Christmas – Pathian Ih Damternak

December 23

Tlawngkai Nili

Christmas – Pathian Ih Damternak

Siar:

Johan 1:10-18

Zaangfahnak le thutak cu Jesuh Khrih sung ihsin a ra.  – Johan 1:17

Kumkhat Sung Baibal:

–   Nahum 1-3

–    Thuphuan 14

Na siibawi in aw thupizet in a lo ko ih, “A zamrang thei tawp in ra aw. Thil thupi lo relpi ding ka nei,” a lo ti asile thuthang sia a nei ti na thei. “Ka thei paih lo,” na ti men ding. Asinan damternak ding a um ti na theih duh ruangah a hnen na feh.

Kan Siibawi Maksak, Pathian khalin minung ih thlaraulam dinhmun ah thuthang sia a nei. Ralrinnak a pekmi an pahbal ih ei lo dingin a khammi thingrah cu Adam le Eve in an ei tikah Pathian in minung zate’n taksa le thlarau ah an thih thluh ding thu Adam hnenah a sim. Cumi cu thuthang sia a si.

Asinan Pathian in remrel daan a pek. Runtu pe dingin thu a kam (Seem. 3:15). Johan in, “Zaangfahnak le thutak cu Jesuh Khrih sung ihsin a ra,” (John 1:17) a ti. Cumi in ziangti’n a tuah ding? A veikhatnak Christmas ah Pathian ih zaangfahnak run keng dingin Jesuh a ra.  Adam vekin misual kan si ruangah cuih thil co tlaktu kan um lo. Asinan sualnak ih a rak suahpimi thil ti linglet dingin Jesuh a ra. Amah cu Pathian hnenah in hruaikir saaltu Thutak si dingin a ra (John 14:6). A minung pawl an sualnak ihsin runsuak dingin a ra (Matt. 1:21).

Kan thlarau nunnak hrangah Siibawi Maksak a si mi Pathian in Bible sungah na thlarau dinhmun a lo simmi kha ngai aw. Jesuh Khrih thawngin a lo pekmi damternak – rundamnak laksawng cu cohlang aw.   – C. P. Hia

Nunnak cu a fiang lomi a si,

Thihnak cu a si tengteng dingmi a si;

Sualnak cu thihnak suahtertu a si,

Jesuh cu damternak a si. – Anon.

Thlaraulam mit-cawtnak cu

Siibawi Maksak lawngin a damter thei.

Comments

comments

Comments

%d bloggers like this: