Concerns on Chin Language – Dr. Hre Kio

Kan Chinmi in ziangtin ṭong pakhat hmang tlang tahratin pumkhat ah kan fuun aw thluh thei ding timi thuthawn pehparin Dr. Hre Kio cun a ruahnak a tanglam Youtube ah a simfiang. Kan dung thla ziangmawzat liam zo khalah Pu No Than Kap cun ṭong pakhat kan ṭawmawk thei ding a thupitzia a rak tar dah.

Youtube zoh harsa pawl hrangah a thusimmi azaten cekci silo deuh tawinak lak phah in hitin a hnuai lam vekin kan rawn tarlang… Ed-

——————-

Zarhthum ah leitlun ṭong pakhat a thi vivo, kan leilung tlun ah kan hmai lam kum zakhat ahcun ṭong fate pawl hmuahmuah cu an thi thluh ding. Ziang ruangah ticun, a pakhatnak ah kan nauhak pawl an thiam nawn lo, a pahnih ahcun an rel ngam nawn lo ih an zahpi, a pa thumnak ahcun an ṭong in ca an ngan nawn lo, siar ding a um nawn lo.

Kan Laimi cangan ruangih sum ngah an um lo. Cu tiih ca kan nganmi hlawknak nei thei ding cun kan zapi ten ṭong phunkhat kan hman ahcun thil tampi kan tuah thei ding. Kan thinlung a fun khawm aw thei ding. Kan Laimi in ṭong 31 lai kan nei, hi tiih kan neih ruangah kan ṭhenthek aw thluh. Ṭong pakhat nei uh sila cun Ca uk tampi kan siar thei ding, kan mino pawl in an zah pi lo ding. Ṭong pakhat kan nei lo mi hi kan fanau pawl cun kan tlaksamnak a si ti theiin ni-ni khat ni ahcun an hawl leh ko ding. Asinan ṭong phun 30 pawl tinung thluh kan tum ahcun a zaten an hlo thluh mai ding.

Mino pawl in hrilding kan nei cucu kan ṭong kan funkhawm dingih kan nung ding maw, lole kan ṭhenṭhek aw thluh dingih kan thi ding. Lamzin dang a um lo. Kan hlo hnak cun kan funkhawm a ṭul tiih pumpekawknak, thapawknak kan neih lawngah kan nung ding. Kei ka nu ṭong cu Hakha, ka zir cawp mi cu Falam. A pahnih in ka hrang ahcun a poilo.

Kan Chin ramṭhen ih ṭong, Hakha, Mindat, Matu, Falam, Tedim pawl kan hman thei lo ahcun Mizo ṭong hman kan common ṭong ih kan hman le a ṭha men ding ti karak rel dah. Matu, Paletwa pawl ih missionary an fehnak in Mizo an thiam, Hakha, Thantlang ah an thiam. Falam peng ahcun Lairal hmuahhmuah in an thiam. Tedim peng ahcun Tonzang, Tamu lam hmuahhmuah in an thiam thluh. Lairam le Mizoram karlak ramri hmuahhmuah cu kan thiam thluh. Curuangah zirthluh sehla a cangthei men ding ti khal ka ruat.

Kawl acozah cun cumi ṭong hmang uh tin in ti dah lo ding. Curuangah kan mahte thutluknak kan tuah hi a thupi. Ka hrang ahcun  Mizo, Hakha, Falam a dangdang khal a sile kan funkhawm awk theinak a si ahcun ka zir mai ding.

Mizo ṭong a si theilonak ding ih ka ruah mi cu kan mah ramsung ih ṭong a silo, ramdang mi ṭong a si.

(Visited 392 times, 1 visits today)

Comments

comments

Comments

%d bloggers like this: