Daihnak Hawl

February 5

Tlawngkai Nili

 

Daihnak Hawl

 

Siar:

Filipi 4:4-12

 

Minung ruah ban lomi Pathian ih daihnak in nan thinlung le nan ruahnak cu Khrih Jesuh thawn nan pehzom awknak sungah himte’n a ret ding. – Filipi 4:7

 

Kumkhat sung Baibal:

          Suahlannak 36-38

          Matthai 23:1-22

 

An hminthan laifang, thil thar an suahpi theilai le an len laifangah Beatles pawl in The White Album timi thu el-awknak a um theimi hla pawl an suah. Cuih album in a bur ih tuah khawm hnakin bulpak ciar ih tuah hi a ttha sawn ti a langter.

 

An hminthannak thawn a rami thil tlunah an ningkhopnak a lang. John Lennon in, “Ka ningtuk” timi hla sungah a hlawhtlinnak le a lennak cu pakpalawng a si zia, “thinlung daihnak malte hrangah ka neihmi hmuah ka lo pek zo,” tiah a ti. A neihsiah, a thiltitheinak le a sinak in a pumpak ttulnak cu a kimter thei lo.

 

Kan umnak leilungpi in thin hnangamnak le daihnak in pek thei ngaingai lo. Hril ding lawng in pek. Nunnomnak, thiltitheinak huham le neihsiah in thinlung daihnak a ai-rawl thei taktak lo.

 

Paul in, “Minung ih ruah ban lomi Pathian ih daihnak in nan thinlung le nan ruahnak cu Khrih Jesuh thawn nan pehzom awknak sungah himte’n a ret ding,” (Filipi 4:7) tiah a ti. Himi cu A Fapa Jesuh an zumnak thawngin Pathian thawn rem awk saalnak a neitu pawl hrangah Pathian ih pekmi daihnak a si (Efesa 2:14-16). Cuih daihnak cu a ttulzettu leilung thawn hlawm aw dingah in pek.

 

Daihnak taktak cu Jesuh thawn pehzom awknak sung lawngah a um. Amai’ thlangam daihnak taktak na co ngah zo maw?

 

Daihnak taktak ton:

Pathian hnenah ngaithiamnak dil in,

 A lo pekmi rem awk saalnak cu cohlang aw.
Jesuh cu thinglamtah parah na sualnak hrangah a thi ih,

Thihnak ihsin thawhter saal a si ti zum aw.

 

Hnangam daihnak ka lo taanta. Keimai’ hnangamnak ka lo pek.

Leilung mi ih pek vekin a si lo. – Jesuh (John 14:27)

Comments

comments

Comments

%d bloggers like this: