CNF In Arakan Army Pawl Tlansuak Dingin Ngen; CNF  Le Rampi Ralkap Lo Ralkap Dang Um Lo Ding

Lian Hmung Sakhong le Zing Cung

Myanmar ralkap pawl le Arakan Army (AA) pawl December 12, 2016 ih sml pahnih lenglo an rak kahawknak ruangih Chin ramkulh Paletwa ih AA ralkap tangta mi pawl cu Chin National Front (CNF) pawl in tlansuak dingin an ngen.

CNF Chairman Lian H Sakhong cun January 28 niah Arakan ralkap pawl in Chin ramkulh sung ih an thiltuah mi pawl cawl thluh dingin le Chin ramkulh ihsi suak dingin ca an suah tiin the Myanmar Time cun a tarlang. ‘Zo ralkap pawl an si ti cu tarlang ka duhlo. Kan ca suah mi cu pakhat le pakhat doawknak ding le buainak dinghrang a siloih remdaihnak hrang a si sawn. Asinan, CNF silo mi ralkap dang le acozah ralkap pawl an doawknak ruangah le kan umnak hmun ih mipi pawl in an ruun inn pi an suahsan a tul phah’ tiin Salai Lian H Sakhong cun the Myanmar Times pawl hnenah a sim.

A sim bet mi ah, CNF le rampi acozah ralkap siarlo Chin ramkulh ah ralkap dang um lo dingin lungkimtlangnak 2012 ah ralkap bupi thawn an rak tuah mi khal a rel tel. Thuhram laknak ih a tarlang dan ahcun an ca suah mi hi CNF central committee a vei ruknak conference January 20 – 25, 2016 ih an tuah mi ihsi an tarlang mi a si tiin an tarlang.

Hi thuthawn pehpar in AA ralkap hrang thusimsuaktu Khine Thu Hka cun CNF pawl in Arakan Army (AA) pawl suak dingin, dan vek ten thuhla simthannak zianghman kan dong lo tiin a ti. Chin ramkulh thlanglam ah kan ralkap pawl an um timi cu a dik mi a si titla cun a sim.

CNF general Secretary Salai Thla Hei cun AA ralkap pawl in khaw mi pawl cu lam an hruai ter ih, mi hrekkhat pawl tla cu doawknak hmun ih bomb thangkam mi pawl an pal ngah ruangah an nunnak an liam phah tiin a sim tiah Burma News International pawl hnenah a sim. Ralkap pawl in phun dangdang in khaw mipi pawl an hmuhsuam titla in a ti bet. Hi tiih an puh mi cu a diklo mi a si tiin Khine Thu Hka cun a let ih hitin a sim, ‘ kan ralkap pawl in khaw mipi pawl hi hnatuantu dingah kan la lo ih, hmuhsuamnak khal zianghman kan tuah lo a si’ tiin a ti.

The Chin National Front (CNF) hi October 2015 ih rampi kaihdaih lungkim tlangnak bupi Nationwide Ceasefire Agreement (NCA)  ih hmin namtu tlangpar mi ralkap bu 8 lak ah a tel ve. Arakan Army (AA) pawl hi hmin nam ve lotu pawl an siih Northern Alliance-Burma timi pawl tlangpar hriamhrei keng ralkap bu 4 pawl:Kachin Independence Army (KIA), Ta’ang National Liberation Army, Myanmar National Democratic Alliance Army (MNDAA) le the Arakan Army (AA) pawl lakih tel an si.

  • Myanmar Time

Comments

comments

Comments

%d bloggers like this: