Chit San Maung Fanu In Nauhak Pawl Țingțang Tum Zirh

Nge Lay
Tanlyn Khawpi, Hta-ma-lone, Letyetsan khua ih Agape Duhdawtnak Mino Țhansonak Tlawng (အဂၢေပေမတၱာ လူငယ္ ဖြံ႔ျဖဳိးေရးေဂဟာ) cu Iron Cross band ih țingțang tum Chit San Maung tei` nupa ih hruainak in dinmi a si. Kawlram sungih tlangparmi (Taiyinta) miphun nauhak 140 tluk kilkhawinak tlawngah Chit San Maung ih fanu nautabik Nge Lay cu kum 15 lawng a si hrih lai nan nauhak pawl mirang ca/țong a zirh ih hlei ah țingțang thawn pehpar in a thiammi pawl khal a zirh cih thu theih a si.

Himi nauhak cawmnak tlawngih nauhak pawl a ra zirhnak thu ah Nge Lay cun, “Ka pi in nu le pa nei lo nauhak pawl lamzin ih a tonmi inn ah a rak hruai. Cutin duhdawt lainatnak hri in a zelih minung tampi a rak hruai tikah inn ih umter a remcang nawn lo. Thlacamnak thawn an dilnak in himi hmuan hlutu/thawhtu kan nei. Cumi ihsin thok a siih atu cun mi 140 an kim zo. Ka pa in a hlu pe ih bawmtu an um lo caan ah nauhak pawl a bawm. Tlawng a ret. Atu cun buaih ngah ih ramdang tiang tlawng va kai hman an um. Kei cu mirang ca le țingțang lam hi ka zirh. Hivek ih mi bawmtu siih ka lungawinakbik a si. Tlawng khalah ka rualpi pawl hnenah mi bawm a țhatnak thu ka sim țheu” tiin a sim.

Nge Lay cu MIS tlawngah a kai rero laifang a siih September 24 ni ah kum 15 a kim thu theih a si. A pa Chit San Maung ih țingțang tum thiamnak thiamzung ro cotu, pai` keneh thluntu ding a sinak ah Nge Lay cun, “Guitar, keyboard, bass, drum a zaten ka tum thiam. Ka pa cun i zirh man dah lo. Asinan ka paih țingțang tum ka zoh ringring. Zohman in in zirh lo. An tum ka zohnak in keimahte ka tum thiam. Kum 3 ka si fang ihsin țingțang ka thai thok zo. A liamcia kum 5 hrawng ihsin Drum ka tum thok. Iron Cross band thawn Yangon ih an tuahmi show puai tampi ah ka feh. Show ahcun ka tum hrih lo. Asinan Myanmar Instrumental Show an tuah ih cumi ah Girl Band dinhmun in ka rak tum. Ka pa vekih hlawhtling dingin ka zuam ding. Kawlram mipi pawl hrang hmaihngalnak si thei dingin ka zuam ding” tiin a sim.

Source: Popular Journal

Comments

comments

Comments

%d bloggers like this: