Burma Ram Feh Dan Ding Part 05

Lairam kan len thei dan ding
Pi Suu Kyi house arrest i a um dan kan ngan hlan ah kan dung i ka ngan mi Singapore  ram fate tuk,Falam peng si lole Kalemyo peng i then li then khat lawng kau,tlang hman nei lovi senhri par man kum khat i $800,000 an ngah ti kha vun peh lawk seh la.
Laitlang tla ah cun cin tul lovin senhri par tam zet an um thei ti kan thei cio ding.Ram a that ah cun dan tha tei senhri par cin dan,lak dan pawl kan tawl rel ding.Thing tum pi pi hau tul lovi thir fung sau zet,zuh sau thei pawl i lak dan tla kan tawl rel ding.
Cule kan Laitlang ah cun thei kung le thei dum tla an tha zet ti kan thei thluh.Himi in jam tha tha kan tuah thei.Japan sunhlu kan ti maw mirang sunhlu kan ti sawn ha an that tuk dan kan thei thluh.
 
Cule Pu Kap Tial England i ca a zir lai ah mirang pakhat in nan tthil thing hman in ei cawk lo nan hmu ding a ti ti a si.Kan far thing pawl an that zia kan thei i,far thing i sin a thling pawl kan la thei.A thling i sin finished product phun 20 lawng hman tuah seh la,mi thawng tampi ei hawl nak a um ding.
 
Pi Suu Kyi i can hman dan
 
Kha le Pi Suu Kyi thu ah.Suu Kyi hi house arrest i a um lai ah ca uk a siar nasa.Spy stories pawl tla a siar zet.John Le Carre i ca uk pawl tla a siar tampi.Le Carre i nganmi 2 ka siar dah ve.Pa khat cu The Spy Who Came in From the Cold ti a si i,a dang cu The Honorable School Boy a si.Hi pawl hi kan dung lam kum 25 lai i ka siar a si i,Englsih ka thiam tha lovi ka thei thei lo nasa.Suu Kyi sawh cu Englsih a thiam law law i,a siar a har lo zet ding.
 
A tlawngkai nak pawl kan zoh lawk ke.Middle school tiang cu Rangool i convent school ah a si ka ring.High school cu Delhi i a tha bik pakhat,Catholic school Jesus and Mary ah a si.Cule college ah kum 2 sung cu Delhi i Lady Sri Ram college ah a si.Hi college hi India ram i college tha bik top 5 ah a tel ring ring.Hi tawk i sin Suu Kyi hi degree la lovin England i Oxford ah a thawn aw.Cu tawk ah MA degree a la.Suu Kyi Delhi i a um kha a nu Khin May Kyi kha Burma ram i ambassador a rak tuan ruang ah a si.
 
Cule Suu Kyi hin house arrest i thawng a tlak lai ah ni khat ah BBC radio nazi 4 lai a ngai ring ring ti a si.Cule Time le Newsweek magazing pawl a siar theu.Vawi khat ka theih mi cu Time le Newsweek an pek thei ruang ah a lung a awi zet ti ka thei dah.
Suu Kyi hi a inn ah a zawngum nu 2 thawn kharh khum in a um ring ring.Pa khat in a va bazaar theu i,cu tawk in ei ding le in ding pawl a va lei theu.Ei ding a lei nak ah tur phulh mi a lei lo nak ding in a ralring ka zum nassa.
Suu Kyi in a doctor sibawi thla khat ah vawi 1 a tong thei ti tla ka thei.Cule a ti leh mi pakhat cu a exercise theu ti a si.Ti seh la ti ka duh sak nan a ti lo mi pakhat cu hmun te a tuah lo hmang.A inn hmun in a zir lo khal a si men ding.
 
( Suak leh ah Syi Kyi i lawmman a don mi pawl ).
%d bloggers like this: