Donald Trump Hi Ziang Ruangah USA Mipi In An Hriltling!!

14925441_1270360016361374_3862347658475902308_n

-Salai V Bawi Lian

Leitlun rampi hotulu hrilawknak ih sunglawibik le ropibik USA rampi hrilawknak ah USA president a vei 45 nak hrang Donald Trump cu hriltlin a si. USA mipi a cok mangbang zet ih leitlun thlirtu mipi pawl khal a ti mangbang zet. Mi thiam sang pawl ih rak thlirsungnak pawl le zum banlo in Doanald Trump hi a cang ih USA rampi president hrilawknak khawvel a ti danglam thluh. Ziang Ruangah USA mipi pawl in Donald Trump hi an hril a si pei! USA ramkhel thu thlirthiam le zohsunglawknak tuahtu pawl in tam zet an ngan. Cumi lak ih langsar deuh pawl mallai vawn ngan lang sehla.

A thuken mi hi pakhatnak ih tel mi cu a si. ‘America Ti Ropi Sal Dingin’ (Make America Great Again) timi a si. A thuken mi hi mipi a neh zetnak pakhat cu, USA ram hi a ropi zet tiih theih ringring mi asinan santhar mipi pawl thinlung ah khuahlan ih an ropitnak pawl an kenghnget thein awn lo tiih ruahawknak nasa zet a um ih cumi pawl nehsalnak ding hrangah mi ropi zawlnei kamsang pawl ih an phuan mi pa a si tiih rak ruattu an tam zet. Mipi pawl in an rampi hi lamzin diklo lam panin a feh rero tiih rak seherhtu, a ram mipi hnatuan neilo pawl hrang ih a tumtahnak le a ram sung ih raltlan vailuttu pawl zohsalnak neih ding mi pawl, siahpeknak thu le, rampi khamtu ding cangdawl saknak ding thu pawl khal a thupi ken mi sungah a funkhawm thiam thluh.

President si dingih a puanawk veten leitlun mipi pawl ih ngaihsak a hlawhcih. Ziangah tile hipa hi ramkhel thu theimi asilo tiin soiselnak nangai te a tuar cih. Asinan a tumpi zaten a neh thluh ih an party Republican President hrilsung mi ah a tling tar riai mai.

Mipi hnen ih sawmnak an tuah laiah a ramsung ih mipi pawl ih tul mi theifiang biktu a si tiin a au theu cumi cun America mi (White Folks) pawl thinlung a la zet ti a fiang. Cumi ruangah zatek 62% rori in an vote rori. Mipi men siloin a state hi a thei fiang zet. State tuum le fate khawi tawk ah ka feh ding tih zo pawl hnenah ka sawmnak ka tuah ding hi a thei fiang zet. Arizona, Florida, North Carolina, Ohio le Virginia pawl hi American rampi hotulu hrilawknak ih rel hlawh bik mi an si theu. Ziangah tile an ni pawl hi party fumfe ih hngat aw mi ansilo. Trump cun hi pawl a thei fiang zet ih nasa ngaiten pumpe awin himi pawl a sawm. A netnak ahcun Virgina lo hmuah ahcun nehnak a ngah. A ropi a si.

A tumpi Hillary hi a neh ve hrimhrim. Thildang tampi in Hillary hi a ti hriam ciamco lemlo. Asinan a tihrimnak zawnte ah Hillary ih tuartheinak phaw tlang ko in a kap ngah thei. Hillary Clinton ih thlinlonak ding zawnte tiih a theihfiang mi thawn; Crooked Hillary tiin a tiih rinsantlaklo, mai nawmnak hawl, mipi hrang zawn ruat ngaingailo tiin a ti. Cun a tumpi Hillary ih mail thubuai thu ah thawngkhum tlak misual a si tin a ti. Hillary in bulpak in a tuar theilo zet ih vei tampi an tihrimawknak ah a tongsual ngah. Hillary in bulbak thu ahcun ka ti nawn lo ding tiin a ti rero nan, an hrilawknak ding ni thlenhlan zarhkhat duh lai tiang kha cu a tuartheilo ruangah a hei dolet sal ngah lala pang. Nunau tiah a thu a thin hnuaihni ti lam zawng in a rak ti bet ih, USA ih nunau hmuhsuamtu timi ah USA rampi mipa pawl ih vote thlak tambik kum a tisuah phah ter.

Ram khel lam thiam mi a silo nan USA mipi a theifiang. Donald Trump hi ramkhel lam ih thiamsang cu a silo. Asinan USA mipi pawl a theifiang zet ih ramkhel thu zirsang le thiamsang pawlih an zirsung mi pawl hnak in tampi a rak theih khelh. Mipi pawl hnen ih campaign an tuahnak ah mipi hminsin dingin thu hla a tuah thiam ih a mah lam thluntu an pung vivo. Vote an thlak hlanih thlirsung nakah achun a Hillary Clinton in a rak neh. Asinan mipi pawl ih vote an thlak ngaingai ahcun Donald Trump in a nuai neknek.

Hi tiih Donald Trump ih USA ram hotu lubik ih hril a si tikah Leitlun mipi pawl ih thuruahnak khal a titam zet. A lalnak ihsin a thleng aw thei ding tiih an ruah mi hrekkhat pawl tla cu, The North Atlantic Treaty Organization) NATO thuneihnak, Russia thawi an laicinawknak, Asia ram ih nuclear tuahnak ding thu pawl an tel. Ziangvek in leitlun a thleng ding ticu theih a silo. Asinan Trump in USA mipi pawl ih thinlung a la zet ih mipi pawl ih rinsan a sinak in America a ti ropi sal ding cu a hnatuan ropi bik a si ding.

Nehnak an co tiih a fiang veten, New York ih mipi hmaiah thusimnak a neiih a thusimmi lakih uar um za a si mi cu, USA mipi pawl hmuahmuah ih hotulu ka si ding, theih hngilh mi pawl khal theihsal an si ding. USA hi ram ropi ah kan tuah sal ding a ti.

Ziang khal a sile Trump in kum 4 sung USA ah hotulu a tuan dingih USA rampi ih a hmakhawthlir cu ziangtak bang kei maw! Thlir peh vivo cio uh si. Hmaikum January 20 ah White House a luah ding.#

(Visited 215 times, 1 visits today)

Comments

comments

Comments

%d bloggers like this: