Democracy Part-5

DEMOCRACY
PART-5

THANG LIAN MUNG

A Lettu Ih Part-5 Nak Thawn Pehpar In Thuhmaihruai

Leitlun ih uknak thuhla simrelruah tinten democracy hi telh lo theih lo cu a si. Leitlun mipi theih larbik le duhtu tambik a si. Cumi democracy khal a tlangpi in pathum in then a si thu khal kan thei zo ih cumi pathum sung ihsin direct democracy hi democracy hmaisabik a si. Direct democracy ih a thawhkehnak thuhla hi tawifamkim in himi part-5 nak sungah a um. A thoktu pawl cu Greek pawl an si ih Athen khawlipi ih a ummi pawl a hleice an si. Ram thuhla thawn pehpar in mipi tonkhawm ih thurelkhawmnak pawl cu an tuah. Cuvek thurelkhawmnak cu kumkhat ah vei 40 lai an tuah theu. A rasuaktu mipi pawl khal an tam ih 500 lai a si tikah tusan ahcun zum a har nasa ding. ‘A si ngaingai pei maw?’ ti ding khi a si. Asinan direct democracy an hmang ngaingai dah zo a si ti cu leitlun santhuanthu sungah ngankhum rori cu a si. Kan ram ahkhin hlan Greek pawl vekin mipi tampi thawngtel in hmunkhat ah tokhawmnak pawl cu a um ringring nan direct democracy thawngin siloin lo theih lo ih fialmi le aanaa ih hruaikhawmmi sawn a si theu. Mipi duhdaan relkhawm tla cu a hlatuk ih a hruaikhawmtu pawlih duhdaan le policy ngaithlanak pawl sawn a si riangri theu. Hlanlai kan Chin ram khalah direct democracy feh daan in thil a thleng danglammi pawl kan hmu thei. Atu fangih leitlun ih kan zohthimmi democracy  pawl hi aiawh thlah democracy deuh khi a si. Asinan mipi mithmuh in cun thenhrannak a um lo tla a si men thei a si. Ziangah tile democracy ti rori ih a hmin pakhat lawng zoh in a sinak ziangziang pawl cu a thupi lo titu tla kan um men thei ruangah a si. Cumi pawl ruahnak phorhsuah sal ding a si ahcun hlan Greek pawlih direct democracy an hmansuak daan le an hminthannak asan pawl hi theih ta a tul ding a si. Himi part-5 nak sungah cuih thu pawl cu a um a si.

1:3 Direct Democracy A Simi Greek Democracy

Direct democracy thawn pehpar in thuhla a dikzetmi le zohthim dingmi ahcun hlan kum zabi 4 BC hrawngih Athen khawlipi ih mipi pawl hi a si. Cumi cu a hmaisabik ih mi zapi tel theimi le a thiangzetmi ah kan ruat thei. Cucu mipi ih direct uk-awknak cekci a si ih thupi hlapi thu relcat tinten mipi tokhawm ih ruahta tengteng mi a si. Mipi pumkhawmnak (Assembly asilole Ecclesia) cu ramsung mipi zate thawn a pehpar ih cuih pumkhawmnak pawlah thupi hlapi hmuahhmuah relcat theumi a si. Hlan Athen khawlipi ahcun cuvek mipi pumkhawm thuruah tlangnak hi kumkhat ah a malbik vei 40 lai tuah ringring a si ih cuvek caan hrangah thuhla burkhawm hmaisa ta a si theu. Cawl bang lo-in ramsung hnatuantu pawlin thuhla thehluh ding thu an than ih reltlang dingmi thuhla pawl lak ihsin a thupi deuhdeuh mi pawl cu an hrilsuah theu. Cuticun mipi tampi a telmi thu ruahkhawmnak cu mi zapi thawn a remcang ter theu a si. Asinan cumi thuhla relkhawmnak ah rikhiah le merkawimi a um lo ruangah a rasuaktu mi senpi cun cipciarzet in an reltlang thei a si. Curuangah mi senpi in ram thuhla ah an theihnak a kauh sinsin ih, cule cuvek pumkhawmnak pawlah vei tampi an tel ruangah thuhla felfaiten thehsuak theinak dingih thiamnak khal cu mipi in an ngah phah a si. Council veikhat ahhin mipi 500 lai an tel theu ih thu relcat theinak ah thuruah thiammi committee cakzet 50 hrawngin cui council pawl hrangah thu le hla an suahpi ih thu le hla an bur theu.

1.3.1 Athen Mipi Pawlih Democracy: An Hminthannak Asan

Athen mipi pawlin ziangtin an tuah timi hi hminsin tlak ngaingai cu a si. Athen khawmi pawlin ramsung mi zate in vote ih tel theinak ram uk daan thuthar an suahpi ti cu kan theih a tul a si. Ramsung um mipi pawlin tuah keelmi meeting pawl le thu ruahkhawmnak pawl lawngah siloin mipi tampi in mipi thuhla relcat ding tikah sanlet, relleet ve le rel, le san theinak pawl khuan pek a si. A ngaingai ahcun cuvek ramsung mipi cu sinak , lennak le mipi lakih an tel ve daan, an thatho daan pawl khal a dang cio a si. Mipi in thiltitheinak zate a nei. Cucu tuahkeel ding daan le thuthen theinak pawl tiangin a si. Athen khawmi pawlih ruah daan ahcun rampi thuhla ah mipi in direct rori in a tel ve thei ti hi a si.

Athen khawmi pawlih democracy hi ramsung mipi pawlih thatnak dingah hramtohmi a si. Cuih democracy cun khawpi pawl ukawknak le pumpaak pakhat fingfing ih hlawktlangnak an nei cio a si tiin an khih ih an rel theumi a si. Fiang deuh in rel ahcun, mipi le pumpaak karlak ah thenhrannak a um lo-ih pumpaak pakhat cio in mahte rimngam-aw in tuahsuak diriamnak thawn man neizet in nung/ um/ khawsa thei a si. Mai pumpaak ihsin thok in kau deuh in khawpi mipi hnenah thlen so cu a si. Tahthimnak ah mi senpi in rights(canvo) le tonkhawmtheinak a nei nan pumpaak zawngin a si lo-ih ram thuhla thawn pehparmi midang tampi thawn sawn a si. Cucu mipi ih rights(canco) le thatnak tepmi pawl hi khawpi asilole rampi sungah lawng a cangtheimi a si. Cun Robert Dahl ih nganmi pakhat cu, “Greek pawlih democracy hmuhdaan cu ram ukdaan thuhla(politics) hi mi senpi ih tuahthatnak ah a bun-aw keelmi a si ih kan nuntu khawsak daan leng ih a ummi a si hrimhrim lo. Then tla then a theih lo. Ram uknak thuhla ah pumpaak pakhat cio ih telvenak  sawn hi kauh ter sawn ding cu a si,” (Dahl, 1989:18) tiin a ngan. Cun Athen khawmi pawl cun “zalen le a langmi (hmuhtheihmi) ram thuhla politic zuamkhawmnak hi an zum ih mipi thansoh ter in le thiamzet in zapi thatnak hrang phorhsuah pi ding hi an hmuitinmi a si. Cun dingfelnak cu himdaihnak le mipi in mai ti dingmi theifiangnak le ram/ khawpi dinhmun hngetkhohnak pawl a si.(Held, 1987:18)

Hminsin: Part-6 nak pehsal leh ding.

(Visited 41 times, 1 visits today)

Comments

comments

Comments

%d bloggers like this: