Dr. Run Bik le CT

 Dr Run Bik

Kan Chinmi ih kan mi rinsan le cawn zohthim thlak zetmi lakih pakhat Dr. Run Bik cu Pathian thuthangtha sim ding/ Crusade nei dingin tumtahnak hngetkhoh zet a nei.

Zirnak lam ih upat tlak le hruaitu sinak kenkawh thiam zet ih kan theimi Dr Run Bik in ni 16-02-09, New Delhi ah crusade a nei ding ti a rak theitu mipi thenkhat pawl hrang ahcun mangbang za zet a si.

Asinan, Pathian thuthangtha sim ding ih a rak tum thup zia le Pathian thawn ziangtluk an rak dawr aw timi pawl kimcang zetin CT correspondent pakhat hnenah hmai tawn in a sim a si.  Cui pawl cu a hnuai lam vek in an thu rel an thawk…

 

CT      : A tui na umnak hmun, u nau ziangzat na nei timi pawl in sim thei pei maw?

RB      : Si, a tu hi Delhi ah ka um, ka suahnak  khua cu Cerhmun, Falam peng a si. Ka pai hmin cu Capt.Tai Thio a siih, ka nui hmin cu Pi Far Tlem a si. Ka nu in unau 13 in hring ih, tu ah unau (9) kan dam. Mipa (6) le nu nau (3) kan dam.

 

CT      : Cabu paziat na siar suak zo timi in sim thei pei maw?

RB      : Kawl tong ih nganmi cu siar a ol ih, bu (50) tlun ka siar ding. English in volume (25) tal cu ka siar ta. Jame, Newsweek le India Today Magazine cu siar cawk lo a si ding.

 

CT      : Khual na tlawng sukso theu tikah khawitawk hmun le khua si nuam na tibik mi?

RB      : Singapore hi kan dung kum (35) lai ihsi ka theihcak bik a siih, Singapore hi ka thinlung a lut bik ke.

 

CT      : Kan ram a tha leh sal ding na zum maw? Na zum a si le ziangtik ah?

RB      : Ram thatding beisei in kum (20) lai kan hngah liam zo a si hi. A that ding caan hi ka theih duhbikmi thil pakhat a si ding.

 

CT      : A tthekawdarh aw mi kan Chin mi hrang thucah duh na nei maw?

RB      : Chin/Laimi ah lungrualnak nei tlang sehla teimaknak le diknak in ca zirin hna tuan sehla, Pathian thei ring ring sehla.

 

CT      : Kan Chinmi thuthangtha simthiambik na timi le hlasak thiambik ih na theihmi in sim thei asile, kan lungawi zet ding maw?

RB      : Kan Falam Laimi ahcun Saya Sui Lian Mang hi Pathian thu sim thabik ah ka ruat ding. Hla lam hi cu ka tui lemlo ruangah ka lo sim thei lo.

 

CT      : Insangnu/nupi neih na tum nawn lo maw si?

RB      : Pathian ih rem cang a ti tikah a si kei cu…

 

CT      : Chinmi kan lungrual in na hmu maw?

RB      : Duh vekin kan lungrual lo. Asinan, Manipur le Shan ram um miphun pawl hnak cun kan lung a rual. Lungruallonak kan tuah lo a tul na sa.

 

CT      : Na cabu duhbik in sim thei sehla kan lungawi zet ding, zangfah ten?

RB      : Ka sal ringring mi cu “Gone with the wind” a si. Exodus By Leon Uri’s khal ka duh zet.

 

CT      : Zohthimtlak lawmman tla na la ih zuk le hmawm lam ah  na sup aw zet maw?

RB      : Mizoram ah beer mal tete ka rak in dah, a sinan 1996 ihsin cun Pathian hnenih ka tiamawk vekin ka tep nawn lo.

 

CT      : Kan ram hrangah tuah thei ding na nei ve in na thei aw maw?

RB      : Himi, suhnak hi cu mi dang ih san dingah ka ret ke…

 

CT      : Tui hnu kum (10) ah kan Chin mi ziangtin kan um ding na zum?

RB      : Teimaknak, diknak le Pathian tihzahnak thawi hna kan tuan ahcun Burma lam sung ih thlangpar mi pawl ahcun a langsar lam kan si ka zum.  

 

CT      : Chinmi ih zohthimtlak zetmi pakhat tin mi tam sawn in kan lo thei ih theihkohnak le hruaitu sinak lam ah nasa tak in tan na la ih asinan cumi tlunah thuthangtha phung (crusade) neih na tum hi, mi tampi hrangah mangbang za a si ding in kan ruat, ziang tin…?

RB      : Ka Crusade tuah ding hin mi tampi a ti mangbang ko ding. Hitin ka lo sim ding:- 1999 ahkhan Aizawl South Hlimen Camping ah ka piang thar.

Kum (19) sungah Pathian ruangih ka tuanmi a mal nasa. Kan dung kum (2) le hrek lai ahkhan Pathian hna ziangtin ka tuan ding ti ka ruat phah nasa. Cule, September 2007 ah Evan. Za Lawr tla in Delhi ah Pathian thu a rawng sim ih ka daw zet. A nih hman ka tluk lo ka si hi ka ti aw.

Pathian hmuah ka tlun ih a that that thawn Delhi ka um neitabik lam ah Pathian hna tuan ding ka dap nasa. Nikum 16 December hrawng a si hmang, Pathian ih rem a ti le Saya Lal Nei Thang a rat hlanah crusade tuah sehla ka rak ti.

Thla ka cam. Tawi tete in nikhat ah vei (4) vei (5) thla ka cam rero. Cule, ka tum thawk ihsin thla khat a kim hlan, zarh khatah Pathian hnen ah a rem lo ding le I run kham aw tin zarh khat sung thla ka cam. Cutin DBCF committee meeting ah crusade neih ding cu hreh um ti cingin ka dil ih in rem ti sak.

Crusade cu ni 16-02-09 ah Vikaspuri BCRC Hall ah kan thawk ding a si. Cule Pathian ih rem a ti vivo a sile, March thla cem ah Mizoram ih Chin/Laimi pawl umnak khaw (6) ah crusade ka hawng tuah vivo tum.

 

Note: CT hin kan Chinmi/Laimi lakih cawisan phu zet, harsatnak ruangih cawisan hlawh lo pawl cawi sawm so a tum vivo. Kan Chin calai thatha le rosung lawi pawl cu CT ah ret vivo a si ding. Kan thangthar nonawn, diriamnak sumtualrawn ih cang ding kan hngakhlap zet. Famkim ding zuam ih hna a tuan rero tu,

                                                      

CT

 

(Visited 44 times, 1 visits today)

Comments

comments

One Comment

  1. U parun hi cu,mipakhat cu a va sive.Ca thiam sicingin kuthnatuan a hreh silo,Mizoram a thlen veten,Matphai ah kawpi hmuan a tuah,cuhnu ah Hotel a tuah,tadinca a tuah,mahte dintummi a si tlunah bawmtulmi a bawm,tadinca a tuahlai khalah laksawng a phun phun a rak ngah,a um nak veng VC hrilawknak ah a dinve cun atlingpangding ti phang in mi hrekhatin kawlrammi,kawlram khal ah tlawngta hruaitu a rak sidah titiangih an rak timi a si.A umdan,athiltidan ah kan miphun hrangah zohthin ding mipakhat a si.Tui crusade tuah a tum nak ah thlacam nak thawn bawmciau uh si.

Comments

%d bloggers like this: