Chin Ramkulh CM Pu Lian Luai Le Kaihhruai Chin Ramkulh ih Hnaṭuan Daan

Salai Senhri

Chinramkulh hi mipi in kan theih cio vekin lamziin pehtlaih nak a harsa,lilawn țhițha nei lo le ei-in khopkham ngahnak um lo,tualsung seenpi pawl farah zetih tlanleennak a simi ramkulh pakhat a si.A tangih kan ngaan ding mi hi Pu Lian Luai ih kaihhruai mi Ramkulh Acozah ih hnațuan daan le țuan hrih lo mi pawl cu famkim lo zet cingin mipi hrangah kan tarlang tum hnik pei.

2017,Feb 27 ihsin 2017,March 1 tiang,Thantlang khawpi ah Chin miphun aiawh in thureel tlaangnak neih a si.

Mindat khawpi ah 2017,January thla ah Maha Dat-Aa Line meisa an ngah zo ih a taanglai mi Paletwa,Matupi le Kanpelet khawpi pawl khalah Maha Dat-Aa Line ngah ve dingin Chinramkulh Acozah lamin ruahman sak rero lai a si.

NAZI 12 SUNG THLENG THEI DING IN

Chinramkulh Vuankyichuk Pu Lian Luai in kumkhat sung a kaihhruai zo mi sungah hin hlensuak zo mi tla a nei ih a hleice in lamziin pehtlaihnak hi hmarhngai takin hlawhtlin sehla,ti ruahsannak a nei a si.Cun,Chinramkulh Saklam dengkor ihsin Thlanglam dengkor,peng 500 lai ih hlaat mi tla nazi 12 sung vial ah thleng vurvo thei dingin ruahmannak a nei.

Cikkha peng,Innphal bangin Aye-Innyan le Khinmang khua karlakah lilawn țha ngaite tuah in Ramri Bazaar tuah dingin tawlreel rero lai a si.Tonzang khawpi le Cikkha khawpi karlakih um mi Nakzang lilawn tla don rero lai a si.Pi 400 sau mi Hnaring le Rizua karlakih Bawinu lilawn khal cu don rero lai a si ve.Tonzang lilawn timi,pi 60 sau,Aisi lilawn le Tedim le Tonzang karlakih Vaarcin lilawn,pi 60 sau tla a um zo.Cun,Kalay le Natchaung karlakih um ve mi Ngasiip va lilawn,pi 60 sau le Aisi lilawn pawl cu don rero lai a si,tiah Pu Lian Luai cun simnak a nei.

VAANZAM TUALAWN,TILAWNG COLHHMUN TUAH DING

Chinramkulh hi thilri phurh khualtlawn sumdawng tu pawl hrangah pehtlaihnak a har hleicetnak,ei-in harsatnak le tualsung seenpi pawlih harton hi a tam thlang ruangah Chinramkulh ih saklam ah vaanzam tualrawnpi le Chinramkulh ih thlanglam ah Tilawng colhhmun tuah dingin ramkulh Acozah in nasatakin a ngaihtuah cih a si.

Acozah thar a kai hnu ah Chinramkulh sungah hnațuan țhițha le sumdawn leilawnnak siseh,ei-in khopkhamten a ngah theihnak ding,farah ram dinhmun ihsin mibang,sabang ih nuntukhawsak ve theinak dingah a hmun le ram ih zirin thlawh lo,ranvulh nak pawl tla țhansoh ter ding,hramthok thilsak hngetkhoh ter ding,hanghnah hangrah zuarsuaknak ziin ah harsatnak nei loten zuarsuak viarvo theinak ziin kawhhmuh sak ding,hnațuantu pawl ih sambaunak hleivulh sak ding,kiangkap thilnung kilhim sak ding,khawpi,khawte ti um loin Sipin lam ih țuanvo neitu pawlih hnațuan daan khal tuhnaakih țhansoh ter ding,Fiimzirnak,Harhdamnak le a dang hnațuan daan phunphun pawl tla țhansoh ter sinsin ding,tihi Ramkulh Acozah ih tumtah biik mi cu a si.

Pu Lian Luai cun,”Chinramkulh ah pehtlaihnak lamziin hrangah vaanzam tualrawn siseh,Tilawng colhhmun le Station a um lo ruangah kanmah dinhmun tawkin Falam khawpi ah ramsung,ramleeng olsamten pehtlaih theihnak ruahsan in Vaanzam tualrawn cu Surbung tlaang ah tuah rero zo a si.Vaanzam tualrawn hi a zamrang theibiik ih țheh lohli ding in hngahhlap zet a si.Myanmar President U Htin Kyaw le Myanmar Vice President (2),U Henry Van Thio tepawl Chinram an rat laiah vaanzam tualrawn hi zohnak an nei ih kannih lam in a țuulhai mi pawl tla diilngeennak kan rak nei zo.A reihlaan ah vaanzam tualrawnpi cu ong thei cih dingin kan zuam rero lai a si.

Cun,Paletwa khawpi lamah Tilawng colhhmun pi cu Mindat khawpi thawn kom awin tuah a si ih Tilawng colhhmun ding lilawn pi cu India Company pawlih tuahsak a si.Tuhi an sak țheh zo.Chinram dinhmun in tilam ziin,leilam ziin,thlilam ziin,tipawl in ranleeng dinhmun kan tep ve thlang ding ruangah thilri phurh lam le sumdawn leilawnnak lam ah zamrang deuh in kan țhangso cak deuh thei thlang ding,tiah ruahsannak kan nei,tiah simnak a nei.

2015 kum lai ih Koman thlisia ruangah Chinramkulh sung hmuntin deuh thaw ah kiangkap harsatnak phunphun tuar cio a si.Cuih harsatnak tuartu pawl tla cu aiawh leiram peek saal an si.

TOWN PLAN

Pu Lian Luai in,”Chinramkulh ah Acozah dinhmun in Town Plan tuah ding/nei ding in lungkim a si.Hakha,Falam le Paletwa, tipawl ah Town Plan tuah dingin tumtah a si ih ျမဳိ႕သစ္​စီမံကိန္​၊ျမဳိ႕ျပစီမံကိန္​း țhansonak hrangah thupi biikah reetin tumtah a si.A taanglai mi khawpi pawlah ျမဳိ႕ျပစီမံကိန္​း dinhmun in sunzom ih tumtah beet rero lai a siih cangsuak hraam dingin ruahman rero lai a si.

Chinram mawinak tintian zoh duh ah a rat tu leitluun ih khuallian pawl hrangah Khawnutum(Natural Park) le Falam peng ih Zinghmuh tlaang kiangkap Ekah 10000 lenglo cu remmawi sinsin dingin tum a si.Himi pawl kan tisuak thei taktak silen ramleeng ihsin in ra khuallian duhtu pawl hrangah Hotel le khuallian kawhhmuh hnațuan khal țhițha in a um cih dingih Chinram mipi hrangah remcaangnak tampi ziin a sialsak thei ding,”tiah simnak a nei.

TUALSUNG KUTTHIAM ZIIRNAK

Chinramkulh,Tualsung țhansonak le Zatlaang țhansonak thuthawn pehpar awin Pu Lian Luai cun,”Tualsung kutthiam ziirnak hi Hakha,Falam le Mindat peng ah ziirnak a um ih cumi ah Thiamtah ziirnak hi a hleice in tlawng on a si.Thiamtah ziirnak saang neitu an karh vivo tikah Chin Nunphung Thuam tiang olsam zetin suah thei zuam a si ih lehhnu ah tualsung hnațuan kaih neilo pawl tla in an ziir thei ve dingih remcaangnak a nei tam leh ding a si,”tiah simnak a nei.

Fimziirnak,Hardamnak le a dang țhansonak thu khal ah thungaithlakin ngaihveen a siih Hakha College tla cu Myanmar Vice President (1),U Myint Swe in onsaknak a neih thu,နည္​းပညာ phunsaangtlawng khal pehzom in sak rero a si ih 2017-2018,fiimzir kum ah ong thei dingin tumtah rero a si thu,Falam khawpi thar,Lungpi ah Cinthlak Phunsaangtlawngpi khal Myanmar Vice President (2),U Henry Van Thio in onsaknak a neihsak zo thu,Hakha khawpi ah နည္​းပညာ phunsaangtlawng khal ong thei beet thei dingin tumtahnak neih a si thu,Mindat khawpi le Matupi khawpi ah College, Phunsaangtlawng khal ong ve thei dingin Ramdinkhawmpi ah diilngeennak neih a si zo thu,”Pu Lian Luai cun simnak a nei.

IN DING TIDAI LAAKNAK DING AH MILLION 5000 HMANG DING

Ramkulh Vuankyichuk cun,”Rampi dinhmun in Chinram tlawngtu hruaitu luubaan pawl hneenah Hakha khawlipi thar ih lamziin hmuahhmuah Kattaya phah mi ziin ah cangsuak thluh dingin diilngeennak neih a si zo.Cun Falam khawlipi ih in ding tidai harsatnak pawl tirehnak dingah thungaithlakin ruahsak a si.Falam khawlipi hlumtu mipi pawl ih harsatnak hi 2015 kum ruah siava ih siatsuah mi,in ding tidai laaknak siatsuah ruangah a siih himi hrang Myanmar Ramdinkhawm Hotu U Htin Kyaw hneen ah diil a si ih U Htin Kyaw khalin a hranten Million 5000 thlak dingin lungkimpinak a hlaan cih ih kan lung a awi zet.Himi Million 5000 thawn Falam khawpi ah in ding tidai ngah lohhli theinak dingah Tendar ko in mithiam sawm in țuan cih a si.Tidai laaknak hna an țuan țheh cun Falam khawpi ih in ding tidai harsatnak pawl cu tireh reprep saal leh thei ding a si,”tin simnak a nei.

FARAH ZONZAI DINHMUN IHSIN

2020-2021 Sumhram kum tiangah Chinramkulh pi hi farah ram ihsin mibang sabang ih tlanleennak ziin,hmun le ram ah canhsuak ding,timi tumtahnak neih a si.

[A tluun ih kan ngaan mi pawl hi a famkim lo zet ding a si.Hmailam ah hihnaakih țha le mawi in kan ngaan sunzom tum vivo pei.Ramkulh Acozah ih hnațuan daan hi mipi ih siartheih dingin ngaan kan tum ringring ding fawn.]

Laaknak>RFA,WEEKLY JOURNAL,BBC,MOI,MP4 NEWS

 

(Visited 189 times, 1 visits today)

Comments

comments

Comments

%d bloggers like this: