Chin Ram undinsalnak ah FPTP,Kalay in Concert an tuah ding

12036557_891058144282156_3597743797436714390_n

Pansy Lakphak dawr ah thurelkhawmnak nei (zuk – Salai Lal Nun Uk)

Salai Lal Nun Uk

Chin ramkulh sung tilian leimin ruangih harsa tong pawl tundin salnak ah FPTP,Kalay ih hoha nak in concert an tuah ding tiah thuthang kan ngah. Cui concert cu December zarh hnihnak ah Kalaymyo, EFC hall ah an tuah ding a si.

!Runhimnak theh cun mi tam sawn cun an harsa nawn lo ding tin an ruat rero lai ah annih cu zero in an nunhram an thok fang. Himi concert ihsin kan mipi in tundinsalnak hi ziang tluk a thupi ti an fiang sinsin ka beisei. Nargis lai khalah runhimnak cu an tuah. A dung hnu an thlurh thei nawn lo tu tiang an harsa rero lai. Hivek dinhmun hi kan Chin mipi pawl tuar ve hlah hai seh ti ka duh! tiah Falam Phunsang Tlawngta Pawlkom, Kalay hotu Salai Van Thawng Thang in a sim.
Hi concert ah Falam, Hakha, Tedim peng ih hlasak thiam pawl le Mizo hlasak thiam pawl sawm in VCD khal an suah bet ding.

!Tui tum concert in ting thawng khat ngah thei kan tum. Bang man kan ngahmi pawl khal fang khat hman kan kut ah tang lo in kan hlu theh ding. Kan bomnak ding pawl cu Chin ramkulh thlanglam le saklam ah zo hman ih ngaihsak hlawhlomi khaw harsa pawl kan duhsak hleice ding. Runhim lai caan ih mah le thei tawk a rak tuan rero tu pawl khal tundinsalnak ah thanzaang in pe vivo uh! tiah a sim bet.

Chin ramkulh tundinsalnak concert ah hlasak dingih an sawm dingmi pawl cu Mai Ma Kim[Me & Ma Girls], Solomon MRH, Lal Pan Dik@ Dika, Salai Israel VSL, Salai Cung Lian Thawng, Salai Van Siang Mang, Salai Billy, Salai Aa Lian, Mai Bil Sung, Thawn Kham, Thang Pa, Lalnunsanga, Zaia, Lalpanliani, Chanhimi pawl an si.

Concert luhnak ah fee cu thawng kul, Thawng nga, thawng thum ti a si ih tundinsalnak hrang a hlu an khong ding.

!Ruah tam lai ah lamzin, lilawn a zaten an siat theh. Tu hi khawte lamzin pawl cu motor cycle lawng feh thei fangfang in an tuah ih lilawn pawl tla lolam ten mah le khua cio in an tuah. Khaw thawn tul pawl khal anmah ten hmun an vat rero. Ei le in cu hmai kum tiang an harsa rero lai ding. An thlaphan bikmi cu tu bang in cozah bomnak ngah lo in hngilhmi men an si ding hi si! tiah Falam peng ramkulh hluttaw mee hmun No. 1 ih cuhtu Salai PP in a sim.

Chin ramkulh sungah September ni 21 tiang tilian leimin ih siatsuahmi inn 1,126 a um ih inn thawn tul inn 1,825 a um tiah Chin ramkulh cozah in cazin a suah.

Comments

comments

Comments

%d bloggers like this: