Desert Pete

Siar:  Suahlannak 17:1-7

Ziangahtile amah in a rak theih vekin kannih khal in kan thei ve zo. Sikhalsehla thuthangttha an theihmi cu an hrangah tthathnemnak zianghman a um lo. Ziangahtile a theih lawng an thei ih zumnak thawn an pom duh lo. – Hebru 4:2

Kumkhat sung Baibal: – Haggai 1-2 – Thufim 28:1-14

1960 lai ah Kingston Trio in “Desert Pete” timi hla an suah. Cuih hla ahcun nelrawn sungih a ti a haalzet mi cawkhal pa pakhat in kut ih ti pamnak cet Desert Pete a tong. Ca tawite an nganmi cu: “tipamnak dingah pumb sungah than aw,” ti a si.

Cawkhal pa cun khuat sungih tidai cu in a hiarzet nain ca tawite nganmi ih sim vekin a tuah hmaisa. Thungai man cu diriamzet in a daizetmi tidai a in ngah. Thungai lo taa bang sehla tihlum khuat khat lawng a in ngah ding.

Israelmi pawl nelrawn ih an fehlai ah an ti a haalzet ih Moses in Bawipa hnenah a dil. Pathian in Horeb lungto kha a kianghrol thawn vuak dingin a fial. Moses in Bawipa ih thu a ngai ruangah lungto sungin tidai a put (Suah. 17:1-7).

Sihmansehla Israelmi pawl in Moses ih zumnak hi an cawng paih ringring lo. “Thuthangttha an theihmi cu an hrangah tthathnemnak zianghman a um lo. Ziangahtile a theih lawng an thei ih zumnak thawn an pom duh lo” (Heb. 4:2).

Nunnak hi nelrawn ramcaar vek sihmansehla Pathian in kan thlarau tihaalnak a riamter thei. Zumnak hngetkhoh le rinnak taktak thawn Pathian thu kan zum ahcun nitin kan ttulmi zaangfahnak tinung cu kan in ngah ding.

A thukzetmi Pathian ih tthatnak le rin umnak kha in aw,

Rinhelhnak le thlaphannak nei lo tein;

A Thu cu a dikmi le a thianghlimmi nunnak tinung a si,

Thazaang thar, thindaihnak le in kholhfaitu a si.

Nunnak tinung Jesuh lawngin Pathian kan halnak di a riamter thei.

Comments

comments

Comments

%d bloggers like this: