Delhi Ah Chinmi Raltlan Nupa Vaipawl In Thawi

Wesley

21 March, 2012

India, New Delhi , Budella Veng, Wz 34-A, ih um Chinmi raltlan Pa Pum Ngaih Khual le a nupi Nu Khaw Sawn Cing cu an inn sannak tei sungkua vai (kala) pawl in an thawi ih Nu Khaw Sawn Cing cu zianghman thei nawn lo in a um ti thuthang kan dawng.

9 March, 2012 zianglam ah Nu Khaw Sawn Cing cu  inn hnuai ih tidai khai dingin a feh. Vai (kala) pawl in tidai an khai thluh hnuah Nu Khaw Sawn Cing cun tidai a vun dawng ve zikih inn neitu tei cun tidai an phihsak. Nu Khaw Sawn Cing cu mithmai tha lem lo in inn tlun a kaih ih inn neitu cun a dung thlun  in awka hro zet in an hringhro. A pasal  Pa Pum Ngaih Khual cu kut an thlak, culawng duhtawk lo in an umnak inn ihsin suak ding in an dawi.

Pa Pum Ngaih Khual  teiih inn san man pek tikcu hi thlathar 15 a si theu. Inn san ding an hmuh lohli lo ruangah ni 4 an um bet. 17 ni ah inn san ding an hmu rem cang ruangah ni 4 kan um man le meisa man kan lo pe ding an ti. Ni 18 suak ding in paisa an pe.  Asinan inn neitu vaipawl cun thlakhat man in pe uh an ti ih thudang  khal rel bet man lo in an nupa in an thawi ciamco. Nu khaw Sawn  Cing  cu a hngawng an rekih na sa zetin an vuak. Cutin, biak khal theih nawn lo in a um.  Zomi Community Hruaitu pakhat an phone. Zamrangten bawm dingah a thleng asinan amah riangri an rak thawi tum bet.  Zohman run awk theih a si lo ruangah  Zomi Community hruaitu cun Palik pawl a phone. Palik pakhat cu a ra thleng nan zianghman ngaihsak lem lo in a um bet.

Vikasnakar Private Zato ah Nu Khaw Sawn Cing cu an phur. Zato ih an vun phurh lai ah a thawitu vaipawl khal an tel. Nurse pawl le a thawitu vaipawl cu thuthup an rel ih an biakawk lai hliamtuar kiltupawl in an hmu. Vai tawng thiam lem lo ti fam cu ziangthu an rel ti an thei lo. A rei hlanah Nurse pawl cun zianghman a na mi a um lo nan tlung thei. Mina zualpi lawng hi zato ah riah a theih an ti ih an tlunter. Nu Khaw Sawn Cing cu nikhua zianghman thei lo in a um lai.  Zomi Community hruaitu dangdangpawl an thlen tikah a cang lo ti in DDC zato ah an fehpi. X-ray (dat-hman) cu an la nan zianghman tuahmawhawknak a um lo an rak ti thotho. Zinglam 1:00 ah an rak tlun ter thotho. Nu Khaw Sawn  Cing cu lungfim in a um hrih lo.

Hithuhla hi Slic le CRC ah theihter asi. UNHCR khal ah thuhla sim tum rero lai a si. Case a fel hrih lo. Chinmi inn kiangkappawl ih simnak ah inn neitupawlin Palik hnenah nawhthuh paisa an pe ti in an sim  bet. 2011 lai khalah Pa Pum Ngaih Khual le Nu Khaw Saw Cing ih sungkhat an umpi nunau cu vaipwl in an rak ti buai zo thu kan dawng bet.

(Visited 211 times, 1 visits today)

Comments

comments

14 Comments

  1. Hivek thuhla theih hi cu thin a nuam lo ngaingai.

    Delhi ahcun Vai pawl ih in thawi tikah palikpawl khalin in bawm duh lo tikah lamzin pakhat hman kan nei lo tluk a si. Acozah hman ih in bawm duhlo ahcun acozah hnuai ih SLIC, YMCA, Donbosco, UNHCR etc. pawl hi cun ziangpipa khal in tuahsak thei lo.

    Tuini tiang Delhi ih Chinmi hmuhsuam tuar, thawituar, duhlocing ih ihpi tuar, mawh nei lo ih sualnak a phunphun puh tuarpawl siarcawk lo an um ih palik le lawyer pawl in a cem tiang an bawm timi thuhla theih ding a mal nasa.

    Kan buainak pawl hi police station thlen hlan ah in nuainam sak theu. Thihnak tiang khal kan tuar, asinan zohman in an investigate duh dah fawn lo. Delhi ah Laimi kut thlak ih thi kan um hnuaihni zo. Humtu kan nei lo lawlaw tluk a si. Kan himnak ding bik cu local pawl thawn buailo a si.

    Vai lak, zumlotu pawl lakih mi vakvai (refugee) si hi cu a naa fualfo tuk deuh.

  2. Hi Vai pawl hi Minung thinlung teh an nei maw ka ti ttheu…hivek thu theih hi cu tuar a har tuk deuh. Delhi ih raltlan kan laimi hrekkhat a har tuk pawlhi Kawlramah um sawn sehla kan zia deuh sawn ding tin ka ruat ttheu…ka tuar a har…thlacamnak in kan rak bawm ding….Pathian in a hrangah zingni engmawi suah ter zang seh.

  3. Bawmtu an nei lo maw?

  4. Is there way to leave Delhi?
    Behaving like their own world.

  5. Lal Sin Thang says:

    Chinmi a hmuhsuamtu le a siatsuahtu cu Chinmi duhdawttu Pathian in siatsuah ve seh!

  6. Hitivek thiltleng cu a va duh um lo ha aw! a va pawi ve zialo tuk aw. Kala pawl hi le an sualtuk theu si a tha um hmanseh la. Pathain in ziangkim a thei. Thlacamnak ah kan rak mang ke. Pathian in damnak pe hram seh.

  7. A pawi thei tuk aw……..
    …………………………………

    Bawipa kan thlacamnak in theihsak hram aw….

  8. Zang an va fak um ngai ve,,

  9. khenddiehmang says:

    aw khai aw, a va zia lo theu ve aw, an hrang ah thlacam sak cio uh si

  10. Hliamtuartu innsang hrang thla ka lo cam sak.

  11. Come Home, ALL says:

    Thin nuam lo tuk aw.

    Kan ram teih kan umah hivek lawman cu kan tuar ciamco lo, a tuar an um hmanah an malte, atu cu ramleng ah kan fehih kan har sinsin. Hihi Thlaraulam hruaitupawl in ziangruangah a si ti an thei ko ding nan mipi huat ttih ah in sim ngam lo a si bik ko ding.

    Delhi ah feh hlahuh ti khal le kan feh thotho. Vuak le velh kan tuar le kan than aw lala, thin hmuah nan mah ruangah a har in a nuam lo thluh.

    Harsatnak ihsin Pathian rinsan loin mahten hawl ih nawmnak kan hawl asile kan harsa sinsin ding.

    So, Come Home, Dear Chins from every part of the world!
    Falam

  12. Mi um men hi cu an ti tuk ka zum lem lo, kan nih chin mi hi cu kan um men hmang maw kan ti khal le mei kan nei deuh theu, ziang a si khal le kan ram dam nak dingah thlacam nak thawn Cung Pathian hnen thlaza cam uh si.

Comments

%d bloggers like this: