Christian Le Acozah

Timothy Sui Lian Mang

Pakistan ”Cule annih in, “Kaisar‑ih zuk le hmin,” tiah an sawn. Cun anih in an hnenah, “Kaisar‑ih tapawl cu Kaisar hnenah pe uhla, Pathian‑ih tapawl cu Pathian hnenah pe uh,” tiah a ti.” (Mat. 22:21)

Baptist kawhhran danglamhleicenak a pariatnakah kawhhran le acozah cawkpawlh lo ding ti mi a um. Cumi umzia cu leitlun ih in uktu acozah hi kan khristian zumnak le Bible thu kalh lo ih in uk a si ah cun an thu khal thlun thluh ding a si. Asinan kawhhran cu Bible ih in zirhdan vekin acozah thawn pawlkawmnak nei lo ding a si. Acozah khal in kawhhran cu a kilhim ding a si ko nan an hna ah a luhcilh lo ding, a hrawlh aw ve lo ding.

I. ACOZAH CU PATHIAN DIN MI A SI

Pathian ih din mi thil pathum a um. A pakhat nak cu neihawknak asilole) insungsang hi a si(Sem.2:20-25). A pahnihnak cu kawhhran a si (Matt.16:18) ih, a pathumnak cu acozah hi a si.

Adam le Evi in Pathian thu an ngai lo iih, Eden hmuan ihsin dawisuak an si hnuah fate an run nei(Sem.4:5). Minung hrangah thlun ding mi dan a um lo ruangah anmai duhdan cio in an feh. Cutin Noah tei insungsang siar lo cu bawrhhlawhnakin an khat(Sem.6:5-8).Tilik tla a thlen phah.Tilik ṭheh hnuah Pathian in Noah hnenah thlun ding mi Dan a pe(Sem.9). Cumi ah acozah ukawknak dan lam a tel. Misual cu thah ding mithat cu thah ve ding dan a tel(Sem.9:5,6).

II. ACOZAH LAKIH KAWHHRAN MAWHPHURH

  1. Sawmdawl ding a si (support it) – Rom13:1-7

” Zokhal a tlunih thuneitu sangpawl hnenah tlulut seh. Ziangahtile, Pathian ih din lo mi thuneitu zohman an um lo. Thuneitupawl hi Pathian ih ruat mi an si. Curuangah zokhal thuneitu dotu cu Pathian din mi dotu a si. Cutiih a dotupawl
cu anmah le anmah thuṭhennak an coawter ding. Ziangahtile, uktupawl cu hnaṭuan ṭha a ṭuantu hrangah ṭihnung an si lo. Thil ṭha lo a tuahtu hrangah cun ṭihnung an si. Thuneitu ṭihnak ihsin luat na duh maw? Thil ṭha tuah awla, thuneitu cun a lo lawm ding.  Ziangahtile, thuneitu cu na hnenih thil ṭha tuah dingah Pathian siahhlawh a si. Thil ṭha lo na tuah asile ṭih aw. Ziangahtile, anih cun ralnam cu tumtah nei in a keng a si. Ziangahtile, anih cu thil ṭha lo tuahtu parih thinhengnak thlentu, phuleisamtu Pathian siahhlawh a si.  Curuangah, thinhengnak ruang lawngah si loin sia le ṭha theihnak ruang khalah a hnenah tlulut uh.

Ziangahtile, cu mi ruangah cun siah khal kimten nan pe. Ziangahtile, thuneitupawl cu Pathian siahhlawh an si. Annih cun cu mi hrang roriah catbang loin can an pe.  Curuangah leiba nan neihnak hmuahhmuah hnenah nan leiba cu pe uh. Siah nan bak asile pe uh. Ngunkhuai nan bak asile pe uh. Nan ṭihzah ding mi pa cu ṭihzah uh. Upat ding mi cu upat uh.” (Rom. 13:1-7)

Ziangtluk uktu acozah sia a si hmanah Pathian ih ruah mi le nemhngeh mi a si tho tho ti zumtu khristian cun a theih a ṭul.Thuneihnak cu Pathian hnen ihsi ra mi a si. Siar aw – Joh. 19:10,11. Khriatian cun acozah ih dil mi siah pawl khal rinum zetin a pe ding a si (Rom13:6, 7). Khristian mi zohman in hi mi thu ah tuah lo in um ding a si lo.

2. Acozah thuneihnak hnuaiah tulutawk ding a si (submit to it) – Tit.3:1

Uktupawl le thuneitupawl hnenah tlulut dingin, an thu ngai dingin, thilṭha tinkim tuah dingih tiar cia dingin zumtupawl cu theihtersal hai aw,”( Tita 3:1)

Tit.3:1 in khristianpawl cu acozah thu thlun ding kan si zia a tarlang fiang nasa. Acozah thu thlun ding ti mi hin ralkap lam(hriamnam lam), thuṭhennak lam, hrilawknak lam khal a huap ṭheh. Hi mi thu ah hmang sual lo dingih kan ralrin a ṭul(John17:15).

3. Upat ding a si (Honor it) IPet.2:13-17)

“ Curuangah, milai tuah mi dan hmuahhmuah ah Bawipai ruangah tuhlutaw uh. Siangpahrang dan cu thuneitu sangbik a si khalle tuhlutaw uh. Thil ṭha lo tuahtupawl hrem ding le thil ṭha tuahtupawl lawm dingin siangpahrang ih a thlah mi ram uktupawl hnen khalah tuhlutaw uh.  Thil ṭha nan tuah tikah miaapawl in thei lo ih thu diklo an ṭawng mi dai ko in nan tuah thei ding, cucu nan tuah dingah Pathian duh mi a si.  Mizalenpawl vekin um uhla, asinan, nan zalennak cu sual khuhnak ah hmang loin, Pathian siahhlawh vekin um sawn uh. Mi hmuahhmuah upat uhla, unaupawl cu duhdawt uh. Pathian ṭihzah uhla, siangpahrang cu upat uh.” (1Pet.2:13-17)

Peter in khristianpawl cu ram mi zohṭhim tlak kan si a ṭul zia a tarlang. Kan lung a kim maw kim lo si maw, khristian cun acozah cu Bawipa ruangah a thu ngai ding le upat ding kan si (IPet.2:17).

4. Thla camsak ding a si (Pray for it) – ITim.2:1-6

 ” Curuangah, a hmaisabikah, dilsaknak si seh, thlacamsaknak si seh, midang hrang thlacamsaknak si seh, lungawithu simsaknak si seh mi hmuahhmuah hrangah tuah uh tiah ka lo fawrh a si.  Pathian ngaihsaknak hmuahhmuah le thil zahum hmuahhmuah tuah in, daite le remawtei kan nunkhawm theinak dingah siangpahrangpawl le thuneitupawl hmuahhmuah hrang khalah thla cam uh.  Ziangahtile, himi cu in Rundamtu Pathian hmaiah a ṭha ih cohlan tlak a si.  Pathian cun mi hmuahhmuah rundam ih an um ding le thutak an theih ding a duh.  Ziangahtile, Pathian pakhat a um ih, Pathian le minung karlakah remnak Palai pakhat, Minung Khrih Jesu a um. Anih cu mi hmuahhmuah tlensalnak hrangah amah le amah a peaw. Cumi cu a tikcucan teah theihter a si,”(1Tim.2:1-6)

Khristianpawl cun uktu acozahpawl an pianthar theinak dingah thla camsak ding kan si lawng si loin, 1Tim.2:2 ah zumtu khriatian cu ram mi si in hminṭha mi ka si ding thu a tarlang. Khriatianpawl cun acozah uktu hrangah Pathian lamhruainak ding hrang le Pathian kilhimnak ding hrangah le rundam an sinak ding hrangih thla kan cam ding athupi zet.

Hminisin: Dr. L. Duane Brown, Ph.D, Bidical Basis for Baptists cabu sungta lak mi a si.

Comments

comments

Comments

%d bloggers like this: