Chin’s Got Talent Teltum Mi 100 Lenglo Kim; First Audition Ding Ni A Fiang

Chin ramkulh ih a veikhatnak hrang tuah ding mi Chin’s Got Talent ah Chin mino teltumtu mi 100 leng kai an um zo. Chin mino pawl ih thiam cungcuang mi pholangnak ding a simi Chin’s Got Talent in Chin ramkulh mino pawl tha phur ter ngaingai.

Tutiang ih thuhla kan dondan ahcun Laitlang ihsin teltum mi 70 lenglo an kim ih Lairawn ihsin mi 30 leng an si. Yangon ihsin 2, Singapore ihsin 2 pawl an siih telnak ding form lak zonan pe lut hirh lo khal an um hrih lai.

‘Tuitum ih a zuam tumtu mi tamsawn hi hlasak a si ding, dang lam zetzet khal a um’ tiin Jamie Eng, Chin’s Got Talent zuamnak ih tuanvo nei hotu pakhat cun Chinland Today Media hnenah a sim.

A hmaisabiknak hrang zuamawknak hi Laitlang um pawl hrang cu February 4 – 5, 2017 ah Falam Senpi Inn (Falam Town Hall) ah a si ding. Lairawn um pawl hrang cu February 11, 2017 ah Tahan IPCM, Wesley Hospital hmaiah a si dingih, Yangon le Singapore um pawl hrang cu February 5, 2017 ah a si ve ding ih a hmun pawl cu tuanvo neitu pawl in a teltu pawl hnenah an sim than sal ding.

‘Hminpek theinak ding hrang caan pek mi hi February 10, 2017 tiang a si. Asinan tlawngta nauhak tamsawn an siih an camibuai hrang timlam an tul ruangah Feb zarhkhatnak ah First Audition hi kan tuahnaksan a si. Hmin pe an um sal bet a sile February 11, 2017 ah tuahsal bet a si ding’ titla in Jamie Eng cun a sim.

First Audition ih zohdiktu (Judge) pawl hi CGT talent tawlreltu pawl in an mah le umnak hmun cio ah palai pawl le tawlreltu an thlah ding. First Audition pahtlangtu pawl hrang Quarter final hi February 17, 2017 ah le Semi final cu February 18, 2017 ni ah an si dingih, Final cu February 21, 2017 siimlam sml 2:00 ah Falam Puaipi tuahnak hmun Kum 100 bualrawn ah tuah a si ding.#

 

Comments

comments

Comments

%d bloggers like this: