CNF in Zabi 21 Panglong Tonkhawmpi parah Duhphorhnak A Tuah Men Thei

Šianglianuk Ķianghrol

February thla cem ah tuah ding ih timtuah rero mi Ramdingkhawm Remdaihnak Tonkhawmpi – Zabi 21 Panglong Vei Hnih Lairelnak ah kai lo ding in an ruat rero tiah Chin National Front ih Hotu Sang (2) Dr. Salai Lianhmung in a sim thu Frontier Myanmar thuthang in February 6 ah a tarlang.

“Chin ramkulh sungah a can khelh in phunpi level ramkhel relkhawmnak kan tuah thei lo ahcun, CNF in a ra ding mi Ramdingkhawm Remdaihnak Tonkhawmpi a kai ding, kai lo ding timi cu kan ruat sal a ttul ding,” tiah a sim mi a si.

Ziangahtile, Vei Hnih Tonkhawmnak hlan ih a tang lai mi ni 20 lenglo sungah, Chin ramkulh ah hrinhnam sirhsan phunpi level ramkhel relkhawmnak pawl tuah ding ah a cang thei lo tiah, Nay Pay Taw ih Thingaha Hotel ah February 6 ih tuah mi Ramdingkhawm Remdaihnak Relkhawmnak Joint Committee (UPDJC) lairelnak in thu a bawhcat ruangah a si.

“Kannih lam ahcun ziangkim kan tiar aw zo. A tiar aw lo mi ti ahcun, Chin ramkulh cozah in central ihsin fialnak a ra hrih lo, an timi pakhat te lawng a um. Cumi thuhla kha tuini UPDJC lairelnak ih an rel tikah, kan tiar aw hrih lo tiah thu an bawtcat,” tiah Dr. Salai Lianhmung cun a sim.

February 6 ih tuah mi UPDJC lairelnak in tui thla ni 28 ah Nay Pay Taw ih tuah ding mi Vei Hnihnak Tonkhawmpi hlan can awl um mi ah Chin ramkulh le Rakhine ramkulh ahcun phunpi level ramkhel relkhawmnak tuah lo ding in a bawtcat nan, Shan ramkulh ih Pa-o mahte ukawknak hmunram, Thlanglam Shan Ram Ralkapbu (RCSS/SSA) ih thunun mi hmunram le Pegu ramtthen ih Taungngo pawl ahcun tuah a siansak.

Ramhotu Tlangbawizung ih Directorate U Zaw Htay cun kan dung thla lam ah Karen ramkulh le Tanintharyi ramtthen pawl ih an tuah zo mi phunpi level ramkhel relkhawmnak vek in, UPDJC in Vei Hnih Tonkhawmnak hlan ih a tang lai mi can ahm hlawhtling zet ih tuah theinak ding hmunram pawl hril in siannak a pek mi a si thu a sim.

“Chin le Rakhine khal tuah lo ding kan tinak a si lo. Hmunram dinhmun, ramkhel dinhmun, humhimnak dinhmun pawl, cun, himi can karlak ih ttheh ding ko tuah theih ding dinhmun, tivek pawl kan zoh mi a si,” tiah UPDJC lairel ttheh ih media pawl thawn an tonawknak ah U Zaw Htay cun a sim.

Asinan Dr. Salai Lianhmung cun cozah lam ih pek mi puhmawh cu an hngetkhoh lo tiah a sim. Chin ramkulh ah phunpi level ramkhel relkhawmnak pawl tuah ding in, ramkulh cozah tel in, ramkhel party pawl, zatlanglam pawlkom pawl thawn sutronawknak an tuah zo tiah October thla lam ah UPDJC hnenah a simtheih zo thu a sim.

“An tiar aw hrih lo timi cu ziangtinak si? Ramkhel lam in kan tiar aw zo. Humhimnak lam khal ah Chin ramkulh ah CNF le cozah ralkapbu lakah doawknak vei khat hman a um lo,” tiah February 6 ih UPDJC lairelnak ah ramhrin miphun ralthuam kaitu pawl hlawmkhawm lam ihsin a kaitu Dr. Salai Lianhmung in a sim.

A rei hlan ih tuah ding mi Vei Hnihnak Zabi 21 Panglong ah phunpi level ramkhel relkhawmnak ihsin a ra suak mi thuhla pawl sirhsan ih relkhawmnak neih ding a si ruangah Chin ramkulh ah zate telkhawm mi relkhawmnak tuah an sian lo mi cu sunralnak a um tiah CNF lam in an ruat mi a si.

“Rampi hrangah a thupi zet mi, kan miphun pawl hrangih hmailam can thuhla botcat theitu thutluknak pawl tuah thlang ding kan si. Hivek a thupi mi thutluknak tuah can ah kan miphun thawn sutronawknak um lo in, phunpi level ramkhel relkhawmnak um lo in, ziang thu kan va thlen ve ding? Ziangmi thusuak thawn kan va relkhawm ve ding? Kan hrangah thih le nun tluk ih a thupi mi ramkhel relkhawmnak a si,” tiah Dr. Salai Lianhmung cun a sim bet.

Rakhine ramkulh sungih ramkhel relkhawmnak tuah an siansak hrih lo thu thawn pehpar in, Arakan National Pary Hotu Dr. Aye Maung khal in, “Vei Hnihnak Tonkhawmpi hi kan party in kan kai ding maw kai lo ding, kan kai asile ziangvek kan rel ding timi cu Central EC meeting ko in thutluknak kan tuah ding,” tiah Frontier Myanmar hnenah a sim ve.

Kah-cawlh hmin sign kar zo pawlkom pawl umnak hmun ah phunpi level ramkhel relkhawmnak tuah ding ah UPDJC cun kalhmang a tuah ko nan, tuini tiang ahcun cozah lam in tlamtlingtei’ ttuansuahnak lam ah a muangcang tiah Dr. Aye Maung in a faksel.

Cozah thawn kah-cawlh (NCA) hmin sign kar zotu pawl tla cu KNU, ABSDF, DKBA, RCSS/SSA, PNLO, KPC, ALP le CNF pawl tla an si.

Hram: Frontier Myanmar

Comments

comments

Comments

%d bloggers like this: