Chin Pasalṭha Pawl Hngilhlonak Lungphun Falam Ah Phun – Thuanthu Tawi

Falam peng Sim ram um Chin pa ralṭha pawl ih Mirang an rak donak kum 100 kim lungphun…

Chin nu Deirei, Pi Levi Sap Nei Thang, I Love Myanmar dintu in February 2, 2018 ah sunglawi zet in Falam Cinmual ah an phun.

MIRANG ACOZAH IH GERMANY DONAK THU (Sim hrin le Halkha ih Mirang donak thu)
+++++++++++++++

Mirang Acozah le Germany cu kum 1914 hrawngah an rak do aw ciamco ih, curuangah Mirang Acozah in Laimi pawl cu Germany ramih kuli (Labor) ṭuan dingah an rak ko ciamco. Cutikah Halkha hrin le Sim hrin pawlin acui Germany ramih vong feh ding cu an duhlo ruangah kum 1917 ah Mirang an rak do. Kawlram pawlih ral a si lo an ti ih, Germany ram feh an duhlo. Curuangah Halkha hrin le Sim hrin in Mirang Acozah cu an kap ciamco ih, asinan, Mirang Acozah cun a neh ruangah mi-uk Van Mang le midang tampi an kai ih, thawng sungah an thlak ṭheh. Mihrek cu an that ih, mihrek cu an suahsal.

Culaiah Sim hrinin Mirang do a hrawttu le a hmaihruaitu pawl cu a tanglam pawl an si ih, Mirang zipeng vuanthok le a ralkap pawl that dingin an feh ciamco. Congheng Zamual an thleng ih, cuihsin Congheng Zamual pawlin,..”Aa..Sim hrin nu le pa pawl, Mirang kap hlah law, a tun zipeng vuanthok le a tui Balai ih a am mi ralkap nan thah man nih kawlin a dang hang luklo pini, that man am turh si-ah ni, a netnakah nan mah lala cam turh nan si,” tiah Zamual Bawi Zam in a rak dawn ih, mihrek cu Cinmual tlang a rak thleng an um man an ti.

Cuih Congheng Zamual tei rak dawn cu, “Asile, kan va ruat hrih pei ih, Germany ram kan thlen khal le thih ṭhiamṭhiam, a hih kan Laitlang ih thih kan duh sawn,” tiah an ti ciamco ih, malte ruat hrihih do nawnsal ṭhiamṭhiam dingin an um. An hriamhrei cu conkiang, muzuk, meithal le feipi pawl tla an si. Mirang Acozah pawl cun a cui an do tum thu an theih ihsin Sim ram cu ralkap thawngkhat lai thawn an siim ih, an kulh ciamco. An khawsung pawl ralreltu ralṭha pawl khal an kai ciamco. Ral hruaitu pawl Sim hrin ih an ralṭhabik Mirang Acozah ih kaihngahmi pawl cu:

1. Sang Cung Nung Khuangli
2. Ṭha Kulh Khuangli (San Cung Nung ih unau)
3. Lian Kam Lo Sim Dihai
4. Thang Hre Losau
5. Lian Khup Bualmin

A tlunih raldotu 5 pawl cu Mirang Acozah in anmah dotu, ral-hruaitu an si ruangah a kaih ṭhehih, Rangoon ah kum 5 thawng a thlak. Culaiah Halkha ramah Van Mang cu thah dingih ruahmi a sinan, Khuangli U Sang Cung Nung in Mirang bawi, thawnginn kiltupa (Ṭhawnghmu) hnenah Halkha hnemraang puan nawhthuh ah a pek sak. Curuangah Van Mang cu thihnak ihsin a luat suak. Curuangah Halkha Van Mang cun, thihnak ihsin i luatter manah laksawngah darkhuang pathum ka lo pe ding tiah a rak kam.

Thawng ihsin an suah ṭheh hnu, kum tawkfang a rei hnuah Halkha Van Mang ih darkhuang pathum phur dingah U Sang Cung Nung cu a pu, Sen Hngilh Lo sawmin Halkha ah an hong feh. Van Mang cu a lo, pengruk hlatmi hmunah a rak riah ruangah hong tawng ngah theiloin, darkhuang pathum phur ngah loin an rong kir. Curuangah khuahlan ih ralṭhazet ih Mirang a rak do ngamtu cu Halkha hrin le Sim hrin an rak si.

Sim hrin pawlin Mirang Acozah an rak do ruangah, an misenpi cawhkuan a pekih, tui Falam Cinmualtlang velnak lampi, Cinmual bualrawn cu a lak roriin Sim hrin pawl a ceh ter. Kuli man le lamcaw khal a pe lo. Curuangah Cinmual tlangvel lampi cu ralthawh manih rak ceh a si ruangah a lampi hminah Sim hrin ralhruaitu, Sang Cung Nung lampi tiih sak dingih mawi asinan tlangvel lampi an ti men.

Source: (Pu Ral Sai Lo ih Cabu Nganmi: HAUHULH THLAH SIM THUANTHU & LAIRAM THUANTHU)

(Visited 45 times, 1 visits today)

Comments

comments

Comments

%d bloggers like this: