Ciinken Dingmi Nunnak Pakhat

 

June 8 

Tlawngkai Nikhat

 

Ciinken Dingmi Nunnak Pakhat

 

Siar:

Saam 139:1-16

 

Harsatnak a phunphun lakah in bawmtu cu Amah Pathian a si.

-2 Korin. 1:4

 

Kumkhat Sung Baibal:

   2Sansiarnak 30-31

   Johan 18:1-18

 

“Ka pa, na fanu kei i ruun hram aw” timi aw-au cu a thizik ih a thaw a hawl rerotu Christine ih netabik ttongmi a si. Kum 14 a simi fanu Christine cu a liamciami nihnih Tlawngkai Nili ni ah ‘ka dam lo’ a ti ih hmakhat te’n a nunnak a cem tamai. Zarhte ni ah a nu le a pa hnenah cuti ih a simmi a si.

 

Alaska state, Soldotna ih ummi Christine tei’ innsang teih kawhhran ah Christine a thih hlan ihsin thuthangttha sim dingin an timtuah ciami a si. Christine ih ruak an vui hnu a thaisun ah kei pulpit parih ka thlen hi cu Pathian ih timtuah cia thilcangmi a si.

 

Christine hi Jesuh Khrih a zumhnget ih a duhzettu, Bawi Khrih hrangah a nungtu fala tleirawl te a si. In thihsan tikah kan thinlung sungah khuaruah ding a tamter. Kum reinawn zo ah keimah rori in tleirawl fala note ih thihsannak ka rak tuar dah zo ih mangbang vansang le thinkhur ih a ummi riahsiat tuar kawhhran sungtel pawl kha thazaang peknak ka nei thei.

 

Pathian ih thuneihnak kim cu kannih in kan amen a ttul mai si ko. Saam 129:16 ih a um vekin Christine ih nunnak cu Pathian in caan bikhiah cia vekin a si timi cu a pakhatnak ih ka thazaang peknak a si. A pahnihnak ah, Christine tei’ innsang hi hngilhsan lo dingin kawhhran sungtel pawl kha raalrin peknak ka nei. Thla 2 a rei khal le, kum 5 a rei tla le Christine tei’ innsang cun Christine cu an hngilh thei hrimhrim lo ding. Anmah ngaihven ih thapek ding cu an ttul ringring ko ding.

 

Cuti ih an tuarnaa caan ah Pathian in ziangtinkim a kil thei, midang pawl kha thapek le va hneem thei dingin a duh timi hngilh hlah uhsi!

 

Thinlung kekkuai le rethei zonzai a tuarmi pawl,

Thinglamtah ah mah le mah a thlai awtu;

Rundamtu in ziangkim ka kil ti’n in sim.

 

Thinharnak nelrawn ah hnangamnak cerhti cu Pathian hnenah a um.

(Visited 37 times, 1 visits today)

Comments

comments

Comments

%d bloggers like this: