Community hruaitu pawl le OPI tonawknak nei

COMMUNITY HRUAITU PAWL LE OPI TONAWKNAK NEI

UNHCR ih department pakhat asi mi Community Development Unit (CDU) department ih hohanak in Community hruaitu pawl le UNHCR ih department pakhat asi mi Malaysia acozah le refugee kar lak ih hna a tuan tu Outreach Protection and Intervention (OPI) le Malaysia ih um refugee community hruaitu pawl cu July 12, 2012 ah Chinese Assembly Hall ah thurel khawmnak neih tlang asi. Malaysia ramsung ah refugee community pawl hi an za ten 63 a um.

OPI department ihsin Mr. Zaim in Malaysia ramsung um refugee pawl ih theih tul mi le, Malaysia acozah le refugee karlak ih an hnatuan pawl sim fiang nak a nei. Cui thu a rel thluh hnu ah community hruaitu upa pawl khal in an theih fiang lo mi thu tete le refugee pawl ih harsatnak pawl simfiangnak le sutfel nak an nei.

Malaysia acozah hin 1951 ih UN convention ah lungkimnak ca a rak ngan lo vek in UNHCR hi Malaysia ah mikhual men fang asi. Malaysia ramsung um refugee pawl hi Malaysia acozah kutsung um mi si lo in acozah ih sennak men ih um mi asi thu simfiangnak anei. Curuangah refugee pawl hi Malaysia acozah daan ah cun daanlo ih um (illegal migrant) an si thluh ih ziangtik laicaan khal ah kaih theih ringring an si. Cu ti asi ko nan UNHCR ih dilnak vek in palik pawl khal in refugee cu kai lo in a thlah men theu nak asi.

Hi mi thu ah refugee tamnak hmun KL le a dang hmunhrek khat pawl ah cun palik pawl in UNHCR an theih ruangah refugee card nei cu kai lo in an thlah nan hmundang UNHCR thei lemlo khawdang ih um palik pawl cun UNHCR card nei pakhat asi khal le theithiam lo in an kai thotho ti asi. UNHCR card nei mi pakhat palik ih kaih ton pang asi len cui palik hnen ah cun zangfah dil in ‘Kei cu refugee ka si ih UNHCR ih pek mi card khal neitu ka si ruangah zangfah ten UNHCR ka ko ding ih simfiangnak an lo nei thei ding’ ti in zangfah dil thiam asi le luatnak tha pakhat asi. UNHCR hotline cu card dung lam ih ngan mi 012 630 5060 asi ih zinglam 8:00am ihsin zalam 11:00pm tiang kawh theih ringring asi.

Mi kai tu pawl hi palik, immigration, maritime pawl an si. Rela pawl ih mi an kaih tikah an mah lawng ih kai si lo in hi pathum pawl ih pakhat khat tel in mi kai an si. Rela pawl ih mi an kaih tikah hi ramsung um theinak card pakhat khat nei lo mi cu zozo khal kaih cih thluh an si. Rela pawl ih mi an kaih rero lai ah zo khal run suah awk theih asi lo nan zung thlen hnu ah cun tawlrel sak awk theih asi. Cu ruangah rela ton tikah a cang thei tawk ih kian a tha bik. Palik pawl cun sualnak a nei tu pawl le daan lo ih a um tu pawl an kai. Immigration pawl cun daanlo ih umtu pawl an kai ih maritime pawl cun daan lo ih ramsung ralut tu tiva kap ih an hmuh mi pawl an kai.

Kaih khih ton tikah, kaihmi pakhat ih thuhla zingzawi ding in palik zung ah ni 14 sung ret an si. Cui ni 14 a luan tikah thurelnak zung (court) ih hruai an si ih mawhnak a neih dan in thawng in sung kuat an si. Cui thawnginn sung ihsin camp pa khat khat ah kuat an si theu. UN card a nei mi khal si seh nei lo mi khal si seh thawnginn sung an um lai hrimhrim ah ziang ti hman in runsuah theih asi lo. Camp ih kuat an si hnu lawng ah runsuah theih asi. Curuang ah hi ni 14 sung ah a rang thei bik ih tawlrel thei asi le a tha bik ih sualnak (crime) nei tu asi ah cun thurelnak zung thlen tengteng atul. Thurelnak zung thlen tikah sualnak nei mi asi le a sualnak phuang aw tu cu hremnak a dim deuh ih sualnak phuang duh lo tu cu hremnak a na deuh ti asi.

Hi thu hi refugee pawl hnen lawngah si lo in an mah ram mi pawl hnen khal ah asi. Refugee pakhat ramsung ih daan lo ih a um nak men ruang ih kaih asi ih ni 14 sungah thu tawlrel sak thei lo asi len a thu an rel sak nak ding hmun, tikcu le caan cu UN ih OPI ah report pek ding asi. Cu ti in OPI pawl in lawyer pakhat kuat a kuat ding ih a thu a relpi ding asi. Sualnak, mawhnak nei pakhat kaih asi le cu UN in a tawlrel pi lo ding ih mah tei’ lawyer san a tul asi. OPI report peknak ding email cu mlsuopi@unhcr.org asi lo le mlsu@unhcr.org asi.

Court ih thurelsak mi pakhat cu a sualnak daan lo ih um asi ahcun KL court ih thuthen sak mi cu thla 1 ihsin thla 2 sung thawngtlak, PJ court ih thu a bawhcah mi cu thla 1 sung thawng tlak asi. Hi thawng tlaknak ni pawl hi kaihni ihsin siar thawk asi. Hmun dang pawl ah cun a reibik kum 5 thawngtlak lole paisa thawng 10 cawh lole vei 6 vuak lo le a pathum khal asi thei.

Simfiangnak a neih hnu ah community pawl in thusuhnak an nei ih sawnnak khal neih cih asi. Camp sung ih reipi tang pawl ziangruangah asi ti an suh tikah thu pathum in sawnnak anei. 1) UNHCR in thuneitu ca a kuat tikah ca a kuat vek in thuneitu pawl an cangvai lohli lo, 2) refugee an si nak an rel lo, 3) passport kai tu an si ati. Hrek khat hnatuannak ih kaih mi pawl cu palik pawl in an boss pawl ih sualnak an hawl duh ruangah theihpi tu si ding ah reipi ret an si.

(Visited 77 times, 1 visits today)

Comments

comments

Comments

%d bloggers like this: