CPP Pawl An Kuanglo An Nor Lo Maw!

11717120_947251052005607_230667584_n

Khampat, Kanaan, Khawhmunnuam, Tamu, Nanphalung, Tahan, Phaillin Zuk – CPP Media In-charge 23/6/215

Rampi hrilawknak khal a nai cuahco ih party lam ihsin mipi nehtumnak le hip tumnak pawl khal online ah hmuh ding a um phahphah thlang. A liamcia kum 4 lai ah khacun online ah kan ram (Myanmar) hrilawknak ding hrang mipi hipnak tuah ciamco cu hmuh ding a rak mal zet. Acozah lam ih zippitnak ruangah khal a si. Cuhleiah Facebook, Mail le a dangdang social network hmangtu Chin mi tla kan rak mal zet ih thupi tuk ah kan rak ruat lemlo. Tu ahcun Chinland Today in member 65000 a neiih Chin mi social network lakah cakbik le mipi neitambik a si.

Hi mi zat pawl in nitin, an hmang thluh lo men ding nan, himi zat pawl in Facebook an hmang tinak cu a si. Tisual pang ih thun ngah pang mi Chin ṭong theilo le thiamlo tu hi, mi 100 hman an um lo ding. Curuangah social network in kan Chin mi pawl khawtlang nun tampi a luah khat zet ti cu a fiang a si. Tulai Chinland Today Media ih neih mi Chinland Today Facebook groups ah le Falam mi le sa pawl um khawmnak a si mi Rihli tlang cabawm ah Pu No Than Kap ih hnaṭuannak tete pawl tla hmuh ding a um tam zet ih a lungawi um ngaingai.

Chin Progressive Party media officer lam ihsi ṭanlak tharnak ruangah a siin a lang ih fak tlak zet a si. Pu No Than Kap, Chin Affairs Minister ih Haikhawl khawtlang a bawmnak, Sadaw khua siatton pawl bawmnak, tu baiih a khual tlawnnak le mipi a vehvainak pawl CPP Media Officer lam ih an thuthan mi hmuh tikah CPP aiawh media tuanvo neitu mengmang in party pi fehdan le thuhla um dan theilo thu va um hlah. Duhsan an nei si ko ding ti cu theih cia le hmuh cia a siko. An thuthan mi zoh tikah seherh zazet a simi cu, “Pu No Than Kap in a mai zalte sung ihsin a bawm” timi le “CPP, Media Incharge” timi a si. CAM tuanvo neitu, mi pakhatin a zalte sungin mi abawm timi Party Media Incharge ih a thlah mihi mai hnatuanlo ding tuan, mai kuang lo nor asi.

Cun CAM hmin ih a bawm lo khalle CPP party hotu din hmun in ziangah a bawm lo? Milian dang khalin a bawm mi zat hnakih tam tla an bawm ko. Curuangah hihi Party pakhat pi media Incharge ih thlah ding a si mi thil asi lo. A san cu an party ih cangvaihnak khal a silo ih mimal hnatuannak men a si. An thlah khal a sile party sinak tello ih thlah ding ci a si. Cumi khalah ziangruangah party hminin a cangvailo timi thusuhnak a um lai? A mai bulpak hminṭhatnak le hamṭhatnak a rak hawllo tla cu a si men ko ding. Asinan a mimal hmin ih a cangvaihnak pawl languar ter zetih tlang cabawm le tulai santhar, Chin mi vantlang hmun ih tarlan mi zoh tik ahcun mimal larter duhnak lole, midang pawl ih upa ding le lawm ding ruahsannak ih tlangzarh mi a si tihi thlirnak pakhat ka neih mi a si. An hnaṭuan mi a sia tilam siloin, an hnatuan dan hi a diklo a si tiin ka ruat.

CPP media officer ih a thuthan mi an party palai din hmun ih a tarlang mihi, thilthatuah a si ruangah an mai party pawl ih duhdan a si thotho si pei maw tiin ruah ding a tam zet!!. Party ih hnaṭuannak thantu ding le relsuak tuding maw a si, Pu No Than Kap ih thuhla thantu ding ha a si titla ruah ding a um tel fawn! Pu No Than Kap cu CPP pawl ih hotu a si. Chin Affairs Minister khal a si tel. Hi tiih sinak khuah a neih mi lawng siloin mipi tamzet ih ngaihsan mi le upat mi a si. Falam mi pawl ih kan rinsan zet mi a si fawn. Asinan a sinak thawn pehpar lomi hnaṭuannak pawl CPP thuthantu ih a rak than uar zet tikah, Pu No Than Kap ih sinak ding le tuah ding mi a tuah mi silo tiangin a tham phah a si tiin ka hmu. CAM dinhmun ih a tuah ding mi a um ih an party hotu dinhmun ihsin a tuahtu ding an um.

Cumi pawl cu an mah le sinak zawn ih thuthantu pawl in mipi pawl ih theih dingin an than mai ding mi a si. Tahthimnak ah “Anteng, Tanbu, Tlangzawl ah hnatuan ding um” timi CAM officials thuthan a si tikah a hnget ih a rin um. A mimal ih a hnaṭuannak le a thiltuah mi pawl cawimawi ding le mipi theihter ding asi ahcun Chin media dangdang pawl hmangin a silole thudang sawn in than hna khal thiam sehla mipi ngai a dam deuh ding ih thilfeh dan pom hahdam zet ding mi a si. CPP le CAM hotu a si ahcun party mipi hipnak ding hrangah, lole a mimal ih hlawknak ding men le hminṭhatnak ding men ah, a party le a sinak thawn a cangvai thei lo a si. Cucu party le pawlkom rinsantlak pawl ih cangvaih dan khal a silo. Ziang ah tile MP pawl cu mipi hrangih cangvai tu ding le aiawh tu dingih hril mi an si. An mai mimal hlawknak hawl dingih hril an silo.

Hi tiih ngan tikah Pu No Than Kap le CPP pawl ih hnaṭuan mi a sia ti tumnak lam a silo. Pholang tum mi sawn cu an hnaṭuan fehdan hi a diklo mi ralkap bawi pawl ih sinak thawn an mai hlawknak ding hrang ih an hnaṭuan mi thawn danglamnak a neilo timi le mipi tulnak tuahsak hi MP pakhat dinghmun ihsi cun bawm a silo. A tuan ding mi a tuan fang men lawng a sisawn. Curuangah santhar Chin mi vantlang a simi, Social network ih CPP le CAM ih hnaṭuannak asilo mi Pu No Than Kap ih hnaṭuannak cu Party pi pakhat thuthantu in a pehpar lo tuk mi a thuthannak hi thil tuahdan mawi a silo a si.

CPP cu party a si, CAM khal sinak a si. Cumi cu Pu No Than Kap in a nei veve. Asinan pu No Than Kap cu CPP le CAM a si ringringlo ding. Curuangah a mimal hnaṭuannak cu a party hnaṭuannak thawn a pehpar awklo caan khal a um thei. Amahlawngte sumpai ih mi bawmnak le khua pakhat a tlawnnak pawl cu a party a silole CAM ihsin a tuah ding mi awm a si. Cucu mipi pawl ih kan hrilnak san le a tlinnak san khal a si. CPP party piin mipi pawl ih duhco a va duh hmanah mimal hnatuannak pawl siloin party hnatuannak pawl sawn kha mipi hnenah in theihter sehla, cutin hmailam kan khaweng var mawi, kan khawvel van ram lam pi i hruaitu ah tla kan vote cio sawn ding a si.

11716094_947251042005608_430038151_n

Khampat, Kanaan, Khawhmunnuam, Tamu, Nanphalung, Tahan, Phaillin Zuk – CPP Media In-charge 23/6/215

(Visited 518 times, 1 visits today)

Comments

comments

One Comment

  1. Chinland Today hi Media Website pakhat a si. Media thawn pehparin Rights tampi cu a nei. Asinan tuvekin Bulpak, Party pakhat lang-hngan zetin dokalhnak (dokalhnak ti theihmi ca a si) hi ngan dingah a awm lo, a mawi lo zet. Chin mi media lakah a upa lam le member tam lam kan ti rero nan a Nauhak tuk nak a lang zik ṭheu.

    Kan theih dingmi cu Media pakhatin compare cu a tuah thei nan lang-hngan zetin bulpak le Party pakhat a dokalh timi cu CT hin a kuang lo a nawr sawn a si. Media ih tuah lo dingmi a tuah!

Comments

%d bloggers like this: