CT Sunday Sermon

Nuhmei  Siti malte Elisha in PUNGZAI TIR

Ro Khar Thang

Text                     :  2 Siang. 4 : 1 -7.

Thuhmai :  Elisha ih tuah mi thilmak (mangbangza) pawl:  Tidai a thlum tir, Savom in a keu thei lo, Siti a punzai tir, Nuhmei fapa thihnak ihsin a nungtir, tihnung mi rawlhmeh  a thiang tir, Sanghlom 20 a pungzai tir, Hreitlung  cu tidai sung ihsin a laang tir, tivek pawl khi  bible sung ah kan hmu thei.

Hlanlai ihsin tulaisan tiangin minung pawlin hmuh le theih kan duh bik mi mangbangza, thilmak tuah thiam ti mi khi a si ringring. Kan Pathian hi a maksak zawng le, thilmak in tuahsak theutu ding hrawnghrang lawng ah kan mamawh pang maw, ti hi mah le mah kan sutaw theu pei.

  1. Nuhmei insang: a). Elisha cu Profet a si tiah fekten an zum. b).Fapa pahnih te lawng a nei.
  2. Insang harsatnak: a). A pasal in a thih san. b). Leiba tampi a nei. c). Hlanlai dan ahcun leiba kuan thei lotu cu a fapa lonsak theih a si.

Pui. 25 : 39-40. Sungah hitin a ngan: “Nan kiangkapih a um mi na phunpi Israel mi pakhat a farah ih a nun thei lo ruangah sal ah a zuaraw a si ahcun sal hna nan tuan tir lo pei. Hlawhphal mi hnenum vekin nan hnenah a um pei ih hmai Jubilee kum tiang nan hna a tuan pei”.

  1. Nuhmei nu ih rinsan mi cu:  a). Pathian ih minung Elisha kha a rinsan. b). Elisha khalin, ziang si ka lo tuahsak ding; na in ah ziang thil so um, ti ih a suh tikah, ‘Kan insung ah siti palang khat siar lo, thildang zianghman a um lo’ tiah nuhmei nu in a let

c). Profet fet ih fial mi pohpoh cu zumfek nak thawn a tuah vivo. A inhnen pawlih neih mi  belkheng  lawng hmuahhmuah a va sang. A fa le pawl a ko ih sangka an khar. An sancop mi belkheng hmuahhmuah khatin siti cu an ret.

d). Elisha in, hi siti cu va zuar uhla nan leiba pawl va rul (sam) theh uh. A tang lai mi siti hmangin nan nufa zaten nan pum nan cawm pei a ti.

4. An insang in an comi thluasuahnak:

1). Leiba an nei nawn lo.   2).  Cawmawk nak thar (Sum hram) an nei thlang. 3). A fa le pawl sal si theinak ihsin an luat.

Zir ding  thu pawl: Pathian thu bible sungih in sim mi thu tampi hi kan mai hrang ciar ah a si. Kanmah le kan tulsam nak zawn le a cankimte ah kan par ih (thleng  dah zo, thleng lai rero, thleng lai ding mi) thu hlir an si. Kan parih a thleng lo mi, midang hnenah a thleng ih midang hnen ih thleng lo mi kha kan hnen ih thleng mi a um theu. Cumi cu kan hmuh thiam, kan siar thiam ih kan nunpi ding mi a si.

Thu (Pathian Thu) cu a nungih thil a ti thei ti mi, kan nitin nunnak in a tep ih  kan thlarau rawlah kan hmang taktak  tum ahcun in fial vekih thlun le tuah ngam ding hi kan tuanvo a si. Ningzak loten kan neih lo dan phuangsuak ngam in, amah rinsan in kan ongaw ngam ve a tul. Kan mah lam onawk nak a um lo ahcun Pathian kutcak khal kan hnenah a langaw  thei lo. Cuvek ih  kan onawk theinak ding khalah Thiang Thlarau ih bawmnak le hruainak thaw lo cun minung in kan tlin ringring thei lo.

Pathian thluasuah hlawhtlinnak kan neih tikcan ah, kan leiba peta, rulta  ciamciam dingin in zirh mi hi a thupi zet. Leiba sam duh lo le pe tha duh loih mai hlawknak lawnglawng hawltu pawl cu thluasuahnak in a suahsan ih tidai bangin a kangcat vuarvi theu. Kan minung pi par ih lei le ba kan neih lo hmanah bible ih in sim vekin, Thenhra thenkhat dikzet ih kan pek lo mi khi kan leiba a si kan ti thei. Bible cun a pe lotu cu ‘RUKRU’ a ti. Ba ding kan si lo, rutu khalah kan tang lo pei. Van sangka on theinak tawhfung tha bik(um sun) khal a si ih, a theifiang zotu pawl cun, “Sungkhat laina ngaingai lo cu sim siang ding hman a si lo” an ti theu.

Thu  tlang zualnak :  Kan neih zat, kan neih lo mi le kan samnak theitu Pathian in Elisha vekin lailan te cun in rawn sut nawn lemlo ding. Asinan, amah zumtu, rinsantui nun ahcun nitin ih kan sinak, kan umdan, kan sam mi le kan tul mi ngaingai cu thlarau in a theih tir ih (theih lo ) ngaingai ti a um nawn lo. Kan theiaw tir duh lo simaw, kan thei duh lo hrim simaw, a si ahcun a mawh phurtu ding cu kanmah kan si vekin, kan cak lonak, kan tlin lonak hmuahhmuah thawn amai hnen ih kan tlanlut ahcun kan harsatnak in sawng ih, nunnak tihna thar, taksa nunnak le thlarau tirawl van Mana thawn in cawm theu a si.

Siartu hrangah thlusuah thleng hram seh.

Amen.

(Visited 42 times, 1 visits today)

Comments

comments

Comments

%d bloggers like this: