Chin Politic Thlirnak Series (Pastor Hre Mang)

Rev. Hre Mang (B.A. Political Science, M.P.A. Public Affairs, B.Th. Th.M. Theology)

Pastor Hre Mang

Pastor Hre Mang

CT: Kawlram acozah thlengh awnak tluan ah na hmuh daan le thlir daan?
Tuisan ralkap uknak ihsin mipi uknak (democracy) ah thleng aw dingin nuamtete’n thleng awknak (gradual evolution) hi Kawlram thleng awknak dingah asi dingmi, a thabik in a lang tiah 2003-2004 laiah cahram ka rak ngan dah. Atuvekin a thleng aw mi pawl hi a hram thawhnak kekar tumpi asi ih lungawi zetin pom le co hlan ding asi. A tlangpi thu in, leitlun ramkip ram uk awknak thleng aw mi pawl kan zoh asile, ralkap uk awknak cu mipi uk awknak ah thleng aw dingin lamzin pa thum a um: i) Ralkap uknak sung ihsin amahte kaihruai aw thei nawn loin an siat, lole cozah kumpi uk awknak cu mipi kut ah an ap, ii) hriamhrei thawn siatsuah an si, international bawmnak in dothlengtu pawlin ralkap cozah an neh, iii) nuamteten thleng awknak, a tu ih kawlram thleng awknak vek in. Cumi pathum lakah a tu ih kawlram thleng awknak vek hi a thabik, a himbik asi theu.

Kawl ralkap cozah kumpi thawn mipi hnatuan tlang tikah mipi siseh ralkap siseh democracy hrang ramkheltu pawl hrangah siseh hlawknak asi. Ralkap pawl hrangah nuamnai ten an fehnak lamzin him zetin rampi uktu tuanvo an suahsan vivo thei ding. Democracy hrang ramkheltu pawl khalin hriamhrei thawn mi tampi thisen luangter loin democracy pitling dinthei dingin ram kumpi uk awknak thuanthunung cu an nawr vivo thei ding. Mipi pawlin fimkhur zetin lamzin ong aw mi poh ah cozah kumpi le senpi vangtlang thu hla tawlrelnakah tel sinsin thiam a thupi. Ramleng ihsin zalen zetin Kawlram Democracy hmasawnnak hrang ramkheltu pawl khalin aukhuangin leitlun khawmual tinah cozah kumpi siseh leitlun ramtinkar pawlkom hnenah siseh ausuahpi in nawr sinsin a thupi fawn.

Kumpi uk awknak cu ralkap pawl lawng sin awn loin mipi aiawh hriltlinmi mi tampi sawn an tel zo, pursum leilawn (economics) lamah ramdang dawr aw tawn dingin sangka a ong vivo zo, ramkheltu political party pawl tampi hril awknak ah zalen zetin tel thei dingin sangka on asi vivo zo, ramsung miphun dang ramkhel dothlengtu pawl thawn biakremnak a tuah zo ih a tuah rero lai, tvp, tampi ram thuanthu hmailamah a thalam in hma a sawn vivo asi ti cu zapi theih le pommi asi ko ding.

CT: Kawlram ukawknak a thlengh aw hnu  Chin mipi hnen ah ziangtivek danglamnak a thleng?

Ramleng um, kum 20 lenglo rampi suahsan zotu hrangah ziangvek danglamnak a thleng timi cipciar cu sim theih asilo ding. Asinan langpang zetin a thleng aw mi cu Chin State kumpi cozah a dingsuak ih mipi hrilmi palai pawl an tel thei. Kumpi uk awknak thu mipi pawlin zalen zetin an sim, an rel, an tel thei ve mi hi a thupi zetin danglamnak asi. Hivek thuanthu khirhkhan laiangah Kawl ralkap pawl ziangtluk an sual, an thalo, an diklo, timi hnakin an thatnak, senpi vangtlang, mipi hrangah sangka a ong aw mi pawl ziangtin thatnak lamzin parah cakzetin kan tlanpi ding timi a thupi zet. Chin mi pawlin Chin State lenglam ah “Chin Affairs Minister” kan neih thei mi tla hi danglam zet, thiltha tukmi, Chin mi thuanthu duh um zet asi. Cui hleiah kum reipi hnu ah Chin mi pawlin mipi hril thlinmi palai Kawlram kumpi rorelnak ah palai kan neihsal thei mi tla kekar khat hmailamah kan kar tinak asi fawn.

CT: CNF le Chin State Government Ceasefire tuah ding mi thuah na thlir daan Positive le Negative impact?

CNF le Chin State govt. biak awknak ah “cease fire” an tuah ding timi cu rel ding a mal zet. CNF le Chin State govt. an kap aw aw titla kan thei dah lo ih “kah-cawl” “Cease fire” nei ding timi tla sim ding a um hrih lo. Asinan, a thu in cu CNF cu Kawlram cozah do tu asi vekin rem awknak hrang biak awknak cu thiltha asi. Kawlram kumpi in zovek tla ramhnuai ah meithal kai loin lungrual ten kekar tlang a duh ih a tamsawn, zaahza zikte hriamhrei kai pawl a biakrem theh zo mi asi. Curuangah CNF/A pawl tla ramhnuai ah hriamhrei kai rero tul nawn loin cozah kumpi huam sungah an lut thei asile thatnak tampi a um ko ding.
CT: CNF le Kawl cozah thawn ceasefire tuah hnu Chin State sungah CNF in mipi tlun ahle cozah tlun ih thu a nei theih daan? Chin mipi lam ihsin cohlang theih an si pei maw?

CNF le Kawl cozah biak rem awk hnu thu cu sim a cu hrih lo. Asinan ruahnak ti tamtu menah sim asile thilcang theimi menmen sim asi ko. CNF le Kawl cozah an biakrem awk tla le CNF cu political party pakhat asi vekin Chin mipi lungkimnak tel loin Chin mipi parah thuneihnak an nei thei cuang lo ding. Chin mipi pawlin CNF cu ziangtiang an pom in an co hlang ding timi cu Kawl cozah in ziangvek dinhmunah a ret duh timi parah a hngat aw ding.
CT: CNF in thuanthu tampi arak nei ih Tuitum an reform sal tikah Ziang ruang bikah Dr. Za Hlei Thang kherkher hotu ah an hril?

CNF reform ah “Ziang ruang bikah Dr. Za Hlei Thang kherkher hotu ah an hril?” tiah ruat ding asilo. CNF hotu pawl le Dr. Za Hlei Thang ziangvek pehzawm awknak an nei timi nan thei asile “ziangruangah tu lawngah president ah an ret?” tiah thu nan sut duh sawn dingmi asi. Pu Lian Uk, Pu Nang Thang, Pu Kip Kho Lian te pawl cu CNF hotu pawl thawn ramleng Chin politics ah neihniam zetin pehtlaih awknak nei ringring an si. Chin mi lakah mipi rinsan mi le hmin nei an si ih ramleng politics ah hruaitu ding hrimhrim an si ko. CNF pawl politics an thiam zet asi. A bik takin Kawlram cozah thawn biakremnak nei ding an si tikah CNF in ramleng um Chin mi zapi asilo hmanah a tam theibik a huap asi timi Kawl cozah hnenah langter ding cu CNF pawl tuah dingmi hrimhrim asi. Cutin sim tikah Kawl cozah thawn biakremnak hrangah a hmin men in hman mi siloin Chin miphun ramkhelhnak ah Chin mi zapi duhmi khaikhawm in hmailam kekarnak asile a tha tuk mi asi.

CT: Pu Dr. Za Hlei Thang hi kan Chin mi pawl ih rinsanmi pacang pakhat a siih amah le tuanpi dang pawl ih ruahvek in ramsungah a cangvaih thei pei maw? Positive le Negative consequences pawl ?

Pu Dr. Za Hlei Thang in ramsung politics ah ziangtluk a cangvai thei ding timi simcia thei dingin ka theihmi thu a mal tuk. CNF president a tuan tik ah CNLD a suahsan zo maw tit la ka thei lo. CNF party hmin in ramsungah politics a tuah pei maw, culole CNF pawl support mi political party pakhatkhat sung ihsin a cangvai pei maw, tvp, ruat ciamco ding khal asi hrih lo in a lang.Simcia thei mi cu CNF le Kawl cozah an biakrem awk thei asile Pu Dr. Za Hlei Thang tla daan vekin (legally) ramsungah a lutsal thei ding ti tiang cu simcia theih asi ko.

CT: Tuitum ih CNF reform mi hin Chin mi zaten ai-awh thei ngaingai pei maw?

Ramleng ramhnuai ihsin leihnuai (underground) ramkhelh nak thu ah “mipi aiawh” timi hi hman theih asilo. Tuitum CNF reform thu ah USA ih um Chin mi, Falam le Tedim, Matu lam pawlin theihpinak a um lo kan tile a sual lo ding. USA ah Falam pawl sihcih awknak Chin pawlpi siseh Zomi pawl sihcih awknak Zomi Inkuan siseh Matu lam hruaitu Former CNF GS Rev. Dr. Val Thang te siseh, tvp Chin mi tampi in CNF reform an tuahmi thu thawn pehpar in telnak an nei lo. Umzia cu ramkhelhnak dothlengnak cangvaihnak ah ramsung langpang (over ground) politics vekin mipi duhnak lakhawm hmaisa in mipi ai awh timi a um thei lo. Curuangah mi pahnih khat khalin mipi lungkimpinak tel loin mipi hrang a tulmi sim le aupi theih asivek CNF pawlin an tuahmi tla mipi ai an awh maw, awh lo maw, buaipi ciamco ding asilo. Mipi ai an awh maw awh lo maw timi hnakin mipi hrang, ram le miphun hrang thiltha an tuahsuak thei ngai pei maw, an tuah maw, timi sawn hi thlirthlak ding asi, a thupi sawn mi asi.

Mipi pawl khalin a tuantu pawl vek thotho in mai duhhrilnak liolio in tel thei tel lo thei, dinpi thei dinpi lo thei an si. Kawlram cozah thawn biakremnak an nei ih ramsung an lut tik lawngah mipi ai an awh maw, timi cu mipi le cozah karlak ah ruat le tuahfel dingmi asi. Ramsung an lut hnu hmanah mipi canpual la in senpi vangtlang mipi bungrua hmangin, mipi hrang siatnak thatnak a thlen theitu dinhmun pek an si ding tik lawngah mipi aiawh an si maw si lo timi thu cu ruat asi ding.

Comments

comments

Comments

%d bloggers like this: