run simfiang ding )
President Thein Sein cun democracy lam kan hoi lo cun,kan ram hi a farah sisin ding ti a thei.
Thein Sein tho tho in ram se zet Laos ram hman kan tluk nawn lo a ti.Laos ram i percapita income cu $2100 lai a si i,Burma cu 1200,India 2900,China 5000 lai,Malaysia le Thailand 9000 lai le Singapore tla cu 35000 lai a si.
Burma economic a siat tuk ruang ah le economic sanction thlah tir a duh ruang ah Suu Kyi hi an tuan pi a si mai.Cui tlun ah Arab Spring thu an thei ve i,tu lai ah dictatorship mipi in an hua tuk ti a si i,cu nah an runtih khal a si ding.
%d bloggers like this: