Chin Rock Siangpahrang Solomon Menrihai Santhar Mino Lakah Hnatuan A Thok Ding

Chinland Today Media le Chin Rock Siangpahrang hmin rak neitu Solomon Khrih Menrihai thusuhawknak malte neih a si. Solomon cun amah a original style thawn mino pawl hnen ah Pathian hnatuan dingah tumtahnak thar a neih thu uar zetin a sim ih, a hmin theih laar asinak a rock style pawl Pathian hrangah a hlan thar tum a si. 

——–

CT Media- Kum 3 sung lenglo Pathian thu ih na luh hnu ah, zaihla thawn ziangtivek in Pathian hrang pekawk tumnak na nei?

Solomon MRH- Kei hi crusade singer ding tivek ahcun ka harsa deuh in ka thei aw. Ziangahtile, Ka hla pawl hi, hla tluangtlam an mal. Asinan, 2014 ihsin 2017, tuikum tiang ah, crusade, camping le conference hmun tampi ah Pathian thangthatnak keimah thawn mil-aw lo mi hla khal ka sak thotho ko.

Mi thenkhat tla cun, “Solomon, na hla ding awm, na sak ding kaih na nei lo” ti’n upa lungfim pawlin in ti zawk rero. Asinan, Pathian thangthatnak zaihla ah kaih le kaih lo ti siloin, Pathian sunglawi seh ti’n tuini tiang ka sak rero.

CT Media- Cuti asile, na style le na hla pawl cu, tui na feh daan vekin, a kel ten na fehpi ding tinak a si maw?

Solomon MRH-  Tui dinhmun ah, Pathian in ka hnen ih i sim daan le ka thinlung ih a lang daan vek asi ahcun Gospel concert le stage show zawngin i hmang tum ti’n ka ruat aw.  Ka hlan aw rero laifang a si. Ka thinlung sung ahcun a alh nasa.

CT Media- Thlarau hnatuan le minung thinlung ih duhdan hi cawkrawi a ol zet ih, Pathian hnen ihsin Gospel Concert zawngin, a lo ko timi na fiang aw maw?

Solomon MRH-  Ka fiang aw zet. Kei khal thin nuam lemlo in, Pathian hnen ah ka sut rero. Asinan, ka thinlung ihsin a hlo thei lo. Ka duhnak men asi ding ka phang zet ve. Curungah, tuini le caan tiang thlacamnak in ka hlan aw rero. Tui caan tiang cu, ka thinlung sung ihsin a kiam hrih lo a si.

Fashion hi a thupi zet, pastor khalin a thuamawk daan ding mawi le kaihzawng a nei ve. Cuvek in music khalin fashion a nei ve. Cuti asile, Rock style a sual kan ti asile, tin sensi, hmursen, sam tawi tivek pawl khal sual ah kan suah ter thluh thei ding ka zum.

CT Media- Gospel Rock, a hlan ih na style vek rorin Pathian hla na sak ahcun, Chin mipi in ka ei thei pei maw, Jesuh a sunglawi lo ding a va phan um ve?

Solomon MRH-  Himi ding hrang ah a si pei maw, Pathian in i salh rero timi tla ka ruah sawn mi a si. Laimi pawl in samsau le rock hlasak tivek hi, Pathian hla pheiphei ahcun kan ei lo zet in ka hmu. Awnmawi cu lungawinak langternak khalah kan hmang ih, “In run damtu” sunlawih nak ahhin, phur zet le aipuang zetih thangthat hi a sual tinak ka thei lo.

Rock music zawngih Pathian pehzom thei dingin rock line timi a rak um ve. Country le pop line tivek a um cio ih anmah le zirin fashion an nei ve a si. Fashion hi a thupi zet, pastor khalin a thuamawk daan ding mawi le kaihzawng a nei ve. Cuvek in music khalin fashion a nei ve. Cuti asile, Rock style a sual kan ti asile, tin sensi, hmursen, sam tawi tivek pawl khal sual ah kan suah ter thluh thei ding ka zum. Asinan, midang siatnak ding thlen thei ding tiangtiang, midang thazang a pek lo zawng cu hrial vivo ka tum. Thimnak ah midang sual tuah ding ih forh zawng ih thuamawk tivek cu tha ka ti lo. Tong dang in kan sim asile, caaknak kai tho ding tiangtiang vek ih cangvaih cu Pathian in a duh lo.

CT Media- Pathian thu ih na luh veten, ziang tivekin thlengawknak na nei?

Solomon MRH-  A tam nasa. Tawiten aw. 2014 ah Saya France hmang in Pathian in i kawh tikah, ka style pawl ka tansan cih ih Pathian thu lawnglawng nasa tukin ka ruat ih Pathian lam ih ka thansoh theinak ding lawng rori ka ruat.  Cutin, fashion hi thupi ah ret nawnlo in, a kum tel ka um. Hla hman ka sak ciamco nawn lo lawk. Asinan, ruahban lo pin ziang a cang ti asile, ka style pawl ka tlansak tikah mino tampi in in biak ngam nawnlo. Cutikah, ka thinlung ah Pathian in thu in sim. Cutin tu ahcun tumtahnak thar ka nei, tui ka fashion tuah ding mi pawl cu Pathian hrangah a si thlang ding tiin tumtahnak ka nei thok.

CT Media- Rock style le fashion danglam zet ih na tuah ruangah buainak na tong maw?

Solomon MRH-  Veikhat cu Pitar pakhat in ka hlasak a ngai. A mit a sing ih a nuam awk zet, asinan a mit a meng sal tikah samsau pin hla ka rak sak timi I hmu ih, khawm theh ah, ka samsau le ka mithmul ka dum ruangih thazang a ngah lo thu I sim. Cumi veten, ka style ka thleng, ka sam ka met cih. Asinan, ka hla, ka style pawl hi Pathian in amah thangthatnak lala ah thianghlim zetin a dang zawngin a hmang theilo maw timi tla ka ruat nasa. Asinan, midang thazang an ngahnak ding thupi zetin ka ruat sawn.

CT Media- Cuti asile rock style le nangmah na original na tuah thar tum sal maw?

Solomon MRH- Kum rei lo te sung khal sehla, Pathian lam ih ka thinlung le ka pekawknak zaten Pathian in I theih sak. Ka nuam awk zet. Nasa sinsin in santhar mino pawl hrang ah Pathian hnatuan tumtahnak ka nei. Ka thinlungah Pathian in a lang ter ti khalin ka pom a si. Cucu, ka style le ka rock style pawl hmangin Pathian hmuihmel ka lang ter tum.

Solomon Khrih Menrihai si dingih a duhnak pawl ka thinlung ah cawl theiloin a um. Curuangah mino tampi in, ka style ruangih ih in biak ngam nawnlonak cu, phah aw niam in, mino pawlih kom le biak baan dingin ka um tum a si. Curuangah, Pathian in si dingih I duh dan, Solomon Khrih Menrihai ah Jesuh hmuihmel lang in, mino tampi rock le gospel concert, stage show pawl thawn Pathian hrang caan ka hmang tum thlang a si.

Kei cu, Lairam ah ka um. Kan Laimi dinhmun hi ka theifiang zet. Mino piangthar lo khal camping an lut duh nawnlo. Pitar le putar lawng te camping an kai zo. Curuangah, mino pawl umnak ah keimah ka feh dingih, an kom thei dingin ka mizia, ka style khal ka tuah thlang ding timi tumtahnak hnget zet ka nei a si.#

Comments

comments

Comments

%d bloggers like this: