Daihrial Caan

February 27

Tlawngkai Ninga

 Daihrial Caan

 Siar: Saam 23:1-3 Marka 6:30-32

 “….Nan do awknak cu baang thlang uh, Keimah hi Pathian ka si kha thei uh….” – Saam 46:10

Kumkhat Sung Baibal:          Mipum. 17-18           Marka 6:30-56

Ka rual nu Mary in a pa thawn ngaisio ih tikcu an hmanlai caan, man neizet ih a ruah thu i sim. Ngasio paihtu ka si lemlo ih ziangruangah a nuam aw ti ka thei duh ih ka suh tikah, “Ka pa thawn um tlang ka duh,” tiah a ti. “Nga sio phah in thu nan rel maw?” tiah ka sut saal. Anih in, “A si lo, kan ttong lemlo, nga kan sio men,” tiah i let.

Thurel tlangnak si loin umtlangnak sawn a si. Ttongnak ah tikcu ziangzat kan hmang ti na ruat dah maw? “Daite’n Pathian thawn um” timi hi thlacamnak in caan hman a si maw, Daite’n um menmen a si?

Pathian in, “Daite’n um uhla, Keimah hi Pathian ka si kha thei uh” (Saam 46:10) tiah a ti. Jesuh in A dungthluntu pawl an man lotuk ih rawl einak tikcu hman an neih lo kha a hmuh tikah, “Kan feh pei ih kanmah lawng daite’n kan um theinak hmun ah va um uhsi! Cule malte tal nan cawl thiam ding” (Marka 6:31) tiah a ti. Nunnak ih in hnaihnoktu kan taanta asile nuam te’n kan cawl thei dingih Pathian kan ruat thei saal ding a si.

Pathian thawn mah lawng daite’n umnak tikcu caan (Quiet times) laak hi na nun daan (life style) si dingah na tuah maw? Na thlarau thazaang Amah in tlungter saal ding na duh maw? (Saam 23:1-3). Daite’n um ding daan lo zirh seh. Jesuh ih, “Ka hnenah ra hrih awla, ra cawl hrih aw,” tiih a lo sawmnak aw ngai aw.

                                                                                      Pathian thawn daite’n um tlang caan,

Mahte lawng thlacamnak in;

Kan thlarau a cakter dingih thazaang a tlungter saal ding,

In fingkhawinak theithiam ding in bawm.

 

Pathian thawn diate’n um tlangnak in,

hmailam a ttul caan ih hman ding huham a khawl.

(Visited 19 times, 1 visits today)

Comments

comments

Comments

%d bloggers like this: