Democracy

DEMOCRACY

Part-6

Thang Lian Mung

Part-5 Nak Thawn Pehpar Ih Thuhmaihruai

democracyA hmaisa ah hi Democracy cahram a peh vivo lonak caan a sau ih ruangah tlamtlinglonak parah ngaithiam ka dil duh. Ahlan ih ca, part 1 ihsin, pawl kan zohsal ahcun Direct Democracy thuhla a thawhkehnak pawl kan hmu ding. Cun atu ih part-6 nak ahcun Direct Democracy a takih a  hmangtu Athen khawmi pawl lakih mifim tiih hmingthang Aristotle ih cabu hmingthang ‘The Politics’ timi cabu thu kan zohtlang ding.

A cui cabu sungthu muril siloin a cabu sidan sawn hi kan zohtlang dingmi a si. Himi ‘The Politics’ cabu thawn pehpar in kannih Chin mi lak khalah politiclam cabu thatha kan ngan thei ding a thupi ih, private pakhat lawngih tanlak thei lo hmanah politiclam party pa khatkhat in si maw sponsor in cangantu pawlih ngancia tal cu suah thei sehla a thazet ding ti’n ka ruat.

Sim nolh ka duhmi cu  hi part 6 nak ahhin Aristotle ih cabupi cu hliakhlai ding a si loih, a sungthu tawite zohduaknak menmen a si. Political Science zirtu tlawngta pawlin hi hnakin cipciar deuh in an zir. Kan kiangkap ah a um ahcun, Aristotle ih  nganmi ‘The Politics’ cu siar ding a duhum zetmi cabu pakhat a si.

1. 3.2 Aristotle Ih ‘The Politics’

Ram uknak thuhla cipciarzet le zohthim tlakzet a simi cu, hlanlai Greek philosopher hminthang a simi Aristotle ih a laar ngaingai mi ‘The Politics’ cabu hi a si. Hi cabu hi Aristotle in BC 335 le 323 karlak ah a nganmi a si.

Cui cabu sungah zalennak le bangrannak hi pakhat le pakhat a pehzom-aw a si. Mi pakhat ih  nuncan khawsaknak a tel lo ahcun a dang pawlin tuahsuaksak thei ding cun a har hrih. Cun zalennak parah tahfung pahnih a um ih, cu pawl cu; a) Midang kan uknak le midang ih in uknak, b) Duhhrilmi bangawk ih umtlangnak, pawl an si. Mi pa khatkhat in acozah ih a kimcang zetmi thumuril kha tahfung hmaisa hmangin tah sehla, cucu ramsung mi hmuahhmuah hi an bangranawk thluh tengteng ding a si.

Numerical equality a um lo ahcun mi tamsawn ih duhmi ukawknak a suak thei lo. Hi tawkih numerical equality timi cu ramuknak daan thawn pehpar ih theithiamnak cu zo hnen khalah bangranten simzirh hi a si. Hlanhlai democracy hmangtu pawl cun numerical equality in  nehnak a co ding tiin an pom. Ziangahtile a) Ramsung mi pawlin acozah lakih an telnak kha an tuah dingih, cuticun anmah in politic ramthuhla lamih an telvenak in mi thupi ah an cang ding a si, Cun b) Ramsung mi pawl cun mai duhmi vote pek theinak huham an nei. Cule c) Daan vekin zozo khalin zung hnatuan theinak caantha bangranten an nei.

Himi ihsin kan theithiam dan bet sehla, cuvek bangrannak cu zalennak a taktak ih hmannak tlunah hram a bun ih, cucu thinlung muril (moral) tlunih hrambunmi khal a si. Aristotle ih ruahdan democracy cu direct democracy a siih, cuih sungah zalennak cu hlon theih loin a telh ih, cuih zalennak sungah hlon theih loin, bangrantlang thluhnak khal a telhcih a si.

Hminsin : Part- 6 nak pehleh ding.

Comments

comments

Comments

%d bloggers like this: