Chin Ram Khursungsuak Hlawnthil Thu Ah Acozah Thawn Tongaw Ding

 

Chin ramkulh thlai cinnak zuk: khonuthung

Chin ramkulh thlai cinnak
zuk: khonuthung

Chin ramkulh sung khursungsuak hlawnthil lai ding in ramsung ramleng company pawl in an dilnak par ah ramkulh acozah tel in ramkhel party le zatlang pawlkom pawl June ni 25 in 26 ting Tedim khuapi ah tonawknak neih ding a si thu Chin ram khursungsuak hlawnthil zohkhentu bu hotu U Tha Tawng in a sim. 

“A laitu company pawl in lailan ding le tualsung mi thawn a cangthei mi buainak kan relkhawm zik” tiah a sim.
Chinramkulh, Tedim peng ih Rulbuk tlang thirsen lai ding in Tuluk ramih North Mining Investment company in rampi acozah hnenah siannak an dil bangin India ramih company pakhat khal in Falam Khazeng sung thirlai ding in a dil. Ramkulh sung thir laih ding hi ramkulh acozah in thilti theinak a nei lo ih rampi acozah sawn in direct in a kai tiah Chin ramkulh thingram le thir tlangbawi U Kyaw Nging in a sim. 

“Anaibik kan sim a si le Rulbuk tlang thu ah ramkulh acozah hnenah dilnak ca a thleng lo. Company le rampi acozah in bangrep in an tuan. Kannih kan hna cu tualsung mipi pawl huaihot hrawng fang lawng si, a dang ziang thilti theinak hman kan nei lo” tiah a sim.
Project pakhat parah tualsung mi pawl harsatnak tong lo ding in acozah le mipi karlak bombawi aw ton thei ding in hivek ih tonawknak a si thu, ramkulh acozah in tlaksamnak pawl kan khihhmuh vivo ding tiah U Tha Tawng in a sim. 

Chin ramkulh ah peng pakhua a um ih Thantlang peng siar lo a dang peng pariat ah cromide, nicle, thir, thirsen, aluminium, thung, lung meihol, zinan, a suak ih cu pawl laiding a diltu company 24 an ummi lakah company 5 cu tu ah tuantheinak an ngah zo thu ramkulh thingram le thir tlangbawi vuanzi zung in a than.#

(Visited 476 times, 1 visits today)

Comments

comments

Comments

%d bloggers like this: