Christmas Hmangfuhtu

Christmas Hmangfuhtu

 

– Run Cung Mang (LCF Malaysia)

 

Thuhmaihruai:

Thil ziangkim ah “tifuh le fuh lo” a um. Cuvekin Puai feh le hman khal ah hmanfuh le fuh lo a um thei. Tuih kum Christmas Puai hi a hmangfuhtu nan si cio theinak dingah duhsaknak tumpi thawn thazaang lo pek ka duh. Chritmas thuanthu nganmi Bible sung ihsin Christmas hmangfuhtu pawl ih nunnak zoh in thlarau thazaang la cio uhsi!

 

A Pakhatnak ah Mary (Luke 1:46-47)

Nu thianghlim Mary cu thinlung thianghlim le nunnak thianghlim neitu a si ruangah Pathian in leitlun mi pawl Rundamtu Messiah suahnak ding hmun thianghlim ah a hril. Seemtirnak 3:15 ih simmi bangin “Nunau ih cithlah (seed)” timi cu mipa ih cii tel loin Thlarau Thianghlim in Mary ih Favun thuhla ah a famkim. Pathian in Satan lu rial beektu dingah a tiamkam ciami Jesuh Khrih a nunnak ih a tonteh ngah tikah a nunnak cu lungawinak in a khat. Christmas a hmangfuh ruangah hiti’n hla a sak: “Ka thinlung Bawipa cu a thangtthat, ka nunnak cu i Rundamtu parah a lung a kimzet” a ti. Kannih tla leitlun tisa daan in si loin thlarau daan in Christmas kan hmangfuh asile Mary bangin, kan thinlung in Bawipa a thangtthat thei dingih ziangvek dinhmun te khal in kan nunnak cu in Rundamtu Khrih sungah thlangamzet le diriamzet in a um thei ding.

 

A Pahnihnak ah Tuukhal pawl (Luke 2:8-20)

Christmas lungawinak thuthangttha le a hmaisabik Christmas Carol Singing thei ngahtu cu tuukhal pawl an si. Mi tangdor le thungainak nun an neih ruangah thluasuah an dong. Pathian vancungmi ih thusimmi kha an thinlung zaa ah zaa an zum ruangah a simmi cu zoh dingin hmakhat te’n manhlapzet in an feh ih an va zoh. Vancungmi ih sim bangin Joseph, Mary le caw rawl einak kuang sungih an hlummi naute Jesuh cu an va hmu. Upatnak thawn an biak tikah an nunnak a danglam, a thlengh aw. Ahlan ih mi ttihhrut an sinak a hlo. An lungawituk ih an hmuhmi le an theihmi thu pawl cu midang hnenah an sim ngam. Raaltthatnak in an khat. Culawng si loin Christmas an hmanfuh hnu cun lungawizet in Pathian thangtthat hla sakin an umnak ah an tlungkir ti kan hmu. Kannih tla tangdornak thinlung thawn thungainak lungput in thinlung takih Jesuh kan zum ahcun lungawinak, thlangamnak le raaltthatnak kan nei dingih midang pawl hnenah tettikhan kan ngam ding, rundamnak thu kan sim ngam ding.

 

A Pathumnak cu Mifim pawl (Matt. 2:1-12)

Bible thiam pawl ih ti daan ah himi pawl hi Judah mi si loin Gentile mi pawl an si. Anmah hi arsi zoh thiam (magi) pawl an si. Pathian in mifim pawl hnen ahcun an fimnak ihsin Amah an ton theinak dingah lamzin a sial sak  hngai. Van arsi an zirzoi rerolai ah siangpahrang arsi a hmuter. Cuih arsi an hmuh tikah a phundang ti an theithiam ih siangpahrang tong dingin an tim an tuah ih an pok mai. Theih cianak zianghman nei loin van arsi ih lamhruainak thlun in an hawl vingvo. Pathian zaangfahnak ruangah Joseph, Mary le naute Jesuh cu an tong ngah. Bible thiam pawl le puithiam saang pawl cun profet Micah in simciami an thei nain an zum duh lo, naute an hawl duh lo. Asinan mifim pawl cun thinlung takin an hawl ruangah an tong ngah. Tangdor in khuk bil in an biak. Laksawng mankhung an pek. Christmas hmangfuhtu an si hnu cun an nunram cu lungawi hnangamnak hlir in a khat. Pathian ih fimzirhnak an co ih an thinlung thlengh in lamzin dangin an tlung. Kannih tla Christmas hmangfuhtu kan si ve ahcun kan thinlung put le kan nunzia a danglam dingih kan nun daan life style tla a thlengh aw thluh ding. Mah ih leitlun fimnak le thiamnak rinsantu si loin Pathian rinsan in kan um ding.

 

A Palinak cu Putar Simeon (Luke 2:22-35)

Putar Simeon hi Judah mi lakah kum upapi a si zo. Khuahlanlai profet pawl ih an rak sim ciami Messiah suahnak thuhla rak thei ciatu mithiang a rak si. Leitlun khawvel nom ceennak taanta in thlarau nun a thupittertu, Biakinn sungah rawl ul in thlacam ringringtu le thinlung thianghlim le tangdornak neitu a si. Messiah ka hmuh ngah lai hlan lo i thihter aw hlah ti’n thinsauzet in Messiah rat ding hngaktu a si. Pathian in miding le thinlung thiang neitu ih thlacamnak aw cu a ngaisang ih Jesuh Khrih naute a hmuhter. Simeon cu a diriamtuk, a lungawi in a hnangamtuk. Naute a cawi ih, “Na sal pa kei hi thin hnangam tein thih ding i siang zo” a ti thei. Zumtu kannih tla Christmas hmangfuhtu taktak kan si ahcun ziangvek kan va si hmanah hnangam te’n thih ding khal ttih loin kan um thei ding. Lung diriamzet in Khrih hrangah kan nung ngam ding.

 

A Panganak cu Pitar Anna (Luke 2:36-38)

Anih hi pitar kum upa thlarau mizet a si. Thlacam nun neitu a si. Biakinn ah a sun-zaan in a um ih rawl ul in thlacam ringringtu a si. Leitlun nom ceennak siseh, khawvel buaibainak ziangkim siseh, ziang hmanah siar nawn loin le duhhamnak nei loin,  Pathian hnenih thlacamnak hi a lungawinak le a rawl thawbik cu a si. Curuangah Pathian in a thinlung a hmu ih Jesuh naute Simeon ih a hmuh caan ahkhan an kiang ah a umter ve. Naute Jesuh a mit rori ih a hmuh tikah a lung a awituk, a hna a ngamtuk. Thih ding khal a ttih nawn lo, ziangahtile a thlarau cu kumkhua nunnak vanram ah a thleng ti a zum hnget. Culawng si loin midang pawl hnenah a hmuhtonmi thu le hla pawl a sim ih a hlawm. Kannih tla Anna bangin thlacam nun neitu le Pathian pawltu kan si ihcun Christmas hmangfuhtu kan si thei ve ding. Cuticun raal tthazet le hmual neizet in thlacamtu le thuthangttha midang hlawmsintu kan si thei ding.

 

Thunetnak

Christmas hmangfuhtu si zuam uhsi! Veiziat Christmas ka hmang? timi hnakin diriamzet in ka hmangfuh maw? timi hi thungaithlak ih ruah a ttul sawn. Tisa daan hlir ih Christmas hmangtu kan si le diriamnak um loin lungkim lonak le midang va dawtnak hlir in kan khat ding. Sihmansehla Bible sungih Christmas hmangfuhtu pawl: Nu thianghlim Mary, itangdor Tuukhal pawl, Nisuahnaklam Mifim pawl, Putar Simeon le Pitar Anna pawl vekin kannih tla kan nunnak a thlengh awk ahcun Christmas hmangfuhtu kan si thei ve ding. Thinlung thianghlim le nun thianhlim kan neih ahcun Pathian Thlarau kan sungah hna a ttuan dingih lungawinak, hnangamnak le huham cahnak kan nei ding. Christmas hmangfuhtu kan si dingih mi lungawi le mi thluasuak kan si ding.

Comments

comments

Comments

%d bloggers like this: