Burma Ram Feh Dan Ding Part 40

Laimi Hrang I TlangTong Thu Ah

1980 kha a si hmang i,Aizawl MacDonald tlang i Pu Hrang Nawl i a innsan mi ah a si.Pu Hrang hi 1956 lai i kum 24 mi si cing i Burma ram MP i hrilmi a si.Kei cun Pu Hrang hnen ah cun Pu Za Hre Lian khan Chin affairs minister ( Pu Hre hin hi tawk lai ah Union cabinet minister si in Central ah minister dang si nak a kawp ) a si lai ah Chin state pumpi ah tlawng phun 4 tiang Falam tong zir tir ding tiin rak tuah tum seh la a ti thei ke maw ka ti.Pu Hrang cun Chin affairs council ah cun in neh ko ding nan parliament ah ka do ding i,a ti thei ding maw si i ti.

Chin ram ah hin common language neih kan duh cio i,zo khal in mai tong si thei seh la kan duh thluh.Kan tong in duh sak lo tu cu Chin mi duh lo ah kan puh aw thluh ko.Hiti a si ruang ah hihi thil tul zet si si thil har sa tuk a si la la.

Tui tum khal ah Chin state ah tong pahnih in tlawng ah pun 2 tiang zirh siseh ti tum a si lawk nan mai tong ciar an run dil tik ah cu cu thuphan ah a cang sal.Kan theih zo vek in Sangaing Chin affairs minister Pu No Than Kap cun Chin minister le MP pawl i President Thein Sein an ton nak ah  tong phun 5 in maw zirh tir nan tum ti a suh nak ah Kawl mi central minister pakhat cun Chin tong neitu phun 2 dang  hman in an tong zirh tir an duh i,cumi pek sak a si tla cun phun 7 a cang ke cu a ti.

Tingaihnak cu a um lo a si mai.Cui ruang ah cun mah te ciar i zuam a tul ta riai.Tlangh ca bom lawng i tanlak in cu tluk a sawt nawn lo.Tuan nak tam pi in a  thlun a tul.

Kan ti thei ding mi pakhat cu,Falam peng le Kale valley i Falam pawl um nak i tlawng pawl i ca an zir ding ah text book tha tha tuah hi a si ding.Tu cu democracy kan si thlang i,kan mai sum le pai i kan tuah tla cun phun 4 tiang khal kan zirh tir kei,cu hman ah subject pakhat lawng si lovin pahnih tal kan zirh tir ding.

Kan peng le Kale valley hman ah tuan ding tam pi kan nei lai.Kan mi le sa,zo an si khal ah tong tha tei thiam lo kan tam tuk.A thiam duh lo cu ziang ti tha,a thiam duh pawl hrang tal i tha tei an thiam nak ding kan ruah sak nasat a tul.Himi ding ah cun ca thiam pawl le sum nei pawl,ram duhdaw tu pawl kan tan tlan thluh a tul.

Ca thiam tam mi phun,theih kau nak nei tam miphun,miphun tang rual kan si cun hnamdang khal in zoh thim tlak le kawm tlak ah in ruat ding.

Tlang tong hi tui hnu kum 30 hman ah kan zate hrang i kan neih thei ngai ngai a harsa ding i,cumi hrang ah cun a tuan tha tha,a thiam tam tam,cawn tlak a si mi mi,tong hman tam bik pawl cu mipi in tlang tong ah an run hril leh ko ding.Mizo thufim ah a ruh no no chhuak ah an ti si maw ti.

 

%d bloggers like this: