Chin’s Got Talent Lairawn ih Audition Thok Thlang Ding

Thang Hlei Cin Pak

Falam Runinn Tlun Kum densen ih tuah ding mi Puai lakih pakhat a si mi Chin’s Got Talent zuamawknak hrang Lairawn Level Audition cu February 11, 2017 (Saturday) ni ah, Tahan vengih IPCM GS Meeting Room (Wesley kot) ah an tuah ding thu theih a si.

Zuamawtu ding khal an tthahnem ih Zarhte zing 9:00 ihsin siimlam 4:00 tiang tuah ding a si tiah theih a si.
“Tu tiang application form la zo hi mi 30 kiangkap an si. Sun kan vu ko ding a zum um,” tiah Lairawn ih tawlreltu Salai Van Thawng Thang cun a sim.
Tui ttum Audition (Aite Sinnak) ahcun hlasak ih zuamtu hrangah electric awnmawi thilri hman sian a si lo dingih, aw hangin sak ding a si. Lam zuamtu pawl lawngin background music an play thei ding. Soundbox le CD player, phone play-nak hri vial hman a si ding. Thiamthil dang ih zuamtu khalin anmah le an ttul mi thilri cu anmahte run kengin an todelhaw ding a si.
“Sound track, electric guitar, keyboard le electric awnmawi thilri hman sian a si lo ding. Aite Sinnak Audition a si vekin aw hang rori’n an sak ding a si. Hihi cu hlasak zawngih ra zuamtu hrang a si bik. Lam ding pawl cun an lamnak hrang backgroud music, hla cu an play thei ding. Thildang ih zuamawtu ding khalin an hman ding mi thilri pawl cu mahte’n an run todelhaw ding a si,” tiah Chin’s Got Talent ih Judge pakhat Salai Jesse cun a rel.
Chin’s Got Talent Audition (Lairawn) ih zohfeltu ding pawl cu Saya David TK Thang, Saya Ttuan Za Kip Thawng @ Saya Cate le Salai Jesse Penn-Lewis pawl an si ding. Tui ttum Audition ahcun Marking Scheme fek tukih hmang loin, Yes or No in an hril ding a si. Himi Audition pahtlang theitu lawng Falam ah February 17 (Quarter Final), February 18 (Semi Final) le February 21 (Grand Final) tiin an kai so vivo ding a si.

Chin Got Talent Audition hi hmundang dangah tuah a siih, February 6 ah Falam, Yangon le February 5 ah Singapore tipawl ah an rak tuah zo. Tahan ih tuah ding mi Lairawn huap Audition hi a netabik ding a si.

(Fiangfel ih thuhla sut duh hrangah : Salai Van Thawng Thang 09-258577890 le Salai Jesse 09-794001039, 09-254023558 ah suh theih ringring a si.)

Comments

comments

Comments

%d bloggers like this: