“Chin Today” Zarhtin Thuthang Ram (4) Ah Hard Copy In Kan Suah

CT Calai tawlreltupawl, correspondent le thurawn upapawl ih lungkimnak vekin ‘Chinland Today’ cu “Chin Today” tiah kan thleng. Himi thleng ding thu ah CT palaipawl cun thurelkhawmnak vei tamzet an nei. Aneitabikah, Chin Today tiah mitamsawn lungkimnak vekin thlengfel a si.

Kan thlengnak sanbik pakhat cu Chinland (land) timi cafang a sau ih, a sullam a fiak sawn ruangah Chin timi (khaikhawmtu) ah kan lungkim sawn. Chinland timi tongfang cun “Chin ram, thlawh-lai lohma lam a khihhmuh ih Chin timi cun Chin mipi, Chin miphun, fimthiamnak Calai, nunphung le Chin mipi pawlih dinhmun a khihhmuh sawn ruangah Chin+land ti hnakcun Chin timi ah a khaikhawm kimcang sawn ruang ih kan thlengnak san khal a si.

Himi thuthawn pehparaw in mipi hnenah thurawnnak le caan kan lo pek thiamlo nak parah ngaithiam kan lo dil. Cun, Chin Today Zarhtin Thuthangca hi ram li USA, Australia, Malaysia le India ram pawlah vei (4) lenglo kan suah zo.

A rei hlanah Canada, Norway le Denmark ram pawl ah suah ding in tumtahnak kan nei bet. CT ngainaatupawl le kan CT Zarhtin thuthangca in leksaktupawl hnenah le catbang lo’h website in lengtupawl hnenah lungawinak tampi kan nei.

Website khalah “Chin Today” tin a reihlanah kan thleng ding. Kan Chin mipi hrang calai thansohnak hnatuantu kan rualpi Sur Bung Tlang thuthang hotupawl le Falam Times hotupawl ih thuthang in hlawmnak thawn khawmual kip ih kan Chin mipi pawlin olsamten’ thuthangca le theihternak thu a phunphun an siar thei ih SBT & FT pawl hnenah lungawinak kaa ih simcaklo kan nei.

CT Hard Copy ih ca a suahnak kum (5) lenglo a ti thlang ih kan dunglam kum ahcun New Delhi ah nasa zetin kan suahih Mizoram khalah kan suah bet thotho.

Ram leng umpawl hrangah Online ah siar thei ding in (group mail) pawlah kan rak hlah bet. Atu ahcun fala tlangval cangan thiam pawl ih sumtualrawn ah an tuah ih nitin CT website ah lengtu kan neih phah nak khal a si.

CT Cahlap ih suahmi Weekly News (Zarhtin Thuthangca) hi, USA ah $ 2, Malaysia ah Rm 1, Australia ah $ 2, India ah Rs-10/- tiin kan zuar. Atu ih Zarhtin Thuthangca ih kan Chief Editor cu Salai Biak Chhawn a si.

Himi Cahlap man kan dawn summi sumpai thawn mirethei harsapawl bawm kan tum ih a tu ah a vei (5)nak ca kan suahnak ding a kim thlang.  New Delhi ih kan suahmi copy 150 lenglo in bawmtupawl hnen khalah lungawinak tampi kan nei.

Cung Hlum Mang Bawi umpinak le lungkimpinak thawn copy tam sin suah le zem kan tum ih nan umnak hmun ih an lo zorh tikah lungawi soparten’ in rak leisak dingah zangfah kan lo dil. Cun, CT pehtlaihnak chinlandtoday@yahoo.com/www.chilandtoday.info ah thurawn le nan duhzawng ih ke kan kar sinsin theinak ding ah comment le cakuat in kuat thei a si.

Comments

comments

3 Comments

  1. STTluanga Tuallawt says:

    Tha ka ti khawp mai, nan rak tuah zo ti ka thei lovi keimah cu remcangah comment nakah ka ngan leh ding ka rak ti rero. Ram hran hran ih nan suah khal len a design cu bangaw theh thei se la a duh um zet(ca hram cu bangaw theh dingah ka ruat cia)a hmin lawng bangaw ih a sung thu le cover design a bangawk loh cun a CT lo deuh.

    Paper publish Aus $ 2 ih (ca hlap) nan zuar mi hi cu a man khung ka ti deuh, ziangah ti len ram changkangah cun paper man a awl si, mahin printer nei cia fawn si cun sum cem ding a um lem lo. Dawrah print hmanin paper khatah cent 5 or 10 a siih mai tuah a si cun senso a tam ka zum loih business hrangih CT hi tuah nan si khal ka zum lem lo. Kala(Vai) le Chiness pawl khi zauh hnik uh lam zin sirih an Magazine free ih an zem mi khi colour print lawng lawng page 50 lenglo a siih a free in an cem men si. Sponsor an nei tha deuh maw cu thei hlah.

    CT hi mi dangin an rak siar ve kha kan duh bik mi cu a si ka zum ruangih hun rel mi ka si. Hnam dang mi free ih magazine zem pawl ka sut mi pawl in sim dan cu limit neiin an print ih cu cu an zem men theu, man mal tei an zuar len cu an khawng mal fawn ih an print cia a hlei lak men. Asinan, ca lai duh dawttu ngai ngai hrangah cun Aus $2 ih lei cu a naa cuang ve lo.

  2. Daniel Bawi Lian Sang says:

    Chin to day hi online in siar ve kha ka duh ih, ziang fah nak te in hi mi emial ah in kuat thei pei maw.

    Ka Lung aw.

  3. Saithantluang Tuallawt says:

    Daniel Bawi lian sang hi Pu Tuanling (Delhi to Norway) fapa na si maw? Zangfah ten….???

Comments

%d bloggers like this: