Chin Ramkulh Chief Minister Le Chairman Falam Khawpi Ah Ropi Zetin Hmuak

12991106_1100013086685915_5119099183292236710_n

Chin Ramkulh Chief Minister Pu Lian Luai le a ho pawl, Chin ramkulh rorel innpi kaihruaitu Pu Zo Bawi, Falam Amyotha Hluattaw palai MP Zung Hlei Thang le Falam Pyituh Hluattaw MP Riang Vel pawl cu Falam khawpi ah sunglawi zetin tuini, April 16, 2016 an rak hmuak. Falam khawpi luhnak ihsin, an rak hmuak ih mipi 1000 lenglo in sunglawi zetin sunlawihnak an nei.

‘An thlen hlan te ah thli hrangin ruah mallai a tla. Hmakhat te ah mero pawl an kiam ih ni a suak sal’ tiah Falam laihlum Van Bawi Lian cun a sim.

Falam khawpi zatlang innpi ah thusimnak a nei. Chin ramkulh Chief Minister Pu Salai Lian Luai ih thusimmi tawi cu Pastor Thawng Bik in a hnuai lam vekin a rak hminsin mi a tarlang.

CM Thar Pu Salai Lian Luai Thusimmi a tawinak in:

CM sinak hi Pathian in in peekmi a si ruangah Minung hi sunglawi ding kan silo ih Pathian sawn hi sunloih ding a si. PATHIAN hmin thangthat in um seh.

Kan nih NLD Party hi mipi in in fial dingmi sawn kan si. Kan Party ih nehnak silo in rampi thlengawk a duhtu mipi ih nan nehnak sawn a si.

A sia zetmi lamziin le tidai harsatnak le khawthim lak ih caan reituk a um zomi kan ram a vaan ih a tleunak dingah nan mah mipi thawn kutkai aw in Pathian hnen ih thlacamnak thawn kan tuan tlang pei.

Tuini khal ah mipi ih nan siahhlawh kan sivek in mipi in nan tulsammi ziang a si, nan duhmi ziang a si ti lo sutron ding le cibai phah dingin kan ra mi a si.

Kei hi in CM ding ih in ret tikah bulpaak in a fim a thiam a tling ruangah ti lamhnak in a dingfel ( A-yu-taa) ding ti ih ruahsan deuhmi ka si. Cuih ka sinak kilkhawi in dingfelzet ih hnatuan ding ka tumtah a si.

A caan ahcun zing ka thawh tikah CM ka si khal hi ka hngilh theu lai. Ti hmerhmer vek ih bawi sinak khal ka tumtah lo. Curuangah “Pa Luai” tiah i ko tu pawl khal in “Pa Luai” tin in ko thotho uh.

Politics cu buainak le do awknak thawn khat kan si ih Kyan-kan -Kyein hrawng tla cu nauhmin sak in fial sehla “Ral Lian Tawng” ti rorin sak ka duh. Cutluk in harsa in kan feh rero .

In tanzettu le in tanpitu mipi in pehzom in in tanpi sinsin uh tiah lo sawm phah in Lungawithu sim in ka thu ka neet ter ding.

 

Zuk Pawl Zoh Duh Hrang Hinah Click

https://www.facebook.com/Chinland-Today-166795013341065/

Comments

comments

Comments

%d bloggers like this: