Chin Ramih Thinglamtah Bal Ding Duhlo Langternak Tuini In Lamzawh Ding : Zumtu 600 Lenglo In A Hramah Thlacam

zuk; Khonumthung

Hakha ih Thinglamtah zuk; Khonumthung

January 29, 2015

Chin ramkulh khawpi Hakha khawluhnak, khuathar khawlu, Caarcang tlang – Hlawhtling thlacamnak tlang tiih an phun zo mi Thinglamtah cu Chin ramkulh acozah ih thupeknak vekin January 31, 2015 hlan ih siatbal dingin thupek suah a si. Thinglamtah siatbal ding duhlo langternak cu Hakha khawpi sungah tuini thok in, ziangvek dinhmun a thleng khalle thih ngam in ni hnihsung lampi zawhnak an nei tum tiah thu kan dong.

Tuini ih an lampi zawhnak ding cu sml 10:00 -12:00 (Myanmar standard) in an thok dingih tonawknak ding hmun ah Vomtumawng lehtual (bawhlung leknak tual) kiang ihsin a di ding ih, Bochoh Lam (Vomtumawng lehtual in sizung lampi tiang) zawh dingin ruahmannak an nei. A nihnihnak ih lampi zawhnak cu January 30, 2015 ah neihsal an tum ih Sipin Pangpar duum (Chin-Osi) ah tawng khawm aw in Khuathar Thantlang lampial tiang zawhsal ding in ruahmannak an nei.

An lamzawh hi Hakha Christian Ministers Fellowship (HCMF=Hakha Khrihfabu tin le Pastor pawl kom) in an hoha ding. January 23, 2015 ni ah Chin ramkulh Chief Minister Pu Hung Ngai acozah hnenah dilnak cu hi pek a si zo. ‘Dilnak ca kan pek mi ah Pu Hung Ngai cun, ka lo kham hai lo, asinan Cabinet upa pawl tongkhawm aw in thu kan rel ta ding tiin in ti. Ziangvek dinhmun a thlen khalle kan ni cun kan tum kel vekin kan nor thotho ding’ tiin Salai Van Chan Ceu , lamzawh hotu pakhat cun the Hakhat Post hnenah a sim.

Chin ramkulh thuneitu pawl ih thupeknak vekih siatbal dingih an fial mi Hlawhtlingtlang ih Thinglamtah hnuai ah Chin ramkulh hmun dangdang ih zumtu 600 lenglo cun Pathian hnenah thinglamtah siatballo dingin thlacamnak  January 25, 2015 ah an nei. Hi thlacamnak hi zanlai 1:00 in an thok ih tlailam 4:00 ziktiang an hmang khawm. The Hakha Post ih a tarlan dan ahcun Thinglamtah hnuah lamzawh a cem hlan tiang rawl ul in nu ziang maw tizat pawl tla cu thlacam in caan an hmag tum tiin a tarlang.

Hi Thinglamtah siatbalnak san hi Chin ramkulh ih um Thinglamtah hmuahhmuah siatbalnak ding thu a silo. Tui an phunnak hmun hi Budhis pawl khalin an rak dil ve nak hmun a siih thurelnak zungih thutluknak ah Budis pawl in pura saknak dingin a neh. Asinan hi hmun ah thinglamtah an phun ih cui hleiah varthing 200 lenglo daan lo in an hau tiin Tittaw thuneitu pawl ih thubuai an coksalnak ruang ih thu thleng a si tiin Falam nitin thuthang suak Chinland Herald cun a tarlang ve.

Chin state hluatdaw ah hluatdaw palai 7 an um ih Kawl 3 le Chin mi 4 pawl an si.

Thinglamtah a phuntu hi Pu J. Biak Tin Sang a siih kyat ting 30 lenglo cemin, a Sanlam pi 42, a kauhlam (aphei) pi 32, a thuklam pi 12, a sahlam pi 2 bial thawn a kiangkap pawl mirang leilung, cuaipia pawl phah ih dawl a dawl mi a si. March 1, 2014 ah rak tuah thok a siih July 23, 2014 ah an tuah ṭheh. January 13, 2015 ah hi thinglamtah a phuntu Pu J. Biak Tin Sang hnenah Chin ramkulh acozah in daan lovek ih sakmi a si ruangah January 31 hlanah nan siatbal thluh a ṭul a si tiah thu an rak pek mi a si. Myanmar rampi acozah hin kum 1987 ihsin Chin ramkulh ih Thinglamtah pawl siatbal an rak thok ih tu ni tiangah thinglamtah 13 lenglo an siatbal zo.

Kan rampi dindan hrampi phung (363) ahcun rampi acozah ih a pom mi sakhuanak pawl cu a theihtawk in a bawm in a zohkhen ding ti a si.#

Ref; the Hakha Post, Chinland Herald

(Visited 437 times, 1 visits today)

Comments

comments

Comments

%d bloggers like this: