China Ram Ling Hnin

Iran in A Lungawi Lo Thu UN Ah A Thlen
Mizan sunah khan UN ih Iran ram palai Mohammad Khazai cun US parih Iran a lungawi lo nak thu ca in United Nations hnenah a thlen. Iran in US parih a lungawi lo nak thu UN hnenih a thlen nakah Iran Nuclear thilri thuhla ih US President, Barack Obama in  Iran a puh nak leh a sawisel nak phunphun leh US President, Obama in Iran ram dodal dingzawng leh ralkap cahnak  khal hmangmai ding tiangih ramdang a sawhthup ih a forhfial nakthu pawl an thlen.
Iran cun Obama ih thilti dancu leitlun ih rualrem awknak duhbiktu vekih aukiau aw ter rero tuih thilti danhi UN in zingzawi fiang dingih a nawrih. US in Iran huading zawng leh ralkap cahnak tiang hmangmai dingih mi a sawhthup leh mi a forhfial tiih Iran in a timi ram hi ziangram a si ti a relfiang lo nan  mitam piin Isreal a tiduh nak bik a si ding tiah an ruat.
Tuikar tlawngkai nikhat ihsi US Washington khawpi ih  Nuclear Summit an tuah nakah leitlun ram 47 aiawh tupawl an telih cumi lakah  North Korea leh Iran cu an sawm velo. Hi Nuclear Summit ah US President, Obama cun Iran ram cu leitlun ram dangdang duhdan leh  remti dan thlun duhlo ih a kalhki zawngih thilti ah a puh ih. rualremawk nak lamzin hawlnak hnaihnawk tubik a si tiih, Obama in a sim ruangah Obama ih thusim mi parah Iran Cozah lungawi lo in UN ah a lungawilo nak thu hi a thlen a si.
Hi  Nuclear Summit ih tel ram 47 aiawh tu pawlcun  Nuclear ralthuam neitu ram pawlcun an Nuclear ralthuam cu  misual Terrorist kutsungih thlenglo dingih kilhim cio dingin an relih. Obama cun Nuclear ralthuam cu misual Terrorist pawlkut ih a thlengpang a si ah cun  a hleice in Al-Qaida pawltla cun hmanmai an hreh lo ding ruangah mahle  ram Nuclear ralthuam cu fimkhur zetih kilhim a ttul a si tiah a sim.
Himi hlanah  US leh Russia cun  Nuclear tuahnak thilri pakhat Plutonium  an neih ciami lak ihsin  Ton 34 veve ti riral an remti veve ih, hi an Nuclear tuahank thilri  Plutonium an ti riral dingmi hi Nuclear ralthuam tuahnakih hman sisehla Nuclear ralthuam 17.000 hrawng a tuahsuak thei dingih ruah a si. US cun  Plutonium a ti riral dingmi hi  Electrict Power tuahsuak nak ah a hmang dingih, Russia in Plutonium a ti riral nak dingah US cun bawmnak paisa dollar Million 400 Russia hnenah a pe ding a si.
China Ram Ling Hnin
Mizan zing China ram tikcu ih zinglam nazi 7: 49 ah  China ram thlanglam Qinghai Province ah Richter Sacale ih 6.9 ih nain Ling a hninih minung 400 lenglo an thiih, midang tamzet an dinhmun theihlo in Inn ciim sungah an hlolai.
Hi Linghnin hin  Qinghai Province khawpi Yining ihsi Km 800 ih hla Yushu kiangkap a sawi nasa bikih, Jiegu khua ah cun Minung umnak Inn tamzet a siatsuah ih lamzin khal a ciim ter thluh. himi linghnin ruangih harsat nak tuartu bawm dingin minung 5.000 lenglo in  Yushu khua hi an pan zoih, himi sehvel hrawnghi tuihlan ihsin linghnin in a rak siatsuah theuih, Asinan  US Geological Survey pawlin  an sim nakah kum 1976 hnuih himi kiangkap ih linghnin ah tuittum tahi a nakbik tiah an sim. Kum 2008 ha khan  China ram Sichuan Province ah ling a rak hnin zoih,  khami ah minung 78.000 lenglo an rak thizo ih midang Million 5 hrawngih umnak Inn khal Linghnin in a rak siatsuah sakzo.
Isreal in A Ram Minung Pawl Theih Ter Nak  A Pe
Isreal Cozah cun an ram minung pawl Sinai, Egypt ih um pawlcu Misualin rukhlo an tum tiih an theih ruangah Sinai suahsan dingin an ram mileh sa pawl hnen ah theihter nak a pe.
Isreal PM Office in thusuah a tuah miah Sinai hmunih  Joam Isreal mipawl mi tampi colh hahdam hmangih um pawlcu Palestinian Tapung Hamas leh misual dang pawlin rukhlo an tum timi thu theihfiang a si ruangah Sinai suahsan dingin  Isreal Cozah in thu a suahnak a si tiah a tarlang.
Isreal minung pawlhi  misualin an ruk ngahpang a si len  Palestinian Tapung Hamas pawlin  Leilung sung virhkua mi lamzin ihsin  Gaza ah an hruai pangding ti an phangzet. Sinai hi kum  1967 ah khan Isreal in a la ih Kum 1982 ah Isreal in Egypt hnenah a peksal mi a si.
India PM in Canada PM a Ngen
Washington khawpi ih Nuclear Summit an neih nakah India Prime Minister, Mammohan Singh cun  India ram ihsi lak hranawk tumtu Sikh Tapung Khalistan pawl bawmtu Canada ramih um hmunkhuarih  tel khawmaw pawl hmetmit dingin Canada ram Prime Minister, Stephen Harper hnenah ngennak a thlen.
India Prime Minister, Mamohan Singh cun India ram ihsi lakhran awk tumtu Sikh Tapung pawlcu Canada ramah um hmunkhuarin an telkhawmaw  tiah theihfiang a si ih, Curuangah India Cozah cun a ngai pawimawh zetih Canada Cozah cun a ramsungih Sikh Tapung pawlih umdan leh cangvaih dan zohfiangih, India ramih buainak leh harsat nak an thlenter lo nak dingah theihtawp suah dingin Canada PM hen ah ngennak a thlen.
Sikh Tapung Babbar Khalsa International,   International Sikh Youth Federation,   Khalistan Commando Force, leh Khalistan Zindabad pawlhi India Cozah cun  Unlawful Activities (Prevention) Amendment Act, 2004 hmangin India ram danpi lenglam ih a hnawlsuak laimi pawl an si.
(Visited 44 times, 1 visits today)

Comments

comments

One Comment

  1. Siat tawk pawl (China) cu zang an fak hle mai…

Comments

%d bloggers like this: