Chin TV Kumkhat Kim Lawmnak Nei

347389317_640

Chin TV International tuanvo neitu pawl ih hohanak in, August 1, 2013 ah FCCI Biakinn ah “Chin TV Kumkhat Kim Lawmnak” cu nuamzetin tuah a si. Chin TV a duhdawttu le tha a petu mi 20 hrawng suakkhawm in lawmnak hi neih a si.

Cankaitu Mai Iang Nei Mawi in a hruai ih, Chin TV kumkhat kim lawmnak ih ratu pawl hnen ah lungawithu a sim hnu ah Rev. Hre Mang in thoknak thlacamnak a nei. Cumi theh in, Chin TV Chairman, Peter Thawng Hmung in lungawi thusimnak a nei. Chin TV a rak din ihsin tuini tiang thapetu le zohtu parah lungawi thu a sim ih, hmailam khal ah Chin TV tha pe vivo dingin sawmnak a nei phah.

Cumi thehin, Chin TV Excutive Producer, Pu Van Tuah Piang khal in Chin TV kumkhat tiang tluangte ih a feh theinak par ah thapetu mipi pawl hnen ah lungawi thu simnak a nei. Chin TV a rak din pekte ahcun, zohtu hi mi malte an si nan, tu ah cun mi tamzet in an zoh thlang ih, Chinmi pawlin lamzin khat ih leitlun thuthang theihnak a si ruangah thape vivo ding khalin sawmnak a nei.

IMG_7023

Rev. Hre Mang in thutawi simnak a nei peh. “Laimi pawl hi hmun dangdang ah kan thendarh aw theh ih, hmunkhat te ih kan mit a tonawk theinak, kan thinlung hmunkhat ih in funkhawmtu thabik pakhat a si mi cu Chin TV hi a si. Himi hmangin leitlun in Chin kan um ti an thei ding. Tulai mino tamzet, ramdang ih thleng pawl khalin Chin TV hmangin Lai tong an thei vivo ding” tiin simnak a nei.

Rev. Albert Kap in Chin TV hrang hleice thlacamnak a nei. Salai Tuan Ling Thang in sumpai dinhmun report a neih hnu ah, Chin TV ih tuantu pawl hnen ah, “Zianghman ngahmi nei lo ih tuan nan si nan, Laimi hrang ah thiltha tuah nan si. Cawllo in peh vivo uhsi” tiin forhfialnak a nei.

Cumi theh ah, Chin TV team le mipi hnen ihsin lungawi thu simnak le thucahnak an nei hai. Salai Justin Sang Hrin Thang ( Chin TV Manager ), Salai David Nun Tho ( Chin TV Chief Editor ), Salai Johny Silas ( Indiana Chin Community Youth President ), Salai Caleb L Ci Luai ( Chin TV News Correspondent & Chinland Today Editor ), Rev. Caleb Biak Lal ( Pastor, Revival Baptist Church of Indianapolis ) le Steve Ward ( Chin TV Production Manager ) pawl hnen ihsin thutawi simnak, lungawi thusimnak le thucahnak pawl an nei.

Chin TV suah theinak ding ih inn siangzet ih hlan / san theutu Salai Justin Sang Hrin Thang ih Nu le Pa hnen ah, Chin TV cun lungawinak langternak ah “Lungawinak Capi” pek a si. Cun, kumkhat sung taima le thathozet ih rak tuantu Chin TV team pawl hnen ah lungawinak laksawng khal pek a si. Cumi theh ah, Chin TV kumkhat lawmnak can kharnak ah Rev. Caleb Biak Lal in thlacamnak a neih hnu ah, Chin TV Kumkhat Kim Lawmnak rawl eitlang a si.

Chin TV Team Hrek-khat

Chin hrang ih kan tulzetmi Media hnatuannak hi kan nei malzet lai. Tu ah, siar theih ding cun Chinland Today, Chin World le Vancungthaihlio pawl lawng an si ( A dang khal blog cu a um an um nan, thuthang thlah ngaingai an tam lo ruangah hitin ngannak a si ). Cun, TV hmang ih thuthang, Lai Tong rori ih phuangtu hi Chin TV lawng a si hrih lai. Chin TV cu kumkhat tluangten a feh zo ih, hmailam ah Chin zate ih kan tulbikmi a si lai ding ruangah, leitlun hmuntin ih um laimi zate in Chin TV hi tha kan pe cio pei uh.

Mai tohmun men ihsin midang soisel ih relse rero tu men si lo in, tlinlonak pawl sawn kha sim thanaw in tuantlang ding kan si. Chin TV in hna a tuannak ah, an tong dan, an thuamawkdan, an TV quality le thildang ah na lungkimlonak a um a si ahcun, na kiangkap pawl hnen ah relse mai lo in, anmah hnen ah ruahnak tha pe aw. Laimi in leitlun kan tlanlen theinak, TV hmang ih thupuangtu Chin TV hi thazang kan pe vivo pei uh.

Chin TV Team

Executive Producer : Pa Van Tuah Piang
Manager : Salai Justin Sang Hrin Thang
Editor In Chief : Salai David Nun Tho
Editor : Salai Ngin Za Pum
Production Manager : Mr. Steve Ward
Production Assistant : Salai Sang TIn Khup
Production Assisttant : Salai No Lian Mawi
Production Assistant : Salai Jacob Lenhrin
News Correspondent : Salai Caleb L Ci Luai
News Correspondent : Salai Thang Luai
Anchor : Salai Ngun Sui Lian
Anchor : Mai Iang Nei Mawi
Anchor : Mai Cer Sin Par
Anchor Mai Ngun Sui
Treasurer : Mai Van Lal Par
Web Admin : Salai Aung Kyaw

Board of Managment
Chairman : Salai Peter Thawng Hmung
Financial Secretary : Salai Tuan Ling Thang.
Member : Rev. Hre Mang.

(Visited 271 times, 1 visits today)

Comments

comments

One Comment

  1. Chin TV nan ti tha zet lungawi um zuam sinsin hram uh.

    Nan tuah mi pawl an tha zet cu mi lak in ruah nak fate lo pek ka duh mi cu
    1. Thu suh nak (Interview) nan tuah can ah tong cawhrawi lo thei hram uhla chin tong nan ti vek in chin tong te lawng si ringring sehla example, ok,alrigh ti vek hnuaihni le a dang tete khi tel lo thei sehla.

    2. Thu suh nak (Interview) nan tuah tik ah thu sut nak tin kim zik te in “In sim thei pei maw” ti mi khi um lo sehla. Lei tlun pumpi huap ih media a si mi BBC, CNN ti vek pawl ih interview an tuah mi kan zoh a si le “In sim thei pei maw” ti mi khi theih ding a um lem lo ih kha vek mal kha ngai dan tla a dang lam in hmual a neih dan tla a dang lam deuh ding tin ka ruat.

    Hmai lam ih Chin TV than soh ding a duh zet tu le tha pe ringring tu si nak in kei mai ruah nak; Tlak sam nak kan sim awk nak lawng in kan rem aw tha thei ding ih hmai lam ah than so nak ah kan hmang thei ding ti ruah san nak thawi ka ngan mi siih. Ngai nuam nan ti mi le ngan sual ti mi a um pang asi le ngai thiam ka lo dil cih.

Comments

%d bloggers like this: