Christmas Can ih Kahcawlhlawknak

12311084_995976883792929_5239284699506993170_nRalbuai Ttumkhatnak a thok hnu thla nga lawng a si lai can ah a si. 1914 kum December 25 ah lainatawknak um lo ih thahawk rero ningkhong le beidong German, British le French ralkap pawl cun an tlunlam thuneitupawl ih thupek dokalh in an ralpawl thawn unauawknak an tuah. Unauawknak tuahtu ralkappawl hi Nitlaklam Ralhmai ih ralkap tthen-thum tthen-hnih an si. (Himi hi ralbuai lai ahcun thih dantatnak pek theih mi a si). German ralkap pawl cun an ral-bawh-khur tlun ah Christmas thingkung an phun ih, “Merry Christmas” timi ca an tar.

“Kan lo kap lo ding, in kap ve hlah uh,” ti’n an tiam aw. Mithi ruak ttawihsiat ih khat hmunram ahcun ralkap thawng tampi an tong aw khawm. Christmas carol hla an sak tlang, inn lam ih an duhdawt mi pawl ih zuk an thleng aw hai, an neih mi lamcaw an hlawm aw, bawhlung an sit ih, vok tthenkhat khal an rawh tlang hai. Cumi hlan nazi malte ih thahawk rak tumtu ralkappawl cu an pom aw. An tlunlam thuneitupawl in kap aw ding ah hranhram ih an nor asile theihter aw cia ding in le an meithal cu tlunlam ih kap ding in an lungkim tlang.

Khatlam khatlam ih tlunlam thuneitu pawl lakah thinphannak a thleng. Pakhat le pakhat unauawknak phuangsuak in doawk a duhlotu ralkappawl cu ralbuai lai ahcun mi siatsuahtu ah ruat an si. Khatlam khatlam ih ralbawipi pawl cun hivek ih remdaihnak tuah hi phatsanawknak a si ih, thih dantatnak pek ding an si tiah an phuang. Cutin, 1915 kum March thla ahcun unauawknak hriphang cu an satcat ih thazang hmuahhmuah suah in an do aw sal. 1918 kum ih ralthuam an thlah tik ahcun, leitlun pumhuap ah minung million hleinga cu thah an si.

Christmas Can ih Kahcawlhlawknak rak um mi thuhla hi mi tampi in an rak thei lo. 1988 kum ih Christmas Ni ah Boston Globe thuthangca in tualsung FM radio pakhat in “Ral-bawh-khurpawl sungih Christmas” (Christmas in the Trenches) timi hla a suah. Cumi cu Christmas Can ih Kahcawlhlawknak thuanthu kha hla ih tuah mi a si. Cui hla cun mi tampi a hngong. Cumi hla cu Christmas awllen camher lai ih FM radio zung ah suahsak ding ih diltu nei tambik hla ah a cang. Radio thuphuangtu cun, “Hla in dil zat hnakih ka thin i tthawngtu sawn cu a thei dahlotu in himi hla an theih hnu ih in sim mi thuhlapawl an si. Thinlung thuk zet tuarnak thawn, ‘Ka theih mi thuhla hi ziangtin si thlang?’ ti ah in sut hai ih, mi tthenkhat cu an mitthli a tla,” tiah a sim.

Radio thuphuangtu a phone-tupawl ziangruangah an mitthli a tla ti na vun ruat thiam men thei. Christmas Can ih Kahcawlhlawknak thuanthu hi minungpawl ziang an si ti ih in rak zirh mi tamsawn thawi’ linglet in a feh. Himi thuanthu hin, leitlun hi hitin si sehla ti ih kan saduhthah mi vek kha a tak in in vun hmuter duak. “A taktak ah vei khat lawng a rak thleng,” timi lawng kan rel thei ti thu men a si. Himi thuanthu hin, minung nun hi thil tenau le hnuaihnung a si ti ih in simtu TV le thuthangca pawl ihsi kan theih mi vek si lo in, kan thinlung sung thuk ih kan thuhhloh mi khawruahnak taktak pawl in vun tharthawh sak (Minung nun ih thupitnak in mangsuakter). Himi thuanthu theih hi, leitlun hi a danglam thei taktak a si, timi kan thinlung thukbik ih saduhthah pawl an dikzia vun theih vek a si.

#David G. Stratman in a cabu “We Can Change the World” sungih a ngan mi “Christmas Truce” leh mi a si.

(Visited 211 times, 1 visits today)

Comments

comments

Comments

%d bloggers like this: