Damternak Thuahhnih

March 29
Tlawngkai Nili

Damternak Thuahhnih

“Nan hnenih Thlarau Thianghlim a rung thlen tikah cahnak huham thawn nan khat dingih Jerusalem le Judea ram le Samaria ram le leilungtlun a deng tiang Keimah ih theihpitu (tetti) nan si ding,” tiah a ti.
– Tirhthlah 1:8

Bible Siar Ding: Rom 5:19-6:18

Ka rual, thuahhnih damternak na ttul a si. A hmaisabik ah rundamnak le thianhlimnak, cun Thlarau Thianghlim ih baptism na co a ttul. Na minung hlun kha tho thei nawn lo le zianghmang cangvai thei nawn lo dingin na tuah a ttul. Thlarau Thianghlim bomnak in sual (sin) ahcun mithi na si ih Pathian ah minung na si hlan lo le thilhlun hmuahhmuah an hloh thluh hlan lo damternak na ttul a si. Thlarau Thianghlim in mi pakhat a neih (posses) ngah asile a nunnak pumhlum cu nuntharnak hlirin a khat ding – vanlam nun huham cahnak in khahter a si ding. Tleunak zate, phuanlangnak zate, huham zate le duhdawtnak zate a simi Amah ih rocotu na si ding. A si, Thlarau Thianghlim Pathian cu kanmah sungah nung in a phuanglang aw dingih a sunglawinak a langter ding.

London ih milianzet pakhat pa cu a hnattuan a tluangzet nain a sunglam nun ah buainak a nei ih ziangti’n ka tuah ding ti a thei lo. A innpi sungah mangbang vansang in a sukso rero ih sangka kiltu tlangval pate cu thinnuamzet in hurhuk tum ih a ummi kha a hmu. A zungkhan ah a va kir saal ih thu a ruat nasa. A nunnak ah hnangamnak a um lo. A bank cabu, a paisa, a hnattuan, a hlawhtlinnak pawl khal in hnangam dingin an bawm thei cuang lo. Ka rual, leilungpi hman nei khal awla Pathian na neih lo ahcun na nunnak cu “si rang hnihmi thlaan” vek a si (Matt. 23:27).

Milianpa cu a hna a ngam thei lo tikah “Tlangvalpa te ziang a tuah ti ka va zoh ding” a ti. A va feh ih hurhuk tum in thinnuamzet ih a rak um kha a hmu saal thotho. “Ka zungkhan sungah ra aw” a ti. Zung sung an thlen tikah, “Ziangmi in si lungawi te’n a lo umter, in sim aw” a ti. Tlangvalpa in “Jesuh ka theih hlan ahcun kei tla mi riahsia le mi vansang ka rak si. Rundamnak ka co ih Thlarau Thianghlim ih ka nun a luahkhat tikah ka sunglam nun cu lungawinak in a khat. Hurhuk ka tum, hla ka sak ringring” a ti.

Milianpa cu tlangvalpa hnen ihsin mission tuahnak, thuthangtha simnak hmun address a thei ngah. Pathian thu ngai dingin a feh. Pathian huham in a tonghtham ruangah hmailam ihsin kawhnak (altar call) caan ah a tho thei ve. Rundamnak a co ih a rei hlanah Thlarau thawn khat in, “Hallelujah!” ti’n a au suak thei ve a si.

Pathian cu kan lungawinak ih muril a si. Pathian ih tonghtham mi na si le nun thlengh awknak na nei dingih na hrangah leitlun hi a thupi lo ding.

@ Smith Wigglesworth

(Visited 26 times, 1 visits today)

Comments

comments

Comments

%d bloggers like this: