Dodaltu Hrangih Thlacam

December 11

Zarhte Ni

Dodaltu Hrangih Thlacam

Siar:

Johan 19:1-5

Nan raal pawl duhdaw uhla a lo hremtu pawl hrangah thlacam uh.

– Matthai 5:44

Kumkhat Sung Baibal:

–          Hosea 5-8

–          Thuphuan 2

Bible Tlawng ih tlawngta thar ka silai ah Bawipai’ hrangih ttong dingah ka raal a ttha. Ka mizia thar in mi hrekkhat thawn hau awknak a suahter cu mangbang ding a um lo. Phunhra tlawng ka kailai ih ka rualpi hlun pawl thawn pawlkomnak kan neihlai ah khuitawk ah kumkhua caan ka hman ding ti thu tetttikhannak ka neihmi fala note pakhat in i hnihsan. Ed timi ka zumnak a theitu rualpi pakhat in, “Thinglamtah hlun hrangah lungawinak pathum,” tiah capoh a tuah tikah nautat le hnon tuar in ka thei aw.

Asinan cuih zaanlam tlai deuhlam ahcun sim fiang thei lomi duhdawtnak thawn khat in ka thei aw. Kan Bawipai’ thupek, “Nan raal pawl duhdaw uhla a lo hremtu pawl hrangah thlacam uh,” (Matt. 5:44) a timi vun mang saal in Khrih thinglamtah a zawmtaitu Ed hrangah thla ka cam. Mitthli thawn, Ed rundam dingin Bawipa hnenah ka dil.

Kum khat hnu ah Ed hnen ihsin rin lopi in ton awk a duh thu cakuat ka ngah. Kan ton awk tikah a sualnak ruangah ziangtluk a ttah thu i sim ih Jesuh cu Rundamtu le Bawi ah a cohlang. Ed cu Brazil ram ih missionary a si thu netalam ih ka theih tikah ka mang a bang nasa. Ka zir ngahmi cu, thlaraulam in dodaltu parah a tthabikmi lehrulnak cu thlacam saknak a si. Tuni ah na zumnak a lo soiseltu hrangah thlacam sak a ttul maw?   – Dennis Fisher

Bawipa, mi lehrul lo dingin in bawm aw,

Nangmah a lo huatu le a lo dungtuntu pawl;

Cu ai-ah duhdaw ding le thlacam sak thei dingin in bawm aw,

Ni khatkhat ah thudik an cohlan theinak dingah. – Sper

Mi pawl in kan thusimmi ziang an siar lo men ding;

asinan kan thlacamnak cu khamsak theinak an nei lo.

(Visited 26 times, 1 visits today)

Comments

comments

Comments

%d bloggers like this: