CHRO Ruangah Chin Mi-In Mizoram Ah Harsat Nak Tuar

March 02,2009.

CHRO Ruangah Chin Mi-In  Mizoram Ah Harsat Nak Tuar

Mizoram Aizawl khawpi ih Kan Correspondent hnen ihsi thu kandawn nakah Mizoram sungih a ummi kan Chin mi pawlin harsat nak kan tawngih kantawn bet vivo a zumthu khal a simbet, Mizoram ih kan Chin mipawlin harsat nak an tawm naksan cu  Internet website pakhat Human Rights watch (HRW) ih ttuanvo neitu mi Pakhat Amy Alexander in  January 27 2009 ih a suahmi Life For Chin In Mizoram timi ca tamzetah Mizoram YMA leh mipi pawl hnen ihsi Burma ramih Chin mipawl in harsat nak kantawn danpawl tamzet tar lang asiih. Cu ruangah YMA leh Mizo mipi pawlcun Burma ramih si ralut Chin mipawlin  YMA hmin tisia in inzuar thlai ih inti mualpho ter tiin an thin a hengzet tiah asim.

Himi thuthawi pehpar aw in Surbung Tlang Thuthang cun a hnuailam vekin thusuh nak malte a nei.

Surbung : Himi thuthawi pehpar aw in Tuidin hmunah kan Chin miin Mizoram sungah Ziang tivekin harsat nak nan tawng?

Corr  : Himi thu ruangah vuak leh velh kaih leh hrem cu kan tawng hrihlo. Asinan Khawlak Mipi leh kan umnak vengsung YMA pawl cun danglam zetin in hmu thlangih  Inn luahding kan hawl tivek ah hmuh a harzet, Cui tlunah ttongkam mawilo leh duh umlo zetzet in mipi pawlin in be thlang asi. Tui dinhmun kanan tawnmi pawl hnakih thil pawi sawnmi cu  himi thu ruangah Mizo leh kan nih Chin mipawl Ule nau kan sinak pumkhat kansi nakhi a siat dingih leh hnutiang ah hmuh thiam awklo nak a suak pangding timi hi phan a umzet.

Surbung : Hi thu pawlcu zo in (HRW) pawl hnen ah an thlen?

Corr  : CHRO) pawl an si

Surbung : (CHRO) timi cu ziang asi? Ziang vek hna an ttuan? Ziang ruangah himi thucu (HRW) pawl ih hnenah an pe?

Corr  : (CHRO) timi cu Chin Human Rights Organazation, asi ih  CNF hnuai ih pawl Kawm pakhat asiih  CNF party hrangih hnattuantu CNF kut le ke bik an si. an hnattuan micu  relzo vekin CNF Party hrang a siih.  a minung pawlkhal CNF party mi lehsa pawl an si. CNF party hi kan ram mipi zohman in an zum nawnlo ih an Support duhlo ruangah  CNF hmin in ramsung ramleng khalah zianghman an tuah thei nawnlo ruangah (CHRO) hmin hmang in hna an ttuan tinak asi bikko. Cun (CHRO) pawlin (HRW) pawl hnenih himi thu an peknak san cu an mai Party hrangah hamtthat nak leh hlawknak thil a um ruangah asi bik ding. Asinan ziang mi hlawknak leh hamtthat nak an ngah ticu fiangten kanthei ban velo.

Surbung : Asi len (CHRO) pawlin (HRW) pawl hnenih himi thu an pek ruangih kan mipi Harsat nak nan tawn miah ziangtin mipi in (CHRO) pawl hnenah thinlung put nannei?

Corr  : Kan mipi pawlcun (CHRO) cu ziangmi asi tikhal an thei cuanglo ih a umle umlo khal an thei cuanglo ih  (CHRO) pawl ruangah harsat nak kantawng ti khal an thei cuanglo. (CHRO) pawlin an mahle party CNF pawl hrangih Hlawk nakding an tuahmi cu sawisel theitla an si cuanglo ih. Asinan a pawi zetmi cu kan mipi Politics lam zianghman theilo leh tello pawl mahte sumpai hawl men leh ei le in ding hawl men pawl hrangih  harsat nak an suahter cu a pawizet asi.(CHRO) pawlin CNF party hrangih hlawk nakleh ham thatnak an tuahduh asi hman ah Mipi hrangih harsat nak thlengter lo dingin tuah haisehla a duh umzet.

Surbung : Himi thuthawi pehpar aw in Cozah lamih sin teh harsat nak nantawm mi a um maw?

Corr  : Himi thuthawi pehper awin  Cozah lamcun ziang harsat nakhman kan tawnglo. State Cozah hi Congress Ministry asiih an felzet. Asinan  Home Minister Pu Lal Zir Liana cun  Mizoram ih sualnak tamzet lakah  Burma mi hi an teltam zet ringring ih misual cu kan kai asiah cun Mizoram thawng Inn  ah ret loin Burma ralkap hnenah kan pe thlang ding asi  ati ih himi cu an mah Cozah lam thu suak hrimhrim asi kazum.

+++++++++++++++++++++++++++++++++++++

President Joao Bernardo Vieira Kap That

Kum 1974 ih Portugal ram ihsi Independent ngah Africa ram pumpi thlanglam ih um Guinea ram President, Joao Bernardo Vieira cu mizan ah  an ram khawpi Bissau ah kahthat asi.Himi hlante mizan zing khalah an ram ralkap hotu bik General Batista Tagme na Wai cu  Bomb puak ruangah a thiih midang 5 in hriamhma nazet an tuar. Hi President kapthat tu pawlhi an ralkap suaksual tlanhlo pawl an siih. Tui dinhmunah Guinea ramhi zo in a Uk dingti khal thei fiangthei asi hrihlo an buai zet lai asi. An ram khawpi Bissau ah hin meithal puakkhal a tamzetlai ih  an ram khawpi Bissau ih Radio Station pahnih khal ralbawi pawlih thupek nakin khar asi.

General Batista, kiltu Lt, Col, Bwan Nhamtchio, cun an ralbawipa cu a zungsung ih a tolai Bomb ih den asiih a thicih lonan a hma a nattuk ruangah a hnu reilo te ah a thi tiah asim. Tu tiangah hin misual pawlcu an kaisuak thei hrihlo. Nikum November thla khalah  President hi a um nak Inn sungah meithal in kah ciamco asi zo ih, Asinan nungdam in runsuak asiih cumi hnuah nasa zetih kilhim a si nan tuah cun an run kapthat sal thotho asi.

Guinea-Bissau ramhi  Independent an ngah ihsin rambuai ram farahzet leh Politics buai ringring  a Cozah hnget khal neitheilo ram an siih.An ralbawi pawlkhal ritthei thil thawi sumdawng ih nung an tamzet.

Gaza Tuah Thatsal Nakding Thu Relkhawm

Israel leh Hamas pawl an Do awknak ruangih Israel in Gaza bial a tisiat mipawl tundin thatsal dingthu rel tlangdingin  leitlun ram 75 ai awhtu pawlcu  Egypt ramih Sharm El-Sheikh ah tawnkhawm awknak an neiih. Hi an tawmkhawm awknak ah hin  US Secretary Of State Hillary Clinton khal a telih. Hillary Clinton hin Gaza bawnnak ih US in Dollar Million 900 a thawh dingthu khal a puan cih zum asi.

Relzo vekin Israel in Gaza a kahnak ah khan Inn thawng tampi leh thilri dang tamzet a siatih. khai an do awknak ah khan  nauhak 412 telin minung 1300 lenglo an thi asi. Tu khalah Israel ralkap pawlih remti nak umlo cun nitin thilttul ei le in tivek menlo thildang Gaza tundin that nakding thilri dang cu Gaza ih phurhlut theih asilo. Israel cun Gaza bawmnak ih sumpai a thawhthei tu ding pawlhnenah Paisa cu Hamas pawl hnenih pelo dingin a dilhai. Hamas pawlcu US leh Europe ram pawlcun Tapung Cazin ah a retzo.

Hamas leh Israel Do awknak kha tui January 17 ah khan rualrem awknak Ceasfire an tuah ih. Gaza tuahthat sal  nakding thurel nakah Hamas leh Israel cun palai an thlah veve ih Palestinian Authority President Mohmoud Abbas cun Gaza tundin thatsal nakdingah Dollar Billion 2 leh Million 8 hrawng a tul dingtiah asim. Bawmnak sum thawhtu pawlcu Hamas pawl ih kutah pe loin Palestinian Authority kutih pe ding ah a dilhai. Hillary Clinton hin Israel leh Palestinian pawlih umnak hmun pawlkhal zoh vivo a tum. Gaza tundin thatsal nakdingah Saudi Arabia in Dollar Billion 1 thawh a tumthu a punag.

Comments

comments

6 Comments

  1. Surbung cu thil taktak athei lo asi hi. HRW report khal a chiar lo ti cu a fiang zet. HRW report khal a na zat nain thil hman lomi a um lo. Thudik lawng2 si an ngan. Mizo mipi hi sin thudik relnak ah an hningzak in thinheng zet in an um aw ter rero. Mizo cun Laimi cu an ram ih sin an dawi rero theo, cu mi report an nganmi ruang ah in lo hmusit ti cuh ruat hnik aw? Cuih hlan khal ah an lo hmusit rero zo ual, hnihsawh, remlo tivek cu zokhal mimal par ah a mutri ual.

    YMA pawl khal an mah le mah nasazat an an zohaw ve ih, aa, kan tisualnak hi kan rem aw thlang a trul si an ti aw zo si hi. An hruaitu pawl khal ka biak ve treo i, an thinhengnak an langh uter nain, ahnung ah cun, aa asi, kan thiam lo asi hi. YMA cu ka rem aw a ttual an ti ttheh/.

  2. Dear Chinland Today,
    Nan thuthang ngan mi le nan thuanthu nganmi pawl mi tampi in an thathnem pi phah ding ti ah ka zum. Nan tuan nak le taimak nak par ah bulpak in ka lo lawm zet hai. A si nan, nan thuthang nganmi par ah ka ruahnak malte lo hlawm ve ka duh. Thuthang ca mizapi hrang ah a dik thei bik le a tha thei bik ih nan suah thei ding hi siartu pawl hrang ah a pawi mawh tuk ih nan rakrin thiam zet a tha in ka ruat. Mirang tong vun sang seh la, MEDIA (magazine,newpaper,TV news etc..) hi ram le miphun thangso tertu le hmunnak kau zet zet le fimnak pe tu a si rual rual in a diklo mi media hin mipi a ti siatsuat thei ih thinlung put tiang a ti dang lam thei fawn. Cun,tu ih kan miphun dinhmun tla ah cun lamtang (BIAS) nei lo zet le a dik zet ih a suak mi thuthang hi kan pawi mawh ih kan mamawh zet fawn. Cun,thuthang kan suah dik ah belhcian dawl lo mi pawl hi kan hrial thiam a tha zet ding ti ah ka ruat. Ti duh san cu, kan thuthang suah mi hi evidence/facts thawn kan support thei maw ti hi kan ruat a tul zet. Cu ti a si lo le, mi pakhat maw/pawlkom pakhat maw kan huat ruang ah maw kan duh ruang ah maw a thuhla kan ngan men men a si ti ah siartu pawl in an ruat thei. Thuthang nan suahmi lak ih thuthim nak pakhat ka pek duh mi a um, “CHRO ruang ah Chin mi in Mizoram ah Harsat nak Tuar” ti mi kha vun zoh hnik uh sii. CHRO in Human Rights Watch ah thuthang a pek mi ruang ah a si ti ah ngan a si. Nan palai interview nan tuah mi khan ziang vek ciah a si ti kha a thei fiang lo in a lang. Cun, CHRO pawl in an mah party CNF hlawknak ding ah an tuah mi a si ti ah nan tarlang rual rual in ziangvek hlawknak an ngah thei ih ziang vek hlawknak an beisei ti kha kan theilo ti ah ngan a si tik ah siartu pawl cun nan cangan mi kha ziang ti vek in an ruat cio ding ti cu theih thei zet a si..A tha zawng ih rak ruat tu an um rual rual in mihrek khat cun, CHRO/CNF an huat ruang ah an ngan men mi a si ti ah an ruat thei ih nan thuthang nganmi le nan ca suahmi pawl hmual a neih ding tluk in a nei lo thei ti hi a phan um zet. Cun, kei mah ih ka zoh tawk cin ih ka hmuh ve dan cu hi ti a si..Human RIghts Watch pawl hin CHRO ih report lenglam ah an mahte document an tuah mi tampi a um. An mah HRW minung pawl rori ih kan Chin mi ziang maw zat hmaton in maw phone maw email in maw interview an tuah ih thuhla an ngah mi an um ti cu a fiang..HRW website le report pawl nan zoh a si le nan hmu thei ding. Ka duh san sawn cu, Chinland Today hi lamtang neilo (non-bias media) mi nan si duhsak nak ruang ah le belhcian dawl mi thuthang lawng hi nan suah thei nak ding duhsak nak thawn ngan mi a si. Cun, pawlkom pakhat khat maw minung pakhat khat ih thuhla kan ngan a si le an siat nak kan theih vek in an that nak a um le theihhngilh lo in, bukaw tawn(balance) zet ih ngan tla hi siartu mipi hrang ah cun a hlawk phah in kan thathnem pi phah sawn theu. Zuam sinsin uh!
    Ka ngansau deuh ih ngan sual mi a um le in ngaithiam uh!
    Lungawi!
    San Thang
    Indiana, USA

  3. Ummm…… keep fighting CNF, CHRO, CF, Chinland Guardian, Khonungthum and all organizations which are working for the Chins not for their fat, big bellies.

    I used to think that Falams are most flexible people among the Chins but things I have seen in the past 10 or more years tell me that Falams are the most selfish peoples among the Chins.

    Well, lets see how long this website will last? Many organizations are formed, news agencies were established and associations were created by Falams but so far none has reach it’s 10th anniversary.

    Bla Bla Bla

  4. Dear Chinland,

    Nan correspondent hi thu thei lo zet a si i, hi vek thuthei lo mi thawn interview nan tuah ciam co ruang ah hin nan website quality a niam ter zet i a pam hai tuk ka ti.

    CHRO thu a sim mi hi a thuphan perh mi a tam sawn. http://eng.chro.org/index.php?option=com_content&task=view&id=4&Itemid=13 hi nah hin khilik aw la, CHRO thuhla cu tamdeuh nan thei thei ding.

    1. CHRO cu CNF hnuai ih pawl Kawm pakhat asi na timi hi a dik lo. CNF le CHRO cu an dang lam zet. CNF cu hriamkai bu an si i, CHRO cu NGO an si. CNF cu political a si i, CHRO cu non-profit NGO men a si.

    2. CNF cu Chin miphun i political hna tuan mi hmuah hmuah lak ah tu lai ah cun a tha zang a cak zetmi a si ko tihi, kan duh khal le duh lo khal le a fiang mi a si. Leilung tlun ah thu an sim thei zet hrih ko. CHRO hmin hmang in an sim ciamco a tul lem lo ding ka ti.

    Cu le Lian nih a sim vek khan, hi nan corespondent pa hi HRW report tla ttha tein a sir lo, a sir tla sir seh la, a thei thei men lo ding. A thusim hi zum ding an har zet, ca sir lem lo i sim men men mi a bang ee..!! delete men aw……….:) Nan website quality a siat ter men……:( 😀

  5. CHRO thuhla thawn pehpar in mi tampi in comment nan rak ngan ih kan lungawi zet. Kan Chin media pakhat a si ve mi CT cun kan Chin mipi ih an dinhmun diktak a phuang suak ding. Cumi a phuansuah nakah ziangmi lungawinak, harsatnak an tawnnak asan cu a tarlang hrimhrim ding a si fawn.

    Himi CHRO thuhla a dik le dik lo cu CYMA president Jh Zoremthanga le CT ah rak siar aw. CT in zohman a ttan lo ih, a dem fawn lo mipi a dinpi vivo ding.

  6. Ka rual CT,
    Thuhla hi na ngan hlan ah hlat hmai sa aw… CYMA president Jh Zoremthanga thusut pa tla kha HRW report a sial lo hmang ka ti. Hi vek in ca kan nganngan ringring le cu Unity a rawk ding. BBC burmese ah tla hi vek thuhla ngan dan a um ih rak study ve aw. CT hi CT si hram seh~

    na rual,
    chumto
    South Korea

Comments

%d bloggers like this: