Chin Ramkulh Khua 1408 Ah Meisa Ngahlonak Khua 900 Um

Hakha khuapi ih ma-ha-dat-aa line

Hakha khuapi ih ma-ha-dat-aa line

Lal Nun Uk

Chin ramkulh ih khua 1408 a ummi ah, meisa ngah hrih lo mi khua 925 a um hrih lai tiin Chin ramkulh ih meisa le cet lam tlangbawi zung pawl cun, 2015 February thla ih an cazin kommi ah an tarlang. Khawte hrekkhat ahcun mahte Solar le meisa hmang in meisa an vang. Sami peng ah meisa pakhat te hman an ngah dah hrihlo.

“Khaw tamsawn cu anmah te’n solar le tidai tha hmang in meisa an vang. Cozah thar hung kai hnu ah cozah le NGO pawl in khawte pawl ah solar in meisa an pe rero” tiah Chin ramkulh meisa le cet lam tlangbawi zungih vuanzi U Cin Lian Pau in a sim.

Hakha-Falam meisa hri banthuam hrang Chun Cung khawkiangih foundation an tuah rero lai

Hakha-Falam meisa hri banthuam hrang Chun Cung khawkiangih foundation an tuah rero lai

Chin ramkulh khawte thansonak lam zung assistant Director U Tam Aung ve thung cun “Meisa a ngah lo khua an um lo. Meisa a ngah hrih lomi khua lawng an um. Kan nih khal kum tin te’n cozah ih in pekzat in khawte lamah solar kan pek rero” tiin a ti.

“Paletwa peng, Laymyo tiva hnaa lam ih um khawte tam sawn cu, Solar an lei thei lo tikah tlawngta nauhak nei innsang ah sathaufar (pha-zawng- den) an vang. Tlawngta a nei lomi innsang cu khua hlan bang in far an vang men. Hitawk lamah NGO pawl le an thleng lo, cozah in teh meisa a tawlrel sak maw ti tla an thei lo” tiah Paletwa peng, Lungtu khua ih um Salai Naing Khen @Mana Chaing cun a sim.

Chin ramkulh ih Sami peng hi veikhat te hman meisa an ngah hrihlo. Hi mi peng ah khua 161 a um. Tulai fang Chin ramkulh sung ih meisa a pek thei zat hi zatek 34.30 % a siih 2014 ihsin Hakha khawpi ah ma-ha-dat-aa line an ngah thok ih 2015 kum cem lam ah Falam khawpi khalah an  ngah thei men thei tiah theih a si.#

Comments

comments

Comments

%d bloggers like this: