Danglamnak sungin Lungrualnak

June 9
Zarhte Ni

Danglamnak sungih Lungrualnak

Bible Siar Ding: 1 Korin 12:12-27

Kannih khal Judah mi le Gentile mi, miluat le sal ti’n um hman nungla, kan zate hin cuih ruangpum pakhat sung ahcun Thlarau pakhat ih baptisma lami kan si.
– 1 Korin 12:13

Mithiam zingzoitu pawl in leitlun huap ahhin a danglam awmi Chriatian hi a malbik in pawl (denomination) thawng riat lai kan um ding, an ti. Israel ram ih Christian mibur hrekkhat pawl cu thurin (doctrine) ruangah an tthekdarh aw thluh. Jesuh an phumnak thlaan hmun el awk ruangah Christian bur paruk lai cu taksa daan rori in an buai ciamco ih palik pawl ih remtthat ttul tiangin an um.

Hih zumtu pawl ih buainak le tthentthek awknak hin kan Pathian thinlung ziangtluk in a natter pei? Jesuh in thungai hramfak in a dungthluntu pawl pumkhat an si theinak dingah thla a cam (John 17:23). Christian pawl in pumkhat sinak kan neih thei lo ruangah leitlun ih thuthangtha kan sim le tetti kan khannak ah hmual a nei thei lo.

Pumkhat sinak ti tikah Bible thutak pawl cokpolh in pom tlang thluh ding tinak a si lo. Bible thutak pawl kan theih tlangih, pakhat ih duh hleicemi le thupittermi danglamnak pawl kha theih sak awk thiam ding le cohlan sak awk thiam ding tinak sawn a si. Rundamnak cu Pathian zaangfahnak laksawng a si timi cu Bible thutak a si. Biakinn sak daan ding a pianhmang le kawzaw phahmi ih a rong (color) tivek pawl cu mi bulpak ih duh daan a si. Pawl le kawhhran dangdang ih tthen awknak hi mal deuh sehla.

Christian pawl cu hih leitlun ah Khrih ih ruangpum kan si. Cuih sinak dinhmun vekih kan tlin theinak dingah atu ihsin thok thlang kan ttul.

Bawipa, Thumthlak Pathian na sinak in Christian dang pawl thawih kan pawlkom awknak ah pumkhat sinak neiter dingin in bawm hram aw.

Bible thutak le mi bulpak ih duhnak thleidang thiam in mizapi lungrual te’n pumkhat si theinak dingah ziangti’n kan zuam pei?

@ Ava Pennington

(Visited 25 times, 1 visits today)

Comments

comments

Comments

%d bloggers like this: