Donald Trump USA President 45 nak Ih Hminsinthar Tuahmi 7

-Van Bawi Lian
American ih president 45 nak hrang Donald Trump an hrilnak ihsin leitlun santhuanthu ih thil thleng dah lo mi thil danglam zetzet a suah ter phah. Cumi lak ihsin US santhuanthu ih hminsin thar a tuah mi tamzet lak ihsih cuangmuar zet 7 pawl tarlang hnik sehla..

1 – President Kum Upabik
~~~~~~~~~~~~~~~~~~~
Donald Trump cun kan dungkum June 14 ah a kum 70 suahcam a lawm. A nih hi US santhuanthu ih kum upabik president tuantu a si. Amah sangtu hi Ronald Reagan a siih kum 69 mi siin 1981 ah president a rak tuan.

US president tuantu pawl hi an zate deuh thaw in an kum hi 55 kiangkap vualvel a si. Kum nautabik ih president tuan hminsin neitu cu Theodore Roosevelt a siih a nih hi kum 42 mi a si ah ni 322 sung, 1901 kum ih an ram president William McKinley an thah hnu ih tuantu a si.

2 – Billionaire President Tuan Hmaisabik
~~~~~~~~~~~~~~~~~~~~~
Mr Trump hi US santhuanthu ih millian mangtara turu buru, billionaire president tuan hmaisabiktu a si. A sumpai neih zat an ngan dan hi a bang aw cio lo. Forbes thuthang ih an ngan dan ahcun $3.7bn tluk a si ding tiin an tiih billion 10 lenglo nei dingih an ruah mi pa a si.

US president hlawh khal ka la lo ding titu pa a siih, a rel danvek a si ahcun $1, 2 te lawng daan vekin lak a tum.

3 – Cabinet Milian Bik (Akaihza veng tlangbawi)
~~~~~~~~~~~~~~~~~~~~~~
Trump ih a kaihzaveng tlangbawi, Cabinet minister pawl hmin a tarlang mi zoh tikah milian turu buru pawl lawnglawng an siih, America santhuanthu ih cabinet milianbik an hril kum a si.

4 – Ramthukhel Ih Tontehnak Nei Malbik
~~~~~~~~~~~~~~~~~~~~~~~~
Kum 60 sung, America santhuanthu ih President tuantu, ramthukhel ih tontehnak nei malbik le sinak zianghman neilo ih rampi presient tuan hmaisabik a si.
Amah hlan ih president raktuan ramthukhel ih tontehnak nei malbik hi Dwight Eisenhower a si.

Asinan anih cu 1953 kum president ih an rak hril hlan ah leitlun doawknak pahnih WW II ah Allied Force Supreme Commander a rak tuan dah zo.

5 – White House Ih Rannung Vulh Malbik
~~~~~~~~~~~~~~~~~~~~~~~~~
Donald Trump in rannung vulh mi zianghman a nei lo. Kan dung lai deuh ah uite vulh a tum tivek thawm a um ruri nan a vulh ngaingai lo.

Ahlan ih president rak tuan zotu zaten ran vulh mi an nei thluh. President pawl ih rannung kilkhawinak ih an hminsin dan ahcun rannung danglam zetzet pawl an vulh tluh.

6 – Pursumnak Man Peklo Ding Duhlotu
~~~~~~~~~~~~~~~~~~~~~~
Trump hin US pursumnak le hnatuannak pawl hi China in in tisiattuk, curuangah kan ram ih an thiltuah mi le an kuat mi pawl hi tax 12% ka kuan ter ding tiin mipi sawmngiarnak a tuah laiah a rak au pi.

Culawng siloin Canada, US le Mexcia ram pawl karlak ih, pakhat le pakhat thilzuar kuatnak lamih sumpai lakawk lo ding lungkimnak thu khal zohfelnak neih sal dingin a rak hringhro.

7. Nupi Cungmuar
~~~~~~~~~~~~~
Melania Trump hi English tong hmanglo president nupi, Slovenia ram ihsin White House ih um hmaisabik a siih taklawng ih zuk um hmaisabik khal a si. Ramleng ih suak white house ih um president nupi hmaisabik cu US President paruknak John Quincy Adams (1825-1829) ih Louisa Adam a si.

Mr Trump hin nupi pahnih a mak zo. Curuangah Melania hi president ih nupi pathumnak white house ih thleng hmaisabik a si lala. US santhuanthu ih nupi rak mak dahtu cu Ronald Reagan asiih a nupi, lemcangthiam nu hmeltha Jane Wyman a rak mak. Asinan a nih khal rampi hotu lu a si hlan ih a rak mak mi a si.

Melania hin Slovenian, English, French, German, le Serbian pawl a tongthiam tluh ih FLOTUS (President nupi kawhnak – First Lady titla in an ko) lakih tong dangdang thiam tambik nu cuangmuar white house ih thleng hmaisabik a si.

– BBC, Time, Foxnews

 

Comments

comments

Comments

%d bloggers like this: