Chin Nu Pahnih Australia Cawi Mawinak Ngah: Deakin Community Awards

Deakin Community Awards ngahtu Nu No Than Thluai, MP Michael Sukkar, Par Ṭha Hluan Mang Cin

Deakin Community Awards ngahtu
Nu No Than Thluai, MP Michael Sukkar, Par Ṭha Hluan Mang Cin

Van Bawi Lian
Chinland Today Media

Melbourne: Australia, Melbourne khawpi nisuahnak lam ih mipi vantlang hrang pumpe ih hnaṭuantu, pawlkom 60 lenglo pawl cawimawinak cu July 21, 2014 ah Deakin ihsin Federal Member a simi Michael Sukkar in peknak a neiih, Chin mi pawlkom lak ihsin nu pahnih in an ngah ve.

Nu No Than Thluai Zahau, Chin Community Victoria le Par Ṭha Hluan Mang Cin, Australia Chin Community (Eastern Melbourne) pawl in a veikhatnak Deakin Community Award cawimawinak cu an ngah. Tui ṭum hi a veikhatnak hrang Deakin Community Awards an peknak a si.

‘Hi cawimawi, sunlawihnak lawmman kan peknak san cu, kan vantlang mipi pawl hrangih hnaṭuantu, rampi hrangih miralṭha pawl in cawimawknak an phu a si tiih kan ruah ruangah kan peknak a si. Hmailam caan khalah vantlang mipi hrang tamsin ṭuantu an um theinak ding khal kan ruahsan. Vantlang mipi a ṭhansoh lawngah kan rampi a ṭhangso ding’ tiin Federal Member MP, Michael Sukkar cun Chinland Today hnenah a sim. ‘Chin mi pawlkom hi nan tiṭha, vantlang hrang hnaihnoknak khal nan tuah dahlo, nan hnaṭuannak tete kan zoh tikah kan lungawi zet, kan lo lawm a si’ ti khalin a sim tel.

Nu No Than Thluai Zahau cun, ‘Khawtlang hrang tlawmngai ih ka rak ṭuannak ruangih lawmman ngah ding tlak ahcun ka ruat awlo, a sinan in duhsaknak le ka ṭuan mi sun pawl in rak hlutpi ruangah a si, ṭuanpi zate parah le kan hnaṭuannak catbanglo ih in rak bawmtu kan mipi pawl parah ka lungawi, hmailam caan khalah community hrang theitawk kan zuam peh vivo ding’ tiin Chinland Today a sim. ‘Mipi vantlang in hotu pawl ih hnaṭuannak kan theihthiam ih thazaang kan pek lawngah kan community, kan phunhnam a ṭhangso ding a si’ titla in a sim tel bet.

Par Ṭha khal in ‘Ka ṭuan pi pawlin ngah dingih ka hmin an pek mi hi ka phulo, kei ka ṭuan mi cu ziangti tham lote a si, in duhsaktu kan community upa le kan mipi zate parah ka lungawi” tiin Chinland Today hnen ah a sim ve.

Nu No Than Thluai hi kum 17 mi a si ihsin khawtlang, kohhran, ramkhel party; Chin National League for Democracy,  Chin Women Organisation pawl tiang khalih kum reipi rak ṭuan dahtu a si. Tui ṭum ih cawimawinak lawmman an pek mi cu Melbourne ih Chin mipi hrang, a tlawmngainak, a pumpek awknak pawl ruangah, nisuahnak lam ih um Chin pawlkom, Chin Community Victoria aiawh ih an pek mi a si.

‘Nu Thluai hi Kan pawlkom ih kan hrilnak san cu, Falam Pawlkom hrang  a tikcu, thazaang, theihnak, sumpai le zei le zong, a thok ihsin tutiang danglamnak  umlo ih ṭuantu bik a si. Pawlkom hmailam fehnak ding hrang, pawlkom duhsakbiktu le calaai lam khal ih in khaitu nu tling zet khal a si. Culawng siloin Nu lam khal pawlkom ih tel ding duhsaknak nei biktu le kan vantlang mipi thazaang in pek tu bik a si. Curuangah ngah hmaisabiktu dingah a tlingbik ti in kan hmuh ruangah CCV hotu upa pawl ih kan hrilnak a si’ tiin Pa Wesley Bawi, CCV secretary cun a sim.

Chin Community Victoria hi Lailun Pawlkom Melbourne tiin 2007 ah rak din thok mi a siih, a dintu lakah Nu No Than Thluai khal a telve. Nisuahnak lam ih um Falam pawlkom a siih sungtel 400 zikte an nei. Australia Chin Community hi 2007 kum ah Hornbill Chin Association of Australia (HCAA) tiin nisuahnak lam um Hakha, Thantlang pawl khaikhawmtu upa pawl ih din mi a si. Tu ah sungtel 1000 leng an nei.

Australia, Melbourne khawpi nisuahnak lamah Chin mi 2000 zik an um ding tiah zum a siih, community pawlkom 10 lenglo le biaknak bu 15 lenglo a um.#

Deakin Community Awards ngahtu

Deakin Community Awards ngahtu

 

Comments

comments

One Comment

  1. wesley bawi says:

    Mai tong ten siar ding thuthang thatha le miphun thansonak hrang thazang pek awk nak thu thar tete nan rawn tawlrel tento mi parah lungawi nak tampi kan nei. nan titha, CT thuthang cak sin in nun sau vivo sehlaw

Comments

%d bloggers like this: