Burma Ram Feh Dan Ding Part 09

Burma in Gorbachev a Nei Ve

Chin Doctor Uar Um  Pawl i Thu
Kan Chin ram ah mipi hrang i hna tha rak tuan tu pawl ah kan si bawi doctor pawl hi an rak lang zet.Cui pawl lak i pakhat cu Dr.Ni Khuai hi a si ding.
Lumte khua,Falam peng suak Dr.Ni Khuai hi Rangoon i MBBS a theh hnu ah London ah medical a kai bet i, Fellowshipof Royal College of Surgeon (FRCS ) degree a la.Himi a lak tum 1955 hrawng ah Rangoon khawpi hman ah hi vek ngah mi 10 hman an um lo.Rangoon ah cun um seh la cu a lian ut oh ding.A si nan Pu Ni Khuai cun ka pa in Laimi hrang ah hna na tuan ding i ti a ti i,Falam ah a hung um.Taksa ah nak lam ah a thiam tuk i a hmin a thang zet.Laimi pawl la la in an hek i,hitluk i mitha doctor pa hi Falam khua i kum 14 lai a um hnu ah 1971 ah khan maw si Burma hmundang ah a um.A tar kun zawng ah a nupi mirang nui um nak England ah um in a thi.
 
Saya Thiante ( Thian Nun Thang ) in 2005 ah i sim i,Rangoon ah khalai i thangso bik Laimi pawl cu Matu an si a ti i,an thanso nak hi Dr.Ro Uk ruang ah a si a ti.Dr.Ro Uk hin Matupi khua suahsan duh lovin kum 30 lai a um i,sizung building pawl a sak that thluh man cu thudang,an mah Matu mi pawl ca zuam ding vek i a forh ciam co ruang ah Matu cathiam an tam in doctor zir le engineer zir an tam nasa a ti.
 
Kan mai lam i thansio nak lam i hma rak la tu paklhat cu Dr.Za Hlei thang hi a si ding.A nih hi 1978 hrawng i Tahan a um i sin kan Lai tong thanso nak ding ah tan a la nasa i,Salai M ti group sum tampi cem in a din.Kan lam mi pawl in Tahan ah kan tong an uar phah.A mai kaihhruaia nak in Elbethel kohrhan le biak in tla an din i,a mai tha pek nak le an mah an rinsan nak khal a si i,Lai Rawn Baptist Association (LBA ) tla an din.Hi mi pawl a tawl rel nak ah Dr.Zahlei hin a mai sum tam zet a cem phah i,a tikcu tampi a heu phah.Cui tlun ah mi huat tla a tuar phah.Tui sun i Tahan bazaar i Lai tong a lar nak hi mitampi i tuan rah cu a si i,a lang bik ah cun Dr.Za Hlei Thang i  a si.ding.
 
( Suak leh ah Dr.Sa Sa le Dr.Than Bil Luai pwl )
 
Burma Mikhail Gorbachev a rung lang.
 
Vawi khat cu Delhi ah 2010 kum lai fang hrawng kha a si hmang i,politic zawng i BCRC hall i mi 30 lai kan hmuh khawm awk nak ah rakap uk nak Burma ram thu kan ruah tik ah kan bei a dong thluh.Cumi lak ah kei in Soviet Union tuahtha tu ding i Mikhail Gorbachev a rung um vek in kan nih khal ralbawi pawl lak in Gorbachev kan nei thei ve a si si ti in ka ti.Cutik ah cun Kawl pa Zin Ngiang cu ding i,Burma ralbawi pawl cu an ei ru tlang i,an sual tlang thluh,hi vek lak ah ziang tin saw Burma Gorbachev a rung um thei ding ,a ti.Cu nah cun el nak ding ka thei lo.A si nan tu ah cun rin lo pi in kan ram tuah tha tu ding Gorbachev cu President Thei Sein in a rung suak ti cu a fiang nasa ..
 
Soviet Union i Gorbachev hi 1931 ah a suak i,Pathian a um lo ti Communist ram ah a nu in a nau tet si lai ah baptism a lak tir ti a si.Gorbachev lal hlan ah Soviet Union hi Communist party general secy.Brezhnev in kum 10 tlun a uk i,kum 75 mi lai si in a thi.Himi hnu ah Uri Andropov le Chennanko pawl in kum 2 kum 3 ve ve lai an uk.An nih hi kum 70 tlun si hnu ve ve ah an thi.Hiti kum 5 sung i Soviet Union hi hotu 3 rori kum 70 tlun si hnu ah reilo te lawng ram hruai i an thih thluh ruang ah Soviet Union hotu pawl cun kum  nauta kan hril ding an ti i,kha ti lai i party politburo hman i kum 4 lai lawng rak tuan man kum 54 mi Mikhail Gorbachev cu hotu ah an run hril.Gorbachev hin ram tithat nat ding ah an ram hi a rung thleng thluh ding ti an thei lo.A mah la la khal in hi hlan ah cun thil a tum mi pawl a rak ti lang lem lo men ding.
 
Cu ti vek tho tho in Burma ram i General Thein Sein khalhi President sinak an pek hnu thla 6 men ah hotu pa Gen.Than Shwe i dudh lo mi pawl a run tuah.Cucu domocracy ngai ngai lam hawi i  ram kaih hruai a tum nak le khami hlan hrim hrim i Aung San Suu Kyi tuanpi ding i an rak duh lo mi kha a run tuan pi thu hi a si.
 
%d bloggers like this: