Chinland Today, Issues 23

Kawlram Thuthang

Tahan thilman
LalruatawiJanuary15, Tahan : Tahan khawpi ah thilman nitin in a sang sin sinih, nun khawsak a har sin sin thu CT palai hnenihsin Janau 14 zanah thudon a si. ‘Kawlram thilman nitin a kai ih Tahan tiangin kan harsat phah thluh ti’n Awite cun a sim. Tahan thilman tlangpi pawl khal a hnuailamvek in a a tarlang.
Hmin ———————Zat/khat ————————-Man (Ks)
Buhfai(Iyamint)————-pi——————————–500/800
Siti —————————lang——————————4000
Cawsa ———————–cuai—————————— 4000/1500
Voksa ———————– cuai—————————— 4000
Arti ————————–pum —————————–100/200*
Antam ———————–Tel ——————————150
Kawpi ———————–cuai——————————300
Fren ————————-cuai —————————–100
Anhling ———————cuai——————————100
Sipawlik ——————–zual(2) ————————–50
Kuva ————————pa(2)—————————–50
Khaini ———————-bur——————————-150
London ———————zual ——————————150
Beer
Sii ————————–khuat —————————-350
Whisky ———————um ——————————3500
Zu
Laimi ———————–lang —————————-500
Myanmar ——————pia —————————–1200
Lakphak ——————- no ——————————150
Pawhmuk ——————pa —————————–100
Iciakuai ——————–pa —————————–100
Mauhhinkha ————–puai —————————200
Khauhsuai —————–puai —————————200
Sanpioh ——————–puai —————————150
* lai Arti

Aung San zuknung (Flim) tuah tum
IRR Jan 10: Kawlram zuknung director Maung Thura, mi tamsawn ih Hnihsuah sai thiam Zarganar tiih theihlar cun Kawlram Zalennak sulsutu AungSan ih thu zuknung ih tuah a tum thu a puang.
Zargana hin Kawlram acozah thu hnihsuah capoh, thulenglawg ih a tuah theu ruangah acozah in zuknung le video tuahnak lam ih cawl dingin an ti zo mi a si. Mipi zalennak ding hrangih hnatuantu a si thu khal Irrawady thuthang cun a phuang. Aung San zuknung khal ram dang miih tuah dingin a duh thu khal Zargana cun a tarlang.
Zargana in Aungsan thu can dingih a ngannak http://www.zargana-windoor.blogspot.com/ ah a thuanthu pehzom pi ding khal in mipi a sawm.
Hi thuanthu an can dan ding cu Aung San le a kuthnuai hruaitu mi 17 pawl July 19, 1947 ih an thah dan in a thok ding ih cu tin a thuanthu lak kir a si ding.

Kawlram thuhla duhsak tul : EU palai
AFP Janu 4: Europeon Union palai Piero Fassino cun mipi zalennak a zuam rero tu Kawlram thu kan duhsak a tul a si tiin leitun ram tin community a sim.
Fassino in UN hotu lu Ban Ki-Moon le Kawlram ih UN plai Gambari a tong, Kawlram thu ih an hmuhdan a bangawk thu leh Kawlram mipi zalennak a ngah theinak ding hrangih nawrnak pek a tul thu khal a sim, ahleice in Asia ram pawl thawn kan tan tlang a tul a ti.
Tui hnu thla (2) ah India, Indonesia, Thailand le Vietnam ih tlawn a tum thu khal a rel tel. Cui laiah Gambari khal cun Kawlram ih a tum thumnak a tlawn hlanah New Delhi le Beijing ah rei lo te ah tlawn a tum zo thu a puang ve.

Suu Kyi le Aung Kyi an tawngaw sal
Chinworld11 Jan, 2008 : Tui ni, 11.1.2008 (Friday) ah innthawng sungih khuahkhirh a si lai mi Pi Suu Kyi le ralkap acozah senior palai cu a vei 4 nak tawng aw salin, nazi pakhat sung tluk thuhla an rel tlang thu ralkap acozah in a phuang.
Kawlram sungih acozah MRTV cun Pi Aung San Suu Kyi le kandung kum September buainak suah thluh hnu, bet Suu Kyi thawn an karlak palai dingih ralkap acozah in an ret mi Aung Kyi thawn an ton awknak pawl a tarlang.
“Ziang thuhla an rel tlang timi kan theilo, asinan hiti vekih ton awk nak an neih mi hi kan lungawi pi a si, an ton awk tam poh le kan ram hrangah thatnak a suak sinsin ding” tiah NLD thuphuangtu Nyan Win in a sim.
Mit rori ih a hmu tu pawlin Pi Suu Kyi hi Yangon ih a mai inn ihsin car thawn an phurh suah thu le State guesthouse lam panih an fehpi thu an sim. Suu Kyi le Aung Kyi hi kandung November ni 19 ah a netabik an tawng aw. Himi tum ah Pi Suu Kyi in an ton awk nak cu lamsial tu ah hmu in ralkap acozah thawn thuhla thasawn rel tlang nak dingih tuan pi a man ringring thu a sim.

Yangon ah bom puak
Chinworld14 Jan 2008 : Mani 13.1.2008 zarhpi ni zanlam nazi 2:00 pm (Kawlram tikcu) hrawngah khan Yangon Tlangleng cawlhnak hmunpi (Rail station) ih nunau ek-in ah bom tenau pakhat a puak thu siseh, himi ruangah nunau pakhat in hliam a tuar thu le hi bom hi tlawngkai ninga ni Nay Pyi Taw kiang, tlangleng cawlhnak hmunih puak mi vek a si thu Kawlram thuneitu pawlin an sim.
Tlawngkai ninga ni Nay Pyi Taw kiangih puak mi ah nunau bom puah tu Naw Gay Lar,40 in a thih pi phah thu ralkap acozah thuneitu pawlin an sim.. Tulai fang hi kawlram sung hmun dangdang ah bom tenau a puak hnuaihni ih, himi ruangih thih a tuar tu le hliam a tuartu pawl hi Karen pawl a tambik an si. Hiti vek thuhla a um tikah Kawlram ralkap acozah cun ramsung ih democracy hrang cangvai tu pawl, NLD le tlangpar mi hel pawl a puh theu.
Ralkap acozah nitin thuthangca cun kandung tlawngkai ninga 11.1.2008 ah khan Yangon-Madalay karlak ih um Bago division, Phyu township ih Circus an tuahnak hmunah bom kengtu mi pakhat cun a bom kam mi a tikcu kim hlanah a puak ter ngah pangih amah in a thih pi phah hlei ah midang 4 pawlin hliam an tuar phah thu a tarlang.
An sim bet vivo nakah hi bom puah ngah aw tupa hi Karen National Union (KNU) member pakhat a si thu an tarlang. Hiti vekih bom a puah hnuaihni ruangah ralkap acozah cun rampum humhim nak lam an hngetkhoh ter sinsin.

Hollywood zuknung pawl kawlramah tlawng ding :Britney Spears le Paris Hilton thlun tum
January 15: Britney Spear le a rualnu Paris Hilton cun tui kum April thla ih ‘Thingyan’ ah kawlram ah tlawn an tum. Hollywood zuknung cangthiam Sylvester Stallone, Bruce Willis, Matt Damon, Tom Cruise, Mel Gibson, Harrison Ford, Donald Sutherland, Keifer Sutherland, Steven Seagal, Nicholas Cage, Vinnie Jones, Jean-Claude Van Damme, Vin Diesel, Colin Farrell, William Shatner, Liam Neeson, Michael Weatherly, Ving Rhames and Ellen Degeneres pawl khalin thlun an tumve thu le Angelina Jolie le Brad Pit khlaih an tum ve thun an tar lang.
Britney in Spoof.com a sim danah cun, “Aung San Suu Kyi hin a fale pahnih hmu loin reipi sung a inn ih kharhkum asiih cuvek in kei leh Paris Hilton khaltin pehawknak kan nei a ti. Kan dung kumah ka lu ka met kawngih Mawtaw ka nithawng ken mi thawn ka pah ngah, cu vek tho tho in Kawlram phungki pawl anduhlonak tilan nakah Nithawng kengin anvak ka hmu ih, hi khal hi kan bangawknak a si tho tho, a hmaisabikah Rangoon kan tlawng ding an tiih cun tin hmun dangdangih tlawn an tum bet lai thu khal a rel tel.Hi puai laifangih an tlawntumnak thu an suh mi ah, Tidai thawi kahawk a nuam a ti thu le Paris khal ih Rwanda a tlawnthluh hnuih a thlun ding thu a sim. Washington DC ih Burmese Embassy in Britney le Paris Hilton tlawn siannak (visas) an pe dingmaw dinglo lawngte an rel suak hrih lo.Insein Thawng inah na pahnih in an tangta tla a si men thei ti cun thuthang cun apuang bet.

============================================================

India le Kawlram

Gambari New Delhi, China, kawlram ah feh ding
AP Jan 14: Kawlram ih UN sungkhung palai Ibrahmin Gambari cun India le China ah kawlram thu reltontlangnak le thurontuah tonnak nei dingin January thlal sungih tlawn a tum thu UN zungsang tuan upa pakhat cun a puang. Asinan a feh dingni cekci cu fiangfai tei’ puannak a nei hrih lo.
India le China ram hruaitu upa pawl hnenih tonawknak ding ni timtuah khiahfelnak a um hnu lawngah a tlawn ding ni cekci puan a tum ih theih si thu khal thuthang cun a puang.
Kawlram hrangih situ bik ram pahnih India le China hnenah a hleice ih kawlram thu reltlannak an nei ding thu khal cu UN thupuang tu cun a rel tel.
Kawlram acozah in aramsung mipi zalennak le mimal canvo dik humhalhnak thu tuan sal ding in a ram sungih tlawngdingin a sawm ih China le India a tlawn hnu lawngah a tlawn ding ni thu a rel felfai lai ding.

India in Kawlram remrelfel salnak tuahfel lohli dingin tur
AP January : India acozah cun Kawlram acozah ram relfelsalnak tuah fel lohli dingin leh Aung San Suu Kyi thu ih nasa sawn ih ngaihtuah lohli dignin na sa zet ih atur thu India PM Monmahan cun a puang.
India in Kawlram mipi zalennak dingih a hmalak nak ruangih September thla ih buainak thu ah le Suu Kyi suah an sian lonak thu ih zianghman hmalak pi nak tak tak a neih lo ruangah leitlun ramhuap (int.) ih neknak nasa zet a tuar.
Tu naite ah Kawlram le India pursum leilawnnakah rualremzet an si nan Manmohan le Kawlram palai Nyan Win an tawn awk hnu reilo te ah hi thu cu suah in le Kawlram thu ah UN palai thusuah a tan thu khal a puang.
Nya Win hin India External Affair Minister Pranab Mukharjee thawn an ram pahnih rualremnak US $1billion cu Kawlram Zinan le Gas hrangih tuan tlangdingin an nem hnget. Culawng siloin India petroleum Minister Murali Deora in tu naite ah US$150 millian, Gas hawlnak ah tiin kawlram thawn lungkim hmin nemnak an tuah ve tho tho.

++++++++++++++++++++++++++++++++++++++++++++++++
Leitlun Thuthang

Bhutto thih dan thuhla zingzoinak ah France, EU in Pakistan bawm
AFP Jan 2: Pakistan ram hruaitu dingih candidate Benazir Bhutto an thahdan, France leh European Union in a zingzoi pi thu French Foreign Minister Bernand Kouchner cun thuthang la khawmtu pawl a sim.
Bhutto an kahthat hnu ih ram hruaitu Pakistan ih tlawng hmaisabik tu Kouchener cun Pakistan Presiden Pervez Musharraf hnenah a ram hruaitu an kahthat thu ih zingzoi pi ding in France le EU ram 27 pawlin an bawm ding thu a rak sim zo.
Pakistan cun leitlun ramhuap ih a buaipi ding cu a duhlo nan ramdang ih bawmnak le neknak ruangih lotheihlo thil vekih ra cang asinak ruangih cohlang a si thu khal thuthang cun a tarlang. Bhutto hi an party hrangih an campaign rero lai ah mipi lakih sin kah that vek ih thei a si.

Australia Tilian ruangah mi thawng tampi buai
AFP Jan 7: Australia nisuahnak lam tipi thuamthum kiangih ruah cawl lo ih a sur ruangah tilian nasazet tuar in mi thawng tampi buainak a thlen.
Ruah a han hnu khalah New South Whale (NSW), le Queensland thlanglam pawl cun ni 4 lenglo ruah a surnak ruangah nasa zet in an tuar lai. Voi le khat ih siatnak a tuar tu cu mi 3000 lenglo an siih mi ziang maw tizatin cun umnak neiloin an um tiin NSW Emergency Service thupuang tu Phil Campbell cun a phuang. Tilian in Lilawn pawl le lamzin ziangmaw tizat a siat suah tiin a ti bet.

666 thu Church of England ah debate
AFP Jan 10: England rorelnak House of Common ah 666 Khrih a dokalhtu’i hminsinnak Church of England in a suahter ding/ dinglo ti debate nak neih a si.
Liberal Democrat MP Bob Rusell cun hi nambat hi Setan pai hminsinnak a si, Pathian tlunih mak danglam ih cangvaihnak ti langnak a si a ti. A sim vivo nakah cun hi thu debate hi Pathian sawisel kan si a ti bet.
An thu relkawm mi thuthawn pehpar in Kohhran le State pehzawm aw ih thunei tu Queen Elizabeth II, State le ‘Churh of England lubik sinak khal titawp a tul leh men ding’ ti tiangkhal an rel tel. 666 hi Bible sungih Thupuan ta lakmi a si. House of Common ih an thu debate nakah a duhlo tu pawlin can tha an cang deuh tiin thuthang cun a puang.

US ralkap Iraq ih thi mi 3922 kim
AP Jan 11 : Iraq ih raldonak a thok tir March 2003 ihsin Jan 10, 2008 tiangih US ralkap a thimi a malbikah mi 3922 an kim zo tiin Assciated Press (AP) cun a puang. Defence Department ih hminsinnakah cun m i 3186 an si tiin an hmisin. Hi mi thi lakah military civilian mi 8 an tel thu khal thuthang cun a puang tel.
British ralkap ih a report nakah cun mi 174 thiin a rel ih ; Italy, 33; Ukraine, 18; Poland, 21; Bulgaria, 13; Spain, 11; Denmark, 7; El Salvador, 5; Slovakia, 4;
Latvia, 3; Estonia, Netherlands, Thailand, Romania, pahnih cio; le Australia, Hungary, Kazakhstan, South Korea, pakhat cio tiin a hminsin ve.

Mt. Everest Kai hmaisabik tu Sir Edmund Hillary thi
Reuter Jan 11 : New Zealand mi ropi Sir Emund Hillary, Nepal mi Tenzing Norgay Sherpa thawi’ Leitlun tlang sangbik, Mt. Everest a kai hmaisabik tu cu kum 88 mi siin a umnak hmun ah a thi tiin thuthang cun a puang. New Zealand Prime Minister in “Hillary hi mi ropi a si” ti’n an vui ni mipi hmai ah sim relnak a nei.
1953 ah Everest tlang a sanlam a rak tah zo. Hillary ih thihnak san cekci cu puan suah a si lo. Asinan thuthang lakhawmtu pawl ih an sim danah ‘Awmna, khawsik Pneumonia in rei pi sung a na zo’ tiin an sim.
Hillary hi Everest tlang a kai lawng hman si lo South Pole le Himalaya tlang pawl khal a kai.A can tam sawn cu mi bawmnakah a hmangih Nepal Sherpa miphun, Everest tlang ih a phen ngah mi harsa pawl a bawm. Himalaya Trust hrangih kumkhat sungih a paisa ngah mi US $250000 in tlawnginn, Zato, Lilawn, Pipe lam le Vanzam tumnak pawl a tuah sak.

Leitlun Mawtaw man olbik : Tata Nano
AP Jan 10 : Tata Nano cu $ 2500 man lawng siin leilung tlun ih mawtaw man awk bik a si tiin thuthang cun a puang. Hi mawtaw tuahtu Tata Industry cun a rei hlanah India ram pum ah le Leitlun hmun tinah zem darh an tum thu khal thuthang cun a sim tel.
Campany Chairman Raton Tata, cun India mi 1.1 billion lenglo karlah ih mawtaw nei theilo mi ziangmaw tizat hrangih olte ih zuar theih dingih a ram a kam cia mi asi ruangah khal a si tiin an rel. Rs 100000, $2500 man lawng a si hi company dang pawlin thilmak a si an ti ve. Hi tiih a man a olnak san cu an rel duh lo.
Nano hi a hmaisabik ah cun India lawngih zuar asi ding ih kum 2,3 hnu ah Asia ram thenkhat le Latin America, Africa ram pawl ah zuar a si ding thu khal thuthang la khawmtu pawlin an sim. Tata company in kum khatah Nano 250000 tluk tuah an tum.

Minung Sa suang
AP Jan 6 : Christopher Lee McCuin 25,cun a ngaihzawng nu Jona Shearer 21, cu that in a taksa then hrekkhat cu hlep in a suangih cu mi hnu lawngah Palik a ko.
Palik pawlih an va hmuh danah cun Shearer ih taksa then ei zo mi vekin a um ih a hna tisa so ih a solai le a taksa thatnak a tit pawl coka pakan sungih ret in a um thu an sim. Asinan a taksa a ei felfai rori ti ding cu an theilo.
A thah hlanah a ngaihzawngnu ih tlangvalpa cu namte in a dawt ih a ngaihzawng Shearer cu a nui’ inn ah a that tiin an theih thu palik pawl cun thuthang lakhawm tu an sim.

==========================
Harhdamnak

Pawhte Cancer donak dingah nunau sawm
Reuter Jan 10 : Cananda nu pawl cun Cancer natnak donak ding hrangah tiin leitlun hmun tinih nunau pawhte zuk internet online ih zoh theih dingih ret dingin an sawm.
Mi 100 lenglo cun an zuk an kuat ih, an lak ih mi 20 pawl cun cancer ihsin a dam mi an siih a hmasi khal hmuh ding a um lai. Hi tiih an tinak san cu nunau pawhte Cancer ihsin an ralrinnak dingah a si tiin M.J. DeCouteau cun a sim. Asim vivo nakah cun Rethink Breast Cancer cun tleirawl le nupawl ralring dingih zirh vivo a tum thu le a tih nun zia tar lan a tum a ti bet.
Pawhte Cancer hi nunau kum 15- 40 karlak ih a um tambik thu le a tlangpi in kum 50 hnakih rei an dam sau theilo thu khal thuthangla khawmtu a sim. Asinan Pawhte Cancer a rei hlanih theihngah mi in kum 5 aiih tam an nunnak a humhim thei lai a ti bet.
Pawhte Cancer donak ding hrangih Pawhte a tar tu pawl cu zohfel hmaisa an si dingih cui hnu lawngah an zuk cu http://www.boobywall.ca/ ah ret ding a si. Hi zuk hi zohman ih theih lole a tak tak mi lawng pom a si ding.

Dam saunak ding hrangah Zu in a tha
Reuter Jan 9 : Zuu in a hrisel, lehnak (exercise) khal a hrisel, a pahnih ih ti kawptu hrangah a hrisel sin sin tiih an hmuhsuak thu Danish pawl cun an puang. Mi pangai zu in dah lo, lek dahlo pawl in, zu malte in, lek pawl hnakin zatek 30-49(%) tluk in thinnatnak (heart disease) an ngah olsawn tiin European Heart Journal ah an ngan.
Morten Gronbaek, University of Southern Denmark le a tlawngta pawl cun zu malte ni khat ih voi (2) hmante in ih leknak a tuah tu pawl hrangah thinnat le Cancer an ngah mal tiin an hmusuak.
Asinan ansim vivo nakah cun Zu a dodaltu le a duhlo tu, Sakhuanak, nau painak hriselnak ruangih a in lotu pawl hrangah khal nitin leknak, mi aiih tam deuh tuahnak in thinnat le cancer a kham thei ve tiin an ti bet.
Amahlawngte Zu ri tuk ih in, lek cuanglo cun nun khua a ti tawi tin an ngan tel.

=======++++++++++++=========

Evan S. Tha Nei Fai thawi tawnawknak
Evan S. Tha Nei Fai hi Delhi Burmese Christian Fellowshiop (DBCF) ah zarh khatsung camping a neih hnuah CCF le LCC ah crusade nak in a peh zawm. Pathian in Delhi mipi nunah a mah hmangin thuthangtha a phuangih mi ziangmaw ti zat in nunthar nak leh nunthlengnak an co phah. A nunthu leng CT thawi an kawmawknak cu;

CT : Nahmin pum le na suahnak, na unau in sim thei maw?
TNF : Ka hmin pum cu Evan S. Tha Nei Fai ka siih Ka pa cu Rev. Kap Hnin, ka nu Daw Hlawn Cuang(thizo) a si. June 6, 1971 ah Falam peng, Cawngthu khua ah ka suak. Unau (9) kan siih pakhat in in thihsan, kei hi pa(7)nak ka si.
Tahan (D) group ah ka nupi Mai Lal Pek Cuai leh ka fa pahnih, Robert Van Lal Din, leh Shalom Van Siang Zir thawn kan um.

CT : Leitlun fimthiamnak leh Pathian thu lam ih na zirnak?
TNF : Primary hi Cawngthu ah, Middle hi Losau khua ah cun High cu Falam ah ka kai. Pathian zangfahnak in Kalay University ah B.A ka theh ih, B.Th, GBBS Rangon ih ka theh hnuah Bagalore ah M.Mint leh M.div ka theh.

CT : Na pianthar dan le na cang thlan in sim thei maw?
TNF : 1988 November 24, zanih Saya Dar Lian Sum thusimnak in Rundamnak ka co. Ka cangthlan cu ” Thihtiang rinum te’h Bawipa hnatuan” Thup 2:10 a si.

CT : Na rawngbawl hmaisabik dan le na kekarnak hmaisabik hmun?
TNF :1992 ah Rev. Biak Sum ka thlunih thu in zirh tir phah. Cu mi kum thotho ah Haikhawl Baptist ah Rev. Lal Mawi thawn crusade kan neiih thusim ka thok. A cui kum tho tho ah Suncung ah camping nak ka nei hmai sa bik.

CT : Kum ziat tiang rawngbawl vivo na tum?
TNF : Kum (70) tiang cu crusade leh camping ih puan ka tum. Cumi hnulam cu ngan lam ka tum.

CT : Ramleng ah rawngbawlnak dang na nei maw?
TNF : Tu hrih tiangah cun India leh Malaysia si bik mai kei cu.

CT : Rawngbawlnak ah ziangti hmalak ha na tum vivo?
TNF : Pathian hnenah tong phun (10) ka dil ih phun (5) cu ka ngah zo in ka thei aw, cun 2010 ah Asia ram (10) talah ThuThangTha sim thei dingin thla ka cam.
CT : Kan ramih buaipi mi Pathian Thutak hi ziangtin na hmu? Zum thei maw Zum thei lo?
TNF : Kan ram ih buaipi mi Pathian thuthak, minung in kan zum thei/theilo ti hi a pahnih in ka pom lo ve ve. Pathian Thlarau thianghlim tello cun Pathian kan zum thei lo bem bem, cun in ti caktu Khrih thawngin ziangkim ka ti thei thung (phil 4:13) ti hi Bible ka hmuh dan leh ka feh pi mi cu a si.

CT : Hla ziangzat tluk na phuah? Hnamdang tongin teh na phuah maw? Na duhbik mi Pathum in insim thei maw?
TNF : Fing 400 hrawng ka phuah ding ka ring: Haleluiah Thisen Thisen sak- Mai Lal Than Pui (Mapui), Buu phah cing le tapthah cingin, sak-Mai Lal Pek Cuai, Duhdawtnak ih in hawlsuak tu, sak Mai Lal Pek cuai pawl an si.Hnam dang tongih ka lehmi khal an um ih Hakha, Mizo leh Kawl in fing 5 lenglo cu ka ngan.

CT : Hla le thu ah ziangtin ha na thawtdan?
TNF : A bang aw, Hla cu thu a siih, thu cu hla a si, Ka thawt dan a bang aw ve ve.

CT : Duhdawtnak hla(Love Song)teh na phuah maw?
TNF : Ha ha….Ka pianthar hlanah cun malai cu ka rak phuah ko nan ka sak dah nawn lo.

CT : Thangthar nonawn hlaphuah thartu pawl hrangah ziangha na cah duh?
TNF : Kan thangthar pawl, himi thu ah hrinsuah ka duh zetih, 2007 ah El-Bethel ah Saya Hlawn Hmung, Rev. Hrang Kap Hnin leh U Duh Cuang pawl thawn, Sak daan, hla tong leh Bible tong hman dan pawl zirhnak kan nei, Hla kan phuah tikah Bible tong telh tam sehla mimal pumpak maw Kohran soiselnak la tel lo sehla ti ka duh sak zet.

CT : Sermon thulu(topic) ziangzat na nei? A ngan ih ngan mi teh na nei maw?
TNF : Sermon thulu hi (70) tluk hrawng ka nei, “Zion Thu Thup” timi cabu ka ngan theh zo ih Salai Rual Than Khum (Australia) in edit a tuah rero lai a rei hlanah a suah ka beisei.Rundamnak thu leh Sermon (14) pawl an si.

CT : Tui tum Camping ziangtinna hmu? 2008 ah program dang na nei tumsal ti kan thei a dik maw?
TNF : ka rinnak hnakin kan tluangzet, Pathian a sunglawi.Si.. Pathian ih rem atile 2008 hrang program ding khal DBCF upa pawl thawn reltlannak kan nei zo.

CT : Ziangtin Delhi mipi pawl na hmuh dan?
TNF : Pathian thu ah tihal em em leh rilrawng em em in ka hmu. Ka ruah hnakin Pathian an rak duh khawm ih ka lungawi nasa.
Pupa daan takah ” Thutha lakih ek rel ti bangin” mipiin Pathian thu an hal laiah fala hrekkhat zuar aw an um ti ka thei cu, ka thlarau nun in ti na ter nasa.
CT : Lairam hrangah Evan pawl ih tuanvo bik hi ziangin ha na theih?
TNF : Lairam hrangih Evan tuanvo bik cu Kohhran din siloin miin Rundamnak thuthantha an theihfiangih Pathian thutak sungih nun pitling an neih vivo theinak dingah a si.

CT : Kan ram Pathian rawngbawltu tlaksiatnak bik raunagh siin na thei?
TNF : Kan ram Pathian hnatuan tambik tlaksiat nak cu nunau leh Paisa bik hi a siko in ka thei.
Crusade, Camping tuahnak hmunah Fala thawn hmun khatah riak tlang lo sehla, cun Fala ih Malis uarlo sehla nunau ih tluk cu a har deuh ding ka zum.

CT : Kan laimi rawngbawl tu leitlun hmundangih kan darhtheihlo nak hi ziang ruangah a si in sim thei maw?
TNF : Tong kan thiam lo ruangah leh mi theih luailo tlak ngaingai ih Pathian ih in hmanlo ruangah tiin ka ruat.

CT : Na rawngbawlnakah harsa ti fualfonak na nei maw?
TNF : Ka nei nan hiangcu minung hmaiih phuan hnak cun cung Pathian ih a theih cun tawk ka ti ko.

CT : Ahlanah tidam rawngbawlnak na phuanglo nan, ziangti phuang thawk ha na si?
TNF : Tidam rawngbawknak hi Dr. Lalchungnunga ih thla i camsanak le Pathian thucah a si tiih ka fiang ruangah ThuThangTha phuan tluk ih thupi ah ka ruat.

CT : Piangthar zumtu tlu sal cing cing hi ziangtin ha na hmuh dan?
TNF : Hianghi cu an piangthar fuh tak tak loin ka thei.

CT : Na sermon nak ding hrangah ziangtin timlamnak na nei theu?
TNF : Rawl ul Thlacamin Bible siar leh Pathian mi pawl ih ca uk siar in Sermon tim lamnak ka nei theu.

CT : Leilungtlun ih na mi uar mi le kan Laimi mimalih na uarmi in sim thei maw?
TNF : Theologian ngaipi cu a silonan Thlarau lam pa ih ka ruah mi cu Watch Mani a siko, Kan laimi ah cun Sermon thiam ciamco cu a si lonan pumpak nun daan ih ka uar zet mi pakhat cu Rev. Biak Sum a si.

CT : Bible tlawngkai pawl le Evan pawl hnenah thu cah duhmi na nei maw?
TNF : Kan rualpi Evan pawl hnenih cah ka duh mi cu Khawpi le khawte thlei dang loin, ThuThangTha phung vivo haisehla, cun mai hna tuanpi evangelist dang donak le soisel hmang lo hai sehla ka duhzet.
Bible a zir rero tu kan ram ih kan mi rinsan pawl hnenah cun, Degree men lawng ngahtu si loin Pathian thutak le thuthup zirsuak teng teng dingin tanla cio haisehla ka duh zet.

CT : Delhi um le Ramlengih a um mi Laimi pawl hrangah teh ziangha na cah duh?
TNF : Ka duh a tam hnuai hni ih, ramdang um lai mi pawl in mai suah semnak khua leh kohhran pawl seherh teng teng sehla, Thlarau lam hrangah crusade le camping rak tuahsak theu hai sehla. Delhi um pawl cu Pathian in hmunkip leh ram kipah a lo kuat hai ko dingih nan thlennak cioah, ahmaisabik ah Pathian tihzahin, Kohhran dang dang va ding ciamco loin le a um cia Laimi pawl kom Kohhran ah kom aw vivo uhla, a thleng hmaisa upa thu ngai ih um ding ka lo duh sak.

CT : Na caan sunglawi zet siangih kan thusuhnak in san sak thluh ruangah kan lungawi.
TNF : Kei tla ka lungawi, Pathian in mal malsawm hramseh.

==============================================
Theih Kauhnak
Best-sellers-Books-USAToday
Thurday Jan 10 tiangih leitlun cabu zuar tambik 5 pawl
Key: F-Fiction; NF-Nonfiction; H-Hardcover; P-Paperback
1. “Eat, Pray, Love: One Woman’s Search for Everything Across Italy, India and Indonesia” by Elizabeth Gilbert (Penguin) (NF-P)
2. “Atonement” by Ian McEwan (Anchor) (F-H)
3. “The Pillars of the Earth” by Ken Follett (NAL Trade) (F-P)
4. “The Kite Runner” by Khaled Hosseini (Riverhead) (F-P)
5. “I Am Legend” by Richard Matheson (Tor) (F-P)

Best-sellers-Books-PW
HARDCOVER FICTION
1. “A Thousand Splendid Suns” by Khaled Hosseini (Riverhead Hardcover)
2. “The Shooters” by W.E.B. Griffin (Putnam)
3. “Double Cross” by James Patterson (Little, Brown and Company)
4. “T is for Trespass” by Sue Grafton (Putnam)
5. “World Without End” by Ken Follett (Dutton)

NONFICTION/GENERAL
1. “You: Staying Young: The Owner’s Manual for Extending Your Warranty” by Michael F. Roizen and Mehmet C. Oz (Free Press)
2. “In Defense of Food: An Eater’s Manifesto” by Michael Pollan (Penguin)
3. “I Am America (And So Can You!)” by Stephen Colbert (Grand Central Publishing)
4. “The Secret” by Rhonda Byrne (Atria Books/Beyond Words) 1/4
5. “Become a Better You: 7 Keys to Improving Your Life Every Day” by Joel Osteen (Free Press)

MASS MARKET PAPERBACKS
1. “Iron Kissed” by Patricia Briggs (Ace)
2. “The Innocent Man: Murder and Injustice in a Small Town” by John Grisham, (Dell)
3. “I am Legend” by Richard Matheson (Tor)
4. “Blood Brothers: Sign of Seven Trilogy, Book 1” by Nora Roberts (Jove)
5. “The Shape Shifter” by Tony Hillerman (Harper)

TRADE PAPERBACKS
1. “Eat, Pray, Love: One Woman’s Search for Everything Across Italy, India and Indonesia” by Elizabeth Gilbert (Penguin)
2. “Atonement” by Ian McEwan (Anchor)
3. “The Kite Runner” by Khaled Hosseini (Riverhead)
4. “Three Cups of Tea: One Man’s Mission to Promote Peace … One School at a Time” by Greg Mortenson and David Oliver Relin (Penguin)
5. “The Pillars of the Earth” by Ken Follett (NAL Trade)

=====================================
CT Janaury Issues 23 nak a cem…………….
(Visited 64 times, 1 visits today)

Comments

comments

Comments

%d bloggers like this: