Democracy

DEMOCRACY

PART-II

THANG LIAN MUNG

A Lettu Ih Part-II Thawn Pehpar In Thuhmaihruai

Himi part 2 nak ahhin direct democracy thuhla simfaingnak thuhmaihruai a um ih cumi cu direct democracy ih asan le a tican pawl a simfiang a si. Cumi theh ah direct democracy ih asan a phunphun pawl khal cipciarzet in simfiang a si. Himi direct democracy thu hi a ra lai dingmi part pawl khalah simfiangbet vivo ding a si. Hivek in direct democracy thuhla kan thei ih a dang deuhmi democracy pawl khal kan theibet ding. Cuticun kan Chin mi pawlin democracy uk-awkdaan cu kan neel vivo dingih kan theihnak ihsin a takih thathnem pinak ah kan canter leh ding cu a si.

BUNG-1

DIRECT LE TEL VE THLUH DEMOCRACY
(Direct and Participatory Democracy)

1:1 Thuhmaihruai
Democracy Ih Asan

Democracy hi acozah ukawkdaan phunkhat a si ih a famkim tiih ruahmi pakhat a si. Cun duhnak thu nasazet le sinak tahfung pakhat khal a si. Democracy ih a thupibik hramthoknak cu mah le mah ukawknak a si. Democracy timi tongfang ih hrampi cu hlanlai Greece pawlih san ah kir in zingzoi sal a theih. Democracy timi tongfang hi Greek tongfang ‘demokratia’ ihsin a rasuakmi a si ih a tican cu mipi ih uknak, thuneihnak, a si. A tongfang nganmi vek cekci ahcun uktu le ukmi karlak ih thentheknak hi a cang thei lomi a si ti hi a si. Cun democracy ih mi thinlung a lakzetnak pakhat cu, communism le socialism timi tongfang pawl hi Marxism sungah a hram a bun-aw ih a thuhla cipciarzet in kan hmu thei vekin, democracy cu cuvekin kan hmu thei ve loih thupom hrampi le a khuaruah daan khal a umcia lonak hi a si. A ngaingai ahcun democracy hi Nitlaknak lam pawlih nuntukhawsak daan a thangso zawngih phorhsermi cu a si.

Curuangah democracy hi thaten zohfel ta loih fehsuah pimi tla a si theu. Cun santhuanthu sungih democracy kan zoh tikah a ol lo le a kawkalhmi , le dokalh-awknak pawl thawn thu le hla a hnok deuh sawn ringring a si. Hiti ih thuhla a hnoknak san cu, “Democracy hi tuni tusun khalah a thathozetmi le a nung ih a alh rero mi santhuanthu pakhat a si,” ruangah a si. Cun, “Democracy thawn pehpar ih thuhla pawl khal a hnok theu,” ruangah a si hrih. Asinan democracy cu hngetzet in a dingih a hum-aw thei ringring a si. Ziangahtile democracy ih a manneihnak asilole hlawhtlinnak pawl a simi bangrantlangnak, zalennak, mah le mah nuncan ziaza thansoh awkternak, mi zapi ih hman hiarmi sinak, pumpaak ih hman hiarmi sinak le mi senpi umtu khawsaknak ih thahnempinak, tvp. sungin pakhat asilole tuahsuak theimi pawl ruangah hum-aw thei in le kilhim-aw thei in him takin a ding thei a si.

2:1.1 Democracy Ih Asan A Phunphun

“Democracy timi tongfang thawn pehpar in asan tampi a um. A hrekkhat pawl cu a hnuailam ah kan tarlang ding.
i) Mipi in direct ih uknak le thuneihnak thawn a dingmi acozah phunkhat.
ii) Milai umtu khawsaknak ah sinak sang le niam par le mithmai nei le thil ngahtheinak pawl par hnakin a bangranmi tikcu caantha le pumpaak manhlutnak pawl parih hram a bun-aw mi ukawknak phunkhat.
iii) Mipi tamsawn lungkimnak thupit ter in thu relcatnak le cumi thu relcatmi parih a thum-awmi acozah.
iv) Mipum mal sawn miphun pawl hrangah ruatin cu pawlih covo zohthat saknak le mipum tam sawn miphun pawlih huham tlun khalah a cekfelmi uknak.
v) Mi zapi in an duhmi vote an pektheinak dingah mipi theih ih zuamawk theinak khuan a pektu acozah.
vi) Mipi lakih ram thuhlalam ah tel dingin zianghman a ruat ve lotu le a paih ve lotu pawl hrang khalah humhim le tuamhlawm ih tuanvo laak ih tuan sak a simi acozah ukdaan.
vii) Ukmi mipi pawlih lungkimmi acozah ukdaan.

Hminsin: Part-III nak peh sal ding

(Visited 47 times, 1 visits today)

Comments

comments

One Comment

  1. Thang Lian Mung says:

    Remsalnak
    “2:1.1 Democracy ih asan a phunphun” timi hi 1:1.1 sawn a si.
    Cangantu,
    Thang Lian Mung

Comments

%d bloggers like this: