Delhi Commonwealth Games 2010

By Dr. Run Bik | New Delhi

Commonwealth Games a suah daan hi hitin a si. Kum 1930 lai kha Britian ih leitlun then 4 then i thenkhat a rak uklai ah himi games hi British Commonwealth Games tiin Canada ih Hamilton khua ah an rak nei.

1947 khan India cu independence a ngah ih, asinan Britian thawn pehzawmawk an neih ruangah British ti kha hlawn in Commonwealth an run ti, cumi hnu ah Commonwealth Summit ti le Commonwealth Games ti hi a rung suaknak a si. Kum 2014 ah Common-wealth Games hi Scothland (UK) ram khawpi Glasgow ah an nei ding. Kum 2006 ah Australia, Melbourn ah an rak nei.

Kum 4 i vawi 1 neih theu mi Common-wealth Games cu India ram khawpi, New Delhi ah United Kingdom ram ih siangpahrang bawinu Elizebeth ih fapa Prince Charles in a ong. A onnak hmun hi mi 60,000 tlemnak Jewaharlal Nehru stadium ah a si. A onnak hi India President Phrabati Patil in a bom. India hin hi lehawknak hi thleng dingin kum 2003 ihsin khan a rak pom cia. Himi games ahhin team 71 an tel thei asinan a ram zawng cun ram 62 lai an si.

Hitivek ruangah a si. Thuthimnak ah United Kingdom ram cu ram pakhat lawng an si na’n team 4 in an tel. Cucu England, Scothland, Wales le Northern Ireland ti in an si. Himi ruangah tuihtum games ahhin fiangzet ih No.2 si ding kha No.3 an si phah. Himi thu cu kan ngan leh ding.

India in himi games a rak laklai 2003 ahkhan Rupees million 7000 lai lawng cem dingah a rak ring na’n an tuah taktak tikah Rs. Million 350000 an cem ta riai. Himi hi kum 7 sungih thil man a kaituk ruangah a si na’n a dang leh cu thil tuah ding an run neih tam ruang khalah a si. Cuih tlun ah a poizet mi cu sum ei-ruknak (corruption) ruangah tla si.

A poi nasa. Hihi tuih hnu games an run theh hnu ah an run zingzawi aw ih India ram hrangah a ningzah thlakzet. Games hi an thokhlan ah India cun medal 100 la in a pahnihnak kan la ding an ti ih, an ti vekin a run si cekci. A tawp ah India cun Gold 38, Silver 27 le Bronze 36, Total 101 a hmu. A tir ihsin Australia cu a rak ngam lo cia.

Leknak ih an Medal an ngahmi pawl

Country Gold Silver Bronze Total

AUSTRALIA 74     55    48            177

INDIA 38     27     36    101

ENGLAND 37     59     46    142

CANADA 26     17     32    75

S.AFRICA 12     11     10    33

KENYA 12     11     9      32

MALAYSIA 12     10     13    35

SINGAPORE 11     11    9  31

NIGERIA 11     10     14    35

Himi kan zoh tikah  England cun total medal ah 142 a ngah nan medal total i 101 ngah India a hleihnak cu Gold Medal hi India ih pakhat a ngah tam deuh ruangah a si. India i gold medal a ngah netabik cu badminton ah leitlun nunau i thiam bik Saina Nehwal ih Malaysia nu Mew Choo Wong cu women single badminton final ih a neh ruangah a si.  Cule United Kingdom ih tel Scotland cun Gold 6 a hmu ih, Wales cun gold 1 a hmu ve. An zate kom sisehla cu India an hleih nasa.

United Kingdom timi ah England, Scothland, Wales le Northern Ireland an tel ih Great Britian an ti cun England, Scothland le Wales pawl hi an si ding. Olympic khalah annih ram cu team 4 in an tel thei. World Cup Football khalah team 4 in an tel thei. An van nei hleice kan ti ke maw an then-awk ruangih an si ding vek ih an si lo hi an van sia kan ti ke maw.

India i gold a rak ngah tamnak hi meithal kah le buanawk i gold 20 lai an ngah ruangah a si. Tuihtum cu hockey khalah India an thleng sangzet. Final ah Australia thawn an lek aw ih, Australia lak ahcun 7-1 in a cak ta lo. 2008 Beijing Olympic ahkhan cun India hockey team hi olympic ih tel ban ram 16 hman ah an tel thei lo a si. Tuih November thla ah China ram Guangzhou khawpi ah Asian Games an nei ding.

India hi hitawk ah medal 60 tal an ngah thei ahcun a vanneizet ding ti a si. Asian Games ahcun China, Japan le Korea ram pahnih pawl an tel ding ruangah Asian Games hi Commonwealth Games hnakin sang ih ruah a si. 2010 CWG cu October 15 ni ah sunglaizet in a theh suak thei.

Comments

comments

One Comment

  1. Saithantluanga Tuallawt says:

    2010 Commonwealth Games XIX Delhi an thehnak thla khat kim zik te ah cancin siar ding kan nei thei ih a lungawi um nasa. Zoin si rak ngan ding ti hi ka rak thlir rero mi a si ih Pu Run in a rawn ngan ih lungawi um nasa. Mal lai hun bet ve sela.

    Kum 1911 ih ” Festival of Empire” ihsin rak thawk mi a si. Kum 1930 ah ” British Empire Games ” tin a hmin an vuah ih Canada ram Hamilton khua ih neih hmaisa bik a si. Kum 1934 ah London, 1938 ah Sydney, ( 1942-1946 WWII), 1950 ah Aukland, kum 1954 ah ” British Empire Games” cu ” British Empire and Commonwealth Games ” tin an thleng ih Canada ram Vancouver khua ah an tuah, kum 1958 ah Wales khawpi Cardiff ah an nei, kum 1962 ah Australia khawpi Perth ah an nei, kum 1966 ah ” Brithish Empire and Commonwealth Games ” cu ” British Commonwealth Games ” tin an thleng sal ih Jamaica khuapi, Kingston ah an nei, kum 1970 ah Scotland khawpi Edinburgh ah an nei, kum 1974 ah New Zealand khawpi Christchurch ah an nei, kum 1978 ihsin ” British Commonwealth Games ” cu ” Commonwealth Games ” tin an thleng sal ih Canada ram Edmonton khua ah an tuah sal, Cui sin 1982 ah Brisbane, 1986 ah Edinburgh, 1990 ah Aucland, 1994 ah Victoria, 1998 ah Kula lampur, 2002 ah Manchester, 2006 ah Melbourne, 2010 ah New Delhi (1930 ih sin a vawi 19 nak a si).

    Ram tel hi ram 71 cekci an si ih a hnuai lam vek hin a si.

    Africa
    Botswana, Cameroon, Ghana, Kenya, Lesotho, Malawi, Mauritius, Mozambique, Namibia, Nigeria, Seychelles, Sierra Leone, South Africa, Swaziland, Tanzania, The Gambia, Uganda, Zambia

    Americas
    Belize, Bermuda, Canada, Falkland Islands, Guyana, St Helena

    Asia
    Bangladesh, Brunei, India, Malaysia, Maldives, Pakistan, Singapore, Sri Lanka

    Caribbean
    Anguilla, Antigua and Barbuda, Bahamas, Barbados, British Virgin Islands, Cayman Islands, Dominica, Grenada, Jamaica, Montserrat, St Kitts and Nevis, St Lucia, St Vincent and The Grenadines, Trinidad and Tobago, Turks and Caicos Islands

    Europe
    England, Cyprus, Gibraltar, Guernsey, Isle of Man, Jersey, Malta, Northern Ireland, Scotland, Wales

    Oceania
    Australia, Cook Islands, Fiji, Kiribati, Nauru, New Zealand, Niue, Norfolk Island, Papua New Guinea, Samoa, Solomon Islands, Tonga, Tuvalu, Vanuatu

    Ziang ruangah England, Scotland, Wales, Northern pawl hi Oylampic ah khal RAM khat vekin an suak thei ring ring ti hi ruat thiam a har zet. An fim ruang a si bik kei cu zo ram hman nih an sawisel thei fawn si lo.

Comments

%d bloggers like this: