Chin Tleirawl In Australia Aiawh In Donosti Junior World Cup Ah Lek Ding 

C. Malsawmkima

Salai V Bawi Lian

Chin tleirawl Cyrus Malsawmkima cun Australia aiawh in Leitlun tleirawl Football zuamawknak ih sangbik Donosti Junior World Cup ah a lek ding. Australia aiawh in Team hnih an suak dingih cumi team hnih lakih pakhat sawn Football Brisbane ihsin a tel ding. June ni 24-10 July 17 tiang, zarhhnih sung zuamawknak an nei ding.

C. Malsawmkima hi 2017 ihsin Club pahnih Logan Lightning FC le Brisbane Strikers ah a lek. A rei hlanah U12 ih Brisbane Strikers FC – National Premier League NPL khal ah a lek thlang ding. Tuiṭum a telnak ding cu Club hmin aiawh siloin Australia tleirawl kum 12 hnuailam aiawh in a lek ding.

A nih hi mi zuanzang ṭha le thazaang cak, tlan cak zet mi a siih, thiamnak lam khalin a mai kum phulo tiangih lekmawi an timi a si. Tui a leknak ding hi hmainor, Goal namtu ah a tlan ding. Tuiṭum an zuamawknak ding khalah an rinsan zet mi a si.

Malsawmkima hi Pa Bawi Thang le Nu Veronica Siampui tei fanau pathum lakih falai siin, beunak hawl ih vahvainak New Delhi ah a rak suak ih tufang ah a nu le pa thawn Australia, Brisbane ah an khawsa. A pa hi lehnaklam ih mithiam cungcuang zet a siih New Delhi ih an um lai ihsin Football, Arhmul thawi, Table Tennis le a dangdang pawl ah lawmman rak ngah ringringtu a si.

Donosti Cup cu leitlun tleirawl football lehzuamawknak sangbik a sih tuikum hi a vei 26nak hrang lehzuamawknak, Spain ram ih San Sebastian ah leitlun tleirawl team 400 lenglo in an zuamawknak an nei ding. Team 400 pawl hi an kum tamlam zir in an then ih kum U13, U12, U11, U10 tiin an then. C. Malsawmkima hi U12 ihsin tel ding mi a si.

Tuitum Australia aiawh ih teltu ding Team pawl cu Football Brisbane le JDFA Australia an si ding.#

 

 

 

(Visited 668 times, 1 visits today)

Comments

comments

Comments

%d bloggers like this: