Chinland Khuiah-1

CHINLAND  KHUIAH – 1

(Common/Official language)

Pu No Than Kap

Rihli group  mail ta lak mi a si

Rampi Education Ministry thusuak hmaisabik cu Chin State Tlawng Primary schools ah, phun hnih tiang Laizo (Falam) le Kamhau (Tedim) zirh a si ding ti a si. Rei hlanah Chin State cozah ihsin Khumi, Laiholh le Cho khal zirh siseh tiin thu an thunluh ruangah zirh ding mi cu pahnih (2) lawng si loin panga (5) ah a cang.

 

Hitin tawng panga (5) lai zir kan duhnak san cu zirh mi lakah kanmai peng le kanmai hrin tawng a tel ve lo kan phan cio ruangah a si. Kan peng le kan hrin tawng a si lo khalle Chin pumkhatnak a si phah ding ahcun peng dang le hrin dang tawng khal common/official ah cang ko seh ti theitu kan mal tuk lai. Kan um lo tluk a si. Hihi Chin pawlih common/official language neih in khamtu natnak hrik a si.

Chin in common or official language kan neih a tul tuk tiin College ah siseh hmun kipah kan au rero. Asinan Chin state cozah lamah siseh, pengtin thuneitu lam ah siseh,_ Chin hrangah tawng/ca pakhat lawng zirh siseh, culawngah Chin in common/official language kan nei lanta thei ding titu an um lo. Mangbangza a si.

Rampi uktu lam cun, Chin mipi lamin kan dil rero ahcun, peng tin kan lungawinak ruat in tawng panga (5) si lo sawmnga (50) tiang khal zirter an pawi ti lem lo ding. Curuangah a thupi bik cu kanmah Chin lala in (Chin State cozah lam khalin) tawng pakhat lawng zir dingin khawruahnak le tan laknak neih ding hi a si.  Tui kan fehdan cu kan san cem hnu kan fate san tiang in rem that le tuah that theih nawn lo fehdan a si.

Tunaite ah President sawmnak in a hnen kan feh. A cabinet ministers hrekkhat thawn thunuam reltlangnak kan nei. Dep. Education minister pakhat hnenah “Chin hrangah Chinca panga (5) zirh ding ti cu a tam deuh lo maw,” tin ka sut. Anih cun, “panga sim hlah, tunai te ah Chin state minister pakhat in (a hmin ka ngan duh lo) a dang pahnih zirh bet a tha ding,” a ti tiin i sim. Ka mangbang rori. Cui Chin minister duhdan vek a sile Chinca panga si loin pasarih (7) lai zir a si ding.

A liamcia mi canah Chin cu kan zaten mipum millions kan si ko nan tawng pakhat common or official in hman mi kan neih lo ruangah hnampi pakhat ah ret kan si lo. San a thlengaw zo. 21st Century kan thleng thlang. Kanmah bulpak duh zet mi (tawng etc.) tanta ngam tiangin Chin pumpi pumkhatnak lamzin kan zawh thiam a cu tuk thlang. Kan san liam hnu kan fate san tiangin remthat le tuahthat theih nawn lo “rosia” kan tanta lo a thupi. Tuvek kan si vivo le Chinpawl cu hnamdang zo hmanih thendarh rero tul loin kanmahte kan thendarh aw rero, tinak a si.

Comments

comments

One Comment

  1. Hitin na rel dan vek sile cu kan “LAITTONG” common language cu nei thei ding cu zum um lem nawn lo.nati vek in zohman in mah ttong tanta ngam tu kan um lo cu si bik ko, san thuanthu zoh fiang sal in tiselah teh?common language pasahrih cu um dah kel lo..

Comments

%d bloggers like this: